Trajneri i Flamurtarit kroati Slavko Kovaçiç, i ulur në lokalin e tij të preferuar pranë stadiumit duke gjerbur Kapuccino dhe duke ndezur cigare ka punuar dje paradite, në lokalin e tij të preferuar, mbi modulin e ndeshjes kundër Lushnjes. Bashkëshortja Branka, që në çdo rast gjatë kohës së lirë i bën shoqëri bashkëshortit të saj qëndron vetëm si një “spektatore” e thjeshtë duke dashur të mos e bezdisë në asnjë moment. Në fletët e hapura në tavolinë e kohës dallohet qartë shënimet e hedhura për rreshtimin taktik të ekipit të Lushnjës. Kova pranon të shpjegojë: “Lushnja është një skuadër e njohur pak nga specialistët, sepse është debutuese në kategorinë superiore. Por unë kam më shumë se një javë që e kam siguruar informacionin e duhur për kundërshtarin e radhës”, janë fjalët e para të tij.

Ai shton: “I kam studiuar disa herë me kujdes të gjithë futbollistët e skuadrës kundërshtare dhe më duket se diçka nuk më shkon diku për ekipin tim. Dihet që dhe në këtë ndeshje do të vendos skuadrën me katër mbrojtës në prapavijë por më prish punë mungesa e Begajt. Po mendoj Arifajn në këtë rol sepse ai ka aftësi mbrojtëse të mira por dhe Veliu nuk është keq. Është energjik dhe ndihmon mesfushën. Lushnjarët do të kërkojnë të sulmojnë gjatë gjithë ndeshjes dhe në këtë repart duhet më shumë kujdes. Sisoko duhet mbuluar mirë…”. Por mendimi i Kovaçiçit lëviz dhe për zgjedhjet që duhet të bëjë për mesfushën dhe vijën e parë të sulmit. Mungesat e shumta në këto dy reparte e bëjnë më të ndjeshëm shqetësimin e tij. “Që është ndeshje e vështirë nuk diskutohet. Por dhe atë që Flamurtari do të japë maksimumin e vlerave të tij më të mira as që e vë ndonjëherë në dyshim. Unë e kam një sekret për këtë ndeshje, disa herë e kam provuar variantin që kam sekret gjatë seancave të stërvitjes dhe kam konstatuar se janë të gjitha shanset që t’ja dalim mbanë përballë Lushnjës. Kaq mund të them për momentin. Të tjerat do ti shohim realisht në fushën e lojës”, ka mbyllur rrëfimin e tij Kova. Thithjen e plotë të dëshirës të cigares së tij, duket se i ka thënë të gjitha që duhen por jo atë që e quan sekretin e tij për këtë ndeshje .
Lushnja mban frymën:“Tani duhen tri pikë”

Dje pasdite skuadra verdhejeshile ka përfunduar përgatitjet në kuadrin e ndeshjes me Flamurtarin. Pas përfundimit të seancës së fundit stërvitore skuadra e teknikut Malko është rigumbulluar në stadiumin “Roza Haxhiu”, për t’u nisur drejt plazhit të Divjakës. Ka mjaftuar një udhëtim i shkurtër që verdhëjeshilët të mbërrijnë dhe të sistemohen në hotel “Argena”, që është rezidenca e verdhëjeshilëve, në të gjitha rastet kur skuadra luan takime të karakterit deçiziv. Mbrëmja në “Argena” ka qënë shumë e qetë për futbollistët e Lushnjës, të cilët janë të përqëndruar totalisht në përballjen me kuqezinjtë vlonjatë. Mendimi i përgjithshëm te verdhëjeshilët është se skuadrës i ka ardhur koha për të bërë shumë më tepër, si dhe momenti për të fituar. Kapiteni i Lushnjës Gentian Çela në formë konfidenciale ka konfirmuar gatishmërinë e tij për ndeshjen, pasi ka kaluar një dëmtim disa ditor. Ndërsa veterani Elezi vijon të jetë i dëmtuar. Pjesa tjetër e skuadrës është pa probleme, pasi tek verdhëjeshilët nuk ka asnjë të skualifikuar. Atmosfera në Lushnjën sportive vijon të jetë elektrizuese. Pritet të mblidhet një publik i gjerë, për të mbështeur skuadrën, me shpresën e shijimit të golit dhe pikëve të para të këtij edicioni. “Futbolli është vetë jeta e Lushnjës. Si në çdo ndeshje ne do të shkojmë në stadium, për të mbështetur skuadrën dhe këtë herë thmi se do të fitojmë”, u shpreh kryetifozi Stavri Tesho. Futbollistët lushnjarë thanë për “Sport Ekspres” se e kanë të ndaluar të flasin për shtypin, përfshi edhe median lokale, por, privatisht lushnjarët shtuan se do të japin maksimumin e mundshëm për të arritur suksesin. Ata folën për mundësinë reale të fitores duke pretenduar se e njohin forcën e tyre dhe atë të kundështarit.

Sport Ekspres