Ishin vitet e arta të Flamurtarit të madh në futboll.

Ishin vite dhe rezultate të cilat ende janë të papërsëritshme dhe më të cilat krenohen jo vetëm në Vlorë por edhe më gjerë.

Ishin vite kur Flamurtari përballej me “Partizanin” e Beogradit, “Leh Poznan”, “Vismut Aue” dhe mbi të gjitha do të përballej dy herë me “Barcelonën” e madhe.

Por ndërsa në Vlorë dhe në mbarë Shqipërinë i gëzoheshin atij ekipi të madh që po bënte emër në Evropë, problemet nuk kishin fund në këtë ekip.

Politika komuniste i ishte vënë nga mbrapa dhe mundohej si e si tia errësonte famën dhe suksesin.

Flamurtari kërkon të shpallet kampion. Një vit para festës së Flamurit

Vlonjatët futbollin e duan. Jo vetëm, dinë dhe ta luajnë. Ka pasur një arsye që në 20 vitet e fundit, të lindurit e këtij qyteti kanë qenë protagonistë në skuadrën përfaqësuese. Atë kombëtare dhe të moshave. Trofetë nuk janë gjithsesi arma e tyre më e fortë. Me vetëm një titull kampion, në 1991, Flamurtari nuk është një skuadër elitare në kampionatin shqiptar. Për emrat, apo për mënyrën e të luajturit po. Një revolucion më vete.

Sot - Flamurtari i sotëm është një skuadër më e pak e famshme se ajo e viteve ‘80. Ekipi që e tronditi Barcelonën dhe që shkoi në turin e tretë të një Kupë Europash duhet të heqë dorë përfundimisht së jetuari me kujtimet. Talentet dhe shanset për të bërë një gjë të mirë janë. Klubi është i organizuar, financat janë solide dhe mbështetja nga kryetari i Bashkisë nuk ka munguar asnjëherë vitet e fundit. Nëse rezultatet kanë munguar kjo ka pasur disa arsye. Mund t’ia faturosh dhe krerëve të cilët nuk kanë ditur të shpenzojnë ashtu si duhet një buxhet që do të kishte zili çdo ekip shqiptar. Mund t’ia faturosh dhe mentalitetit dhe përgjithësi indiferencës vlonjate e cila në shumë raste nuk ka besuar se do të vijë ndonjë epokë më e mirë se ajo e Kushtës me shokë. Vlonjatët e sotëm do të vijojnë të mos fitojnë nëse do t’u kujtojnë atyre që luajnë se janë kushedi sa herë më të dobët se shokët e Kreshnik Çipit në mesin e viteve ‘80. E bukura është gjithnjë e bukur, por sot duhet jetuar me të tashmen.

Dy lojtarë që luajnë prej disa vitesh me Flamurtarin, Ermir Strati e Bledion Guga, sezonin e ardhshëm nuk do të veshin fanelën kuqezi. Lajmi bëhet i ditur nga e përditshmja sportive “PanoramaSport”, që shpjegon se të dy lojtarët nuk kanë marrë një ofertë të kënaqshme financiare nga klubi, por njëkohësisht nuk u është garantuar hapësirë e mjaftueshme në formacionin titullar nga trajneri Magani. Afrimet e fundit në merkato dhe blerjet e pritshme të ditëve të ardhshme kanë zvogëluar ndjeshëm shanset për një vend titullari për këta lojtarë, që në fakt asnjëherë nuk kanë qenë titullarë fiks te skuadra vlonjate. Në sezonin e shkuar Strati e nisi shkëlqyeshëm, me një gol në fitoren 1-0 ndaj Motherwell në Europa League, por më pas nuk gjeti shumë hapësirë, duke luajtur vetëm 5 herë nga minuta e parë gjatë gjithë sezonit dhe duke luajtur 12 herë si zëvendësues, pa shënuar asnjë gol. Në krahun tjetër, Guga e nisi si një titullar i mundshëm në qendër të mbrojtjes, por forma e dobët e tij dhe e gjithë mbrojtjes gjatë pjesës së parë të sezonit bënë që Flamurtari të besonte te kroati Puljiz, ndërsa Guga luajti vetëm 10 ndeshje si titullar gjatë gjithë sezonit, pa u ngjitur asnjëherë në lartësinë e duhur, pavarësisht se prej disa sezonesh pritej shpërthimi i tij në krah të Franc Veliut. Me largimin e Gugës dhe Stratit, shkon në 7 numri i lojtarëve të larguar, pas portierit rezervë Halili (Kastrioti), qendërmbrojtësit Puljiz, mesfushorit Bilen dhe sulmuesve Mema (Skënderbeu) e Memelli (Arabia Saudite), ndërkohë që janë zyrtarizuar blerjet e mesfushorit Devolli (Tirana) e sulmuesit Daniel Xhafa (Besa). E sigurt është edhe firma e mesfushorit të njohur Devi Muka, i cili do të prezantohet ditët e ardhshme, kur të firmosin edhe lojtarë të tjerë, ku shumë pranë firmës është sulmuesi Nora (Laçi) dhe pritet edhe një qendërmbrojtës (Toni Pezo ose Andi Lila).

Sot firma, i jep 20% më shumë se çfarë përfitonte te Tirana e sezonit të kaluar. Pas tij priten bume te tjerë

Gjirokastriti Bledar Devolli do të bëhet sot blerja e parë e rëndësishme e Flamurtarit, por jo e fundit. Mesfushori i Tiranës ka rënë dakord me presidentin Gjika për një shumë më të madhe se ajo që lojtari përfitonte sezonin e kaluar te bardheblutë. Akordin e ka pranuar dje futbollisti por edhe drejtuesit e klubit të Flamurtarit. Pranë saj është edhe sulmuesi Daniel Xhafaj, por ky i fundit do të niset më parë për një provë në Kinë: në rast se nuk firmos atje do të kthehet në qytetin e lindjes. Futbollisti do të vijë sot në Vlorë dhe pritet të firmosë kontratën për tu veshur kuqezi me Flamurtarin e fuqishëm të sezonit të ardhshëm. Edhe pse firmosja e kontratave nga të dy palët shikohet thjesht si një akt formal me fuqi administrative, zyrtarisht nuk bëhet e ditur shuma për të cilën Devolli ka vendosur të pranojë ofertën e presidentit Gjika. Sezonin e kaluar Devolli përfitonte rreth 50 mijë euro te Tirana. Kjo shumë, sipas disa burimeve pranë klubit është kaluar me rreth 20% përqind. Nga burime formacioni pranë presidentit Gjika mësohet se nga ana e tij janë marrë të gjitha masat e duhura financiare për të zhvilluar një merkato shumë cilësore, për të prezantuar një Flamurtar ndryshe sezonin e ardhshëm. Kështu për Flamurtarin sot firma e Bledar Devollit dhe më pas edhe ajo e Abilaliajt do të jenë thjesht të parat në radhë por jo të fundit, sepse në ditët e ardhshme pritet të ketë afrime të tjera tek skuadra vlonjate.

Portieri vlonjat Shpëtim Moçka do të qëndrojë, pavarësisht ofertave që ka pasur

Portieri i Flamurtarit, Shpëtim Moçka, edhe në sezonin që lamë pas është vlerësuar si një nga pikat më të forta të ekipit vlonjat. Aktualisht, ashtu si edhe pjesa tjetër e ekipit të Flamurtarit, edhe për Moçkën janë ditë pushimesh, në pritje për të rinisur përgatitjet për sezonin e ri futbollistik.

Vetë portieri i ekipit vlonjat pranon se, edhe pse kohë pushimesh, ka arritur të ketë kohë edhe për përgatitje individuale, ndërsa konfirmon që do të vijojë të jetë pjesë e Flamurtarit, kur siç thotë vetë ai, nuk ka pse të ndodhë ndryshe. “Kemi lënë pas një sezon të lodhshëm, por në fund kemi arritur atë që kërkonim të gjithë, natyrisht vendin e pestë në renditje dhe qëndrimin në superligë.

Më duhet të them që gjatë sezonit që lamë pas kemi hasur jo pak vështirësi, megjithatë në fund, duke luajtur mirë gjatë fazës së tretë, jemi renditur të pestët. Një sezon që edhe për ne futbollistët ka pa dyshim momentet e vështira dhe të bukura, por ajo që dua të kujtoj dhe natyrisht mbetet momenti më i vështirë, është elimini në Kupën e Shqipërisë, në kohën kur edhe në kampionat nuk kishim rezultate bindëse.

Talenti i portës vlonjate: “Dua te ruaj atë qe kam fituar, nuk ndërmarr aventura brenda apo jashtë vendit”.

Portieri Shpëtim Moçka edhe pse ka mbushur tre vjet në portën e Flamurtarit, përsëri premton besnikëri për të ardhmen. I zbuluar si talent kur ishte vetëm 17 vjeç, Moçka në harkun e këtyre tre sezoneve ka pasur rritje. Pas përvojës që ka fituar si pjesë e ekipit kombëtar të U-21, lojtari synon hapur portën e ekipit kombëtar.

- Moçka, keni siguruar ndonjë ofertë për të menduar largimin nga Flamurtari ?

- Oferta kam pasur dhe vazhdoj të kem, por të gjitha i kam kthyer prapa duke mos marr asnjë prej tyre parasysh. Këtë vit kam vendosur të mos mendoj për largimin tim nga Flamurtari. Jo vetëm që kam nevojë të rritem, por më kryesorja qëndron ne faktin se tek kjo skuadër kam prekur një sukses, për çdo sezon.

- Më konkretisht…?

- Kur nuk kisha mbushur 17 vjeç më është besuar porta e Flamurtarit. Pak më vonë diçka më lart, m’u besua një vend në ekipin kombëtar U-21. Pas përvojës që kam marre nuk mund ta fsheh dot se tani synoj dhe portën e kombëtares Po t’i shtosh këtyre fakteve edhe atë se tek Flamurtari kam fituar edhe trofe, siç ishte rasti Kupës së Shqipërisë sezonin e kaluar, gjithçka për mua është OK për momentin.

Trajneri i Flamurtarit, Magani: Me Teutën luajmë vetëm për vendin e pestë, nuk do ta kenë të lehtë me ne

Dje në mesditë pas seancës të fundit të stërvitjes në kuadrin e përgatitjeve për ndeshjen e ditës sotme me Teutën, trajneri Magani ka bërë një prononcim për shtyp duke sqaruar objektivin që do të synojë të realizojë Flamurtari në këtë përballje. “Së pari më duhet të sqaroj se Flamurtari nuk do të bëjë asnjë lëshim në këtë ndeshje, siç mund të na paragjykojë dikush”, ka thënë Magani në hyrje të prononcimit të tij, duke vazhduar më poshtë me fjalët: “Si skuadër kemi ardhur deri në këtë pikë të kampionatit duke mos lejuar të tjerët që bëjnë llogaritë tona. Shumë pak ju interesojnë të tjerëve se sa pikë i duhen Flamurtarit në këto dy ndeshjet e fundit, për të qënë i qetë në mbijetesën e tij.

Përderisa matematika e lejon, Flamurtari kërkon edhe Europën në dy ndeshjet e fundit

Flamurtari do të luajë ditën e premte në Durrës përballë ekipit të Teutës, një nga ndeshjet të cilësuara si mjaft të vështira, për vetë pozitat që ka ekipi kundërshtar në tabelën e klasifikimit. Megjithatë, duket se në kampin vlonjat ndeshja është cilësuar një takim ku vlonjatët duhet dhe mund të përfitojnë që të shohin edhe nga vendi i katërt në renditje. Kjo për vetë stafin teknik të Flamurtarit është quajtur madje një sfidë, duke parë që pas fazës së dytë Flamurtari renditej në pozicione të vështira dhe tashmë mund të pretendojë edhe daljen në Europë për sezonin e ardhshëm.

Përderisa matematika e lejon diçka të tillë, atëherë në kampin vlonjat kërkohet diçka e tillë, duke parë që edhe ndeshjet e ekipeve që janë më lart në renditje janë edhe më të vështira se ato që ka ekipi i Flamurtarit. Megjithatë, gjithçka i është lënë fushës së lojës dhe do të jetë ajo që do të përcaktojë gjithçka. Lidhur rreth këtij fakti, mbrojtësi i Flamurtarit, Franc Veliu, ka konfirmuar se Flamurtari do të luajë drejt, pse jo mund të synojë që të përfitojë edhe nga ndeshjet e tjera.

Duke parë situatën para ndeshjes me Tiranën, para ndeshjes me Besës asnjë nuk do të flasë

Flamurtari do të jetë në heshtje shtypi deri në përfundim të ndeshjes me Besën. Eshtë ky vendimi i ardhur nga klubi vlonjat, ndërsa duket se gjithçka lidhet me situatat e krijuara në çdo pragndeshje dhe për të evituar deklaratat dhe antideklaratat. Konfirmimi për “Sportin shqiptar” ka ardhur nga vetë sekretari i Flamurtarit, Geri Çipi, i cili ka bërë me dije se Flamurtari do të qëndrojë në heshtje deri në përfundim të ndeshjes me Besën, këtë javë në Kavajë.

“Duke parë situatën e krijuar në prag të ndeshjes me Tiranën, një javë më parë, me deklaratat dhe antideklaratat, kemi vendosur që, për të shmangur problematika të tilla, të pranojmë heshtjen e shtypit. Por një vendim lidhet edhe për të mos vënë dorën në plagë për ato çfarë ndodhën pak kohë më parë me ekipin e Besës, ekip të cilin ne gjithsesi e konsiderojmë dhe e vlerësojmë maksimalisht.

Na duhet të sqarojmë se ekipi vlonjat nuk është përfshirë dhe do të vijojë ta bëjë një gjë të tillë për çdo situatë që mund të krijohet. Mendojmë gjithashtu se ndoshta kjo heshtje shtypi do ta ndihmojë ekipin dhe vetë stafin teknik të punojnë të qetë për ndeshjen e radhës në Kavajë, përballë Besës, ndeshje të cilën ne e konsiderojmë si mjaft të vështirë, por natyrisht edhe shumë të rëndësishme.

Heshtja e shtypit është një vendim i marrë nga vetë klubi, por kjo nuk do të thotë që jemi kundër shtypit, përkundrazi, e vlerësojmë atë për kontributin në sport. Ekipi është totalisht i përqendruar te ndeshja përballë Besës, aty ku edhe ne duhet të kërkojmë më të mirën e mundshme.

Me heshtjen për shtyp kërkojmë të evitojmë çdo problematikë të mundshme që mund të krijohet në prag të takimit dhe që natyrisht nuk dëshirojmë t’i kthehemi situatës së krijuar pak kohë më parë, para ndeshjes me Tiranën,” ka përfunduar sekretari i Flamurtarit, Geri Çipi, që ndoshta ka dhënë deklarimin e fundit mga kampi kuqezi deri në përfundim të ndeshjes përballë Besës.

SportiShqiptar

Mbrojtësi ka lënë prapa një vit “plot ters”: Nuk firmosa me Sëlltikun dhe u dëmtova dy herë kur më thirri Kuzhe

Në analizën që i bënë vitit kaluar mbrojtësi vlonjat Franc Veliu shprehet se jo gjithçka ka ecur sipas objektivave të tij. Fitimi i Kupës me Flamurtarin dhe afrimi në ekipin kombëtar, nuk e ka kënaqur fort djaloshin ambicioz. Ajo që e mërzit më shumë këtë futbollist, ka bëjë me faktin se vitin e kaluar është mbyllur në mënyrën më zhgënjyese në paraqitjen që ka bërë Flamurtari. Por Veliu është optimist për të ardhmen, kur thotë: “2010-ta do të jetë viti im “.

- Veliu, ka kaluar dëmtimi që keni pësuar ?

- Ka disa ditë që jam bashkuar në stërvitje me skuadrën dhe ndihem shumë mirë. Por duke u rikthyer tek dëmtimi i pësuar ju them se ishte një nga ato “dhurata” jo të mira për mua që më dha viti i kaluar.

- Pse e vlerësoni të pasuksesshëm?

- Nuk mund të them se ishte për mua i gjithë viti kështu. Janë dy momente kulmore të cilat në planin personal më kanë sjellë gëzim të jashtëzakonshëm, siç është fitimi i Kupës me Flamurtarin dhe pjesëmarrja ime në radhët e ekipit kombëtar. Por, nuk mund të harroj atë që në dy raste jam dëmtuar dhe nuk i jam përgjigjur ftesës të trajnerit Kuzhe, si dhe nuk mund të ndihem mirë për atë që Flamurtari e mbylli vitin e kaluar në pozitë jo të mirë në klasifikim.