Sulmuesi shkodran shënon në minutën e dytë shtesë për barazimin 1-1

Flamurtari, përsëri "surprizë"

Sukaj shpëton nderin e Vllaznisë

Flamurtari ka arritur të shlyejë gabimin e tri ditëve më parë, kur barazoi me Besëlidhjen "në shtëpi", duke marrë një pikë shumë të vlefshme në transfertë kundër Vllaznisë. Ndonëse pritej që ekipi shkodran të siguronte një fitore në këtë sfidë, gjërat nuk kanë shkuar sipas parashikimeve për skuadrën e drejtuar nga Mirel Josa. Kjo, për faktin se vlonjatët kishin gjetur taktikën e duhur për të përballuar kuqeblutë, duke u bazuar te mbrojtja e fuqishme dhe kundërsulmi i shpejtë. Me neutralizimin e Sinanit, forca ofensive e Vllaznisë nuk ka qenë në nivelin e kërkuar dhe këtë e kanë vërtetuar më së miri Teli dhe Osja, që nuk kanë arritur ta kalojnë portierin e ri Moçka në fillimin e pjesës së parë. Pjesa e parë mbyllet me disa raste të shkodranëve, por pa u konkretizuar dhe si rrjedhojë, skuadrat shkojnë në pushimin e ndeshjes në barazim pa gola. Por, me rifillimin e ndeshjes është Flamurtari që godet në kundërsulm. Në minutën e 54-t është braziliani Flavio Zhunior ai që krijon panik në mbrojtjen kuqeblu dhe pasi

depërton në zonë gjuan duke mposhtur Grimën. Reagimi i shkodranëve vonon, pasi kuqeblutë kanë vështirësi në krijimin e manovrës, të gjetur të papërgatitur nga goli i vlonjatëve. Gjithsesi, për t‘u lehtësuar punën shkodranëve mendon vetë autori i golit, Flavio Zhunior, i cili ndëshkohet me karton të kuq në minutën e 67-të, duke lënë skuadrën e tij me një futbollist më pak në fushë. Portieri Moçka bëhet përsëri protagonist kryesor, duke mbrojtur portën e tij nga gjuajtjet e shpeshta të shkodranëve, si ajo e minutës së 77-të të Kaçit, të cilin portieri vlonjat e devijon në goditje këndi. Minutat kalojnë dhe Vllaznia e ka të vështirë të gjejë golin, por për të shpëtuar skuadrën nga "turpi" i një humbjeje mendon i riu Xhevahir Sukaj. Në minutën e 92-të, pas zhvillimit të një goditjeje nga këndi, ai gjendet në vendin e duhur, duke shtyrë topin në rrjetë dhe duke arritur që të sigurojë të paktën një pikë për skuadrën e tij.

Marre nga gazeta <Shqip>