Trajneri, i kënaqur nga miqësorja, premton shkëndija në kampionat: “Kur këmbët të lirohen plotësisht, do të shihni gjëra të bukura nga kjo skuadër” Në ndeshjen miqësore kundër Apolonisë të gjithë panë në fushë një Flamurtar që të zbavit dhe kënaq me lojë dhe rezultat. Por, për trajnerin Muça kjo nuk është gjithçka.

Skuadrës i duhet edhe pak kohë që të lehtësohet nga këmbët e rënduara dhe të harmonizohet si duhet me veprimet në fushë, ndaj ai thotë: “Prisni dhe pak të shihni Flamurtarin tim”.

- Muça, të gjithë “inatin” Flamurtari e kishte lënë për miqësoren e fundit?

- Për mua është thjesht një fitore dhe nuk e marr në konsideratë si bazën e fillimit të sezonit. Më shumë se kaq, kam konstatuar se djemtë janë dukur mirë fizikisht dhe teknikisht, ndaj dhe parapëlqej të ndalem te paraqitja sesa rezultati.

- Dhe cilat janë veçoritë e konstatuara?

- Së pari, që ekipi paraqiti një gjendje të mirë fizike dhe kjo u pasqyrua në fushën e lojës. Më duket se këmbët e rënduara të futbollistëve kanë filluar të lirohen diçka nga ngarkesa që kanë marrë gjatë përgatitjeve. Edhe kombinimi taktik si skuadrër ishte më mirë se në ndeshjet e kaluara. Gjithsesi të gjithëve më duhet t’iu them: “Prisni dhe pak të shikoni Flamurtarin tim”.

-Që më konkretisht, do të thotë se…

- Na duhet ende edhe pak punë për t’u ratifikuar dhe kolauduar edhe më mirë si skuadër dhe pastaj do të shikojmë prezantimin që i kërkohet Flamurtarit.

-Të kthehemi përsëri tek ndeshja. Duket se keni zgjedhur për të luajtur me skemën 4-4-2. A do të shihet shpesh në kampionat?

- Me lojtarët që kam në dispozicion mendoj se kjo skemë më duket më e përshtashme për të vendosur lojtarët në fushën e lojës. Por gjithçka nuk do të jetë fikse dhe rëndësi ka fakti që Flamurtari sezonin e ardhshëm do të jetë një skuadër që luan për të fituar në çdo ndeshje, si brenda dhe jashtë fushës së saj.

-Me dy gola të shënuar dhe nje paraqitje të mirë, duket se është kthyer Memelli që të gjithë njohim, pra “bomberi shpërthyes”!

- Më vjen mirë që është rritur dhe po tregon se ka bërë një punë shumë serioze gjatë përgatitjeve tona. Edhe vetë Memelli e di se duhet ende punë për të arritur në maksimumin e tij.Duke dalë pak jashtë pyetjes, më duhet të them se ndryshimin e duhur po e konstatoj tek të gjithë futbollistët që kam në dispozicion.

- Kroati Bratiç duket një përforcim shumë i goditur nga merkato

- Unë i njoh mirë vlerat dhe karakteristikat e këtij futbollisti. Ai shquhet si një futbollist që sakrifikon shumë për skuadrën. Të gjithë e panë që pjesën e parë luajti si mbrojtës i majtë dhe pastaj në qendër të mesfushës diku përpara mbrojtjes, ku dalin më mirë në pah vlerat e tij. Nuk është e tepërt, të them se jam duke pritur edhe më shumë nga ai dhe gjithë të tjerët.

-Për shumë minuta të pjesës së dytë, Veliu ka dalë si mbrojtës i majtë, një rol të cilin e ka provuar edhe në Kombëtare.

- Aty ka luajtur më parë Franci dhe për atë rol i duhet ekipit Kombëtar. Me cilësitë që ka, nuk është ndonjë çudi që në momentet që do t’i duhet skuadrës do të luajë edhe si mbrojtës i majtë. Në ekipin që do të prezantojë së shpjeti të gjithë futbollistët në skuadrën time duhet të bëjnë mirë më shumë se dy role në fushën e lojës.

- Jeni duke pritur mbrojtësin tiranas, Ervis Sina. Ndonjë zhvillim?

- Patjetër që po, jo vetëm unë, por edhe drejtuesit e klubit dhe tifozët vlonjatë. Ai është një futbollist që na duhet në skuadër ndaj presim që gjithçka të përfundojë sa më shpejt dhe pozitivisht që Sina të ketë kohën e duhur për t’u përshtatur me skuadrën tonë që për ndeshjen e parë të kampionatit.

Intervistoi:

MOISI DALIPI

sportekspres