Në ditën e dytë dhe të tretë të kësaj jave skuadra e Flamurtarit ka organizuar ndeshje kontrolli brenda grupit. Për arsye të mungesave të karakterit objektiv, trajneri Agim Canaj ka qenë i detyruar të rreshtojë në fushë si formacion të parë Dinen, Sakajn, Drizën, Beharin, Arifajn, Bokatolan, Kuqin, Gunën, Roxherin, Nenajn dhe Xhafën. Për arsye shëndetësore, në përbërje të formacionit konstatohet mungesa e mbrojtësit Halim Begaj. Në ndeshjet miqësore të zhvilluara më parë në repartin e sulmit, krahas F.Xhafës, trajneri Canaj ka provuar A.Paçon. Për arsye dëmtimi në miqësoren ndaj Dinamos, Paço ka disa ditë që nuk është paraqitur në stërvitje. Në mungesë të një sulmuesi të dytë,

Nenaj është spostuar nga reparti i mesfushës në repartin e sulmit. Siç duket, në rast se Flamurtari nuk do të afrojë përforcime të tjera, ky është formacioni paraprak për ndeshjen e parë të kampionatit ndaj Shkumbinit. Ndryshe nga provat në miqësore, te vlonjatët vihet re aktivizimi i tiranasit Besmir Arifaj në rolin e mbrojtësit të krahut të majtë. Besimin e ka krijuar trajneri Canaj tek ish-lojtari i kombëtares së 19-vjeçarëve dhe e vlerëson si një shans për t'u afirmuar te Flamurtari. Sipas Arifajt, Flamurtari është një skuadër cilësore, nga e cila po përfiton çdo ditë në rritjen e aftësive profesionale. "Jam 20 vjeç dhe me duhet të stërvitem intensivisht për të përfituar nga kualitetet dhe eksperienca e lojtarëve që ka Flamurtari. Jam aktivizuar te Partizani me pjesë kohe kur ishte trajner Sulejman Mema dhe më tej në formacionin bazë te Turbina e Cërrikut. Tani që kam ardhur te Flamurtari, po gjej bashkëpunimin dhe respektin e ndërsjelltë me stafin teknik të skuadrës dhe me trajnerin Agim Canaj. Nisur nga shansi që më është dhënë, u premtoj edhe sportdashësve vlonjat se do ta justifikoj vlerësimin e tyre maksimalisht. Në skuadrën e Flamurtarit kam ardhur si lojtar i lirë dhe jo i huazuar. Ky fakt më bën të ndihem vlonjat. Jam i kënaqur se në skuadër kam gjetur shumë moshatarë, me të cilët jam aktivizuar në kombëtaren U 19, me trajner Edmond Liçajn. Me të gjithë lojtarët merremi vesh shumë mirë, si në lojë, edhe jashtë saj. Flamurtari sivjet do të paraqesë në kampionat një skuadër të fortë fizikisht, por edhe me një lëvizshmëri të admirueshme në zbatimin e detyrave taktike në lojë. Sipas mendimit tim, mungesën e një sulmuesi tjetër në skuadër po e vuajmë shumë, pasi monopolin e sulmuesve të pikasur e ka krijuar Tirana. Gjithsesi, Flamurtari aplikon mjaft mirë lojën në grup, prandaj një mangësi e tillë nuk përbën problem për skuadrën," - shprehet Arifaj. Për sa i përket parashikimit të ndeshjes së parë ndaj Shkumbinit, Arifaj nuk jep një përgjigje të plotë, por mendimet e tij synojnë më larg. "Ndaj Shkumbinit do të luajmë më mirë se ndeshjet miqësore që zhvilluam në Elbasan, por edhe në Tiranë ndaj Dinamos. Unë mendoj se, pas 3 4 ndeshjeve të para, do të japim një mendim të saktë se cili do të jetë objektivi i vërtetë i Flamurtarit për këtë sezon," - përfundon 20-vjeçari i Flamurtarit, Besmir Arifaj.

Sportishqiptar