Turizmi: KRT e komunës miraton projektin për ndërtimin e një qyteti turistik bregdetar në komunën e Qendrës.Një kompani amerikano-shqiptare ka hedhur një hap të guximshëm duke blerë një sipërfaqe të madhe toke pranë detit Jon për të ngritur fshatra turistikë. Para disa ditësh, Këshilli i Rregullimit të Territorit, i komunës Qendër, në Vlorë, miratoi detyrën e projektimit për ndërtimin e këtij qyteti turistik bregdetar, në afërsi të fshatit Nartë, pak kilometra në veriperëndim të qytetit të Vlorës. Projekti, që është në proçes, nga kompania amerikano-shqiptare “Vista Group”, parashikon ndërtimin e një qyteti në një sipërfaqe të përgjithshme prej 315 hektarësh, në të cilin përfshihen zona rezidenciale me vila, apartamente banimi, komplekse shërbimesh, hotele me 4 dhe 5 yje etj.

Shefi i urbanistikës i komunës Qendër, Edi Beqiri, ka deklaruar për median zyrtare se këto do të jenë të gërshetuara me elementë të tjerë, ku veçohen ndërtimi i rrugëve ujore të komunikimit, një port jahtesh me kapacitet 800-1000 mjete të tilla lundruese, një fushë golfi e standarteve ndërkombëtare, parqe të gjelbra dhe ishuj ujorë, që do të ndikojnë në përmirësimin e parametrave ekologjikë të zonës. Qyteza do të ketë dy hyrje-dalje, që do të lidhen me autostradën, që është në proces ndërtimi. Në studimin përkatës, tërheq vëmendjen objekti kryesor i këtij qyteti turistik, që do të jetë qendra e biznesit, që, në vetvete, nga pikpamja arkitekturore, është një arritje e shkencës bashkëkohore, në këtë fushë. Dy komunikimet me detin dhe vetë lagunën e Nartës, do të realizohen përmes dy kanaleve të mëdhenj, të cilët do të përmirësojnë raportin e këmbimit të ujrave, florën dhe faunën etj., Beqiri, thotë se, projekti synon konkretizimin e një qyteti ujor, një “Venecia moderne.” Studimi përkatës, është hartuar nga një grup specialistësh mjedisorë, navalë, arkitektë, amerikanë, spanjollë e shqiptarë. Ky studim, do të kalojë në nivele më të larta vendimmarrjeje, në KRRT-në e Qarkut dhe KRRTRSH. Në mbledhjen e KRRT-së së komunës Qendër, u kërkua që, të plotësohet detyra e projektimit me zgjidhjen e problemeve mjedisore, lidhjen e infrastrukturës së këtij studimi me atë ekzistuese të fshatit Nartë. Ndërsa përfaqësuesi i “Vista Group” për Vlorën, ing. Petrit Dervishi, tha për gazetën “Telegraf” se kompania që përfaqëson synon projektimin e një qyteti turistik në përputhje me të gjitha parametrat e miratuara nga BE në këtë fushë. Sipas tij, “Vista Group”, është një kompani e njohur amerikane, e cila operon në fushën e ndërtimit, në partneritet me investitorë spanjollë e shqiptarë. Prej tre vjetësh, kjo kompani operon në Shqipëri, në konkretizimin e një projekti për ndërtimin e një grupi prej 50 vilash në Farkë (Tiranë), ndërkohë që, në Vlorë, vjen me një projekt që ka një kosto financiare prej 1.5 miliard euro dhe që, do të kërkojë një periudhë zbatimi disa vjeçare.

Foto dhe artikulli janë marrë nga Gazeta Telegraf