- Jam shumë pranë asaj forme që më duhet për të përballuar me sukses sezonin e ri. Kam plot dy javë që jam përqendruar në një stërvitje shumë intensive dhe besoj shumë se edhe këto ditët që na kanë mbetur deri në fillimin e kampionatit do të kem mundësi për të marrë formën maksimale.

- Shpesh ju kanë shoqëruar dhe dëmtime…

- Gjëra të vogla, më shumë kanë qenë kontraktime që kanë ardhur nga ngarkesa e marrë gjatë ditëve stërvitore. Kanë kaluar pa problem dhe uroj të vazhdoj kështu siç jam sot deri të ditën që të fillojë sezoni i ri futbollistik.

- Duket sikur ju ka munguar goli në këto ndeshje miqësore

- Në fakt nuk kam shënuar aq sa të kënaq dëshirat e tifozëve, kjo për arsye se nuk i kam luajtur të gjitha ndeshjet miqësore. Por ka dhe një arsye tjetër që më justifikon diçka në këtë rast, që ka të bëjë më shumë me eksperimentimin e skemave që janë zbatuar në këto ndeshje.

- Çfarë do të thotë kjo?

- Më shumë rëndësi dhe vëmendje i është kushtuar zbatimit të skemave të dhëna nga trajneri sesa mundësisë për shënuar gola në portën kundërshtare. Megjithatë ka vend edhe për të thënë se duhej bërë më shumë nga skuadra jonë.

- Sa ju përshtatet lojës tuaj vendosja që i bën skuadrës trajneri Muça?

- E kamë thënë dhe herë tjetër, kur luhet vetëm me mua si sulmues të deklaruar në vijën e parë nuk ndihem aq mirë, sepse më vonohet pasi i fundit, që më shërben shumë për të gjetur golin. Tani që kemi filluar të luajmë me skemën 4-4-2 gjërat më duken më shumë pozitive, sepse jam më afër portës.

- Presidenti Gjika nuk ka qenë shumë i kënaqur nga paraqitja e skuadrës. Përse mund të ketë ndodhur?

- Humbja ndaj Tiranës ka lënë shije jo të mirë. Nuk dua të justifikoj asgjë, por në atë ndeshje kemi shkuar në kulmin e ditëve të stërvitjes intensive. Këmbët i kemi pasur shumë të rënduara dhe nuk bëmë ndeshje të mirë. Pak më ndryshe ishim me Luftëtarin, por dhe më mirë shpresojmë të jemi nesër ndaj Apolonisë.

- Si jeni duke e pritur fillimin e sezonit të ri?

- Si çdo sportist edhe unë kam dëshirat dhe motivimin tim për të bërë më të mirën për Flamurtarin. Me 14 golat që shënova në 17 ndeshjet që zhvillova me këtë fanelë në pjesën e dytë të sezonit 2009-2010, kanë ruajtur në kujtesën e çdo vlonjati diçka të mirë të bërë nga Memelli për këtë skuadër. Por kam akoma për të thënë në sezonin e ri që do të fillojë së shpejti.

- Po shpallni kështu objektivin tuaj për sezonin e ri?

- Le të kuptohet edhe kështu. Së pari, do të kërkoj t’i shërbej në maksimum Flamurtarit që të fitojë me çdo kusht trofe. Gjatë gjithë sezonit që pritet të fillojë ka shumë ndeshje kampionati dhe Kupe saqë më mjaftojnë të them se shikoni numrin 25 që kam në fanelë dhe po aq gola do të kërkoj të shënoj!

32

vjeç është sulmuesi Migen Memelli, i cili është rikthyer të luajë për Flamurtarin në Kampionatin Shqiptar

17

gola shënoi sulmuesi gjysmën e dytë të sezonin 2009-2010 me fanelën kuqezi të Flamurtarit

............................

Soza dhe Vukçeviç nuk përfundojnë stërvitjen

Dy mesfushorët e skuadrës së Flamurtarit, argjentinasi Soza dhe malazezi Vukçeviç kanë pasur një kontraktim gjatë stërvitjes së djeshme dhe nuk e kanë përfunduar dot seancën deri në fund. Ata janë shikuar menjëherë nga doktori i skuadrës, i cili nuk ka dhënë alarmin për lojtarët. Është thjesht një kontraktim për shkak të ngarkesës dhe të dy futbollistët nuk e rrezikojnë aspak javën e parë të kampionatit. Ata do të zhvillojnë këtë fundjavë seanca të forta terapie dhe ditën e hënë pritet të rikthehen përsëri me grupin. Gjithsesi është për t’u parë se si do të shkojë terapia e tyre. M.D

Lojtari mund të zbresë sot pasdite në stërvitje me kuqezinjtë. Ndërkohë ka diskutime në klub në lidhje mbrojtësin, pasi Tagani e Tafaj ia kërkojnë teknikut me shkrimin miratimin për ta lënë të lirë. Përpos kësaj dje ekipi në ndeshjen stërvitore ndaj të rinjve ishte në gjendje dhe humor të shkëlqyer

“Kërkon largimin, çfarë do të bëjmë?!”. Tafaj dhe Tagani dje pasdite janë takuar me trajnerin Julian Rubio, në prag të një ndeshjeje stërvitore kundër skuadrës U-19. “Të ikë që tani, nuk kemi nevojë për të!”, thotë Rubio me një spanjishte shumë artikuluese, e cila kuptohet qartë edhe nga dyshja drejtuese që nuk di edhe aq mirë spanjisht. Në mungesë të përkthyesit, dje, komunikimi mes palëve nuk ka qenë i thjeshtë. “Ok, prit këtu!” Alban Tafaj, si drejtor teknik brenda klubit shkon dhe printon një letër A4 me firmë dhe me vulë të klubit ku shkruan që trajneri është OK që lojtari të largohet nga skuadra, sepse nuk dëshiron më të luajë për bardheblutë por pretendon ta bëjë një gjë të tillë për sezonin e ardhshëm me Flamurtarin. “Jo, unë këtë nuk e firmos, nëse ju nuk i merrni paratë e kartonit”, thotë Rubio. Në këtë moment drejtuesit i sqarojnë trajnerit që ai nuk merret me çështje administrative, por vetëm me gjëra teknike. “Nëse ti nuk do dhe e dëshiron lojtarin në grup ai nuk largohet – i thotë Tafaj – në të kundërt le të ikë”. Rubio pasi mendohet jep verdiktin final: “Le të ikë!”.

Elvis Sina sipas të gjitha gjasave do të nënshkruajë sot kontratën me Flamurtarin dhe sezonin e ardhshëm do të luajë me kuqezinjtë. Trajneri Muça e ka kërkuar me ngulm që në fillim të verës dhe tanimë do e ketë nën urdhrat e tij.

Ironia e fatit ndonjëherë e përfshin lojtarin në situata të papërcaktuara. Përshembull Sina kish së paku dy muaj pa kontratë dhe patjetër që ndoshta nuk i vinte mirë që klubi bënte tratativa me të tjerë në rolin e tij – kujto Fagun dhe Kamberoviç – dhe pavarësisht se klubi fliste për dublime ndoshta kuptonte që stafi dhe Rubio nuk kishin më besim të verbër te ai. Nënshkrimi i vonuar i kontratës dhe shuma jo e majme ishin gjithashtu një arsye plus për të mos u ndjerë mirë. Dhe pikërisht kur kish firmosur që të luante me bardheblutë dhe për një vit, vlonjatët i ofruan një shumë dy herë më të lartë dhe një vend titullari fiks. Sina i peshoi të gjitha dhe në fund vendosi të shkonte në Vlorë. Drejtuesit e Tiranës për hir të së vërtetës insistuan që ai të qëndronte, duke e konsideruar pjesë të familjes, por tundimi i Sinës për të provuar forcat tjetërkund ishte i madh. I vetmi që kish në dorë ta mbante Sinën të bllokuar qoftë dhe jashtë dëshirës ishte Rubio. Nëse ai nuk do jepte OK për largimin e mbrojtësit, atëherë Sina do të qëndronte dhe do të respektonte kontratën. Po a mund të mbash dikë që dëshiron të ikë?!

2

herë

ka luajtur Sina me një skuadër tjetër përveç Tiranës. Ai ka luajtur në Elbasan dhe me Dinamon, por në të dyja rastet është rikthyer si bardheblu

20

trofe ka fituar Sina me skuadrën bardheblu. Ai është sot për sot lojtari që ka fituar më shumë trofe në kampionatin shqiptar. Ai ka fituar 6 herë kampionatin, 7 herë Kupën e Shqipërisë dhe 7 herë Superkupën

Sot bordi, mbledhje për merkaton dhe raportin me trajnerin

… por Rubio nuk rrezikon! Në mbledhje do të diskutohet dhe mbi raportin e administratës me trajnerin, që është përfshirë nga një “duel i ftohtë”. Nuk rrezikohet qënia e Rubios në stol, pasi kontrata nga ana e klubit tanimë është firmosur. Por kujdes, shumica e anëtarëve janë me pushime!

Bordi Drejtues i Tiranës ka planifikuar të mblidhet sot për të diskutuar problematikën e fund verës, raportet me trajnerin dhe gjithashtu dhe merkaton e minutës së fundit që mund të realizojë Tirana. Për hir të së vërtetës, këtë takim e ka kërkuar dyshja Tagani-Tafaji, të cilët pasi nuk po bien në një mendje për shumë gjëra me trajnerin dhe duan të diskutojnë për këto çështje me bordin, i cili është i përbërë dhe nga individë të fushës së lojës. Duket se Rubio nuk rrezikon qëndrimin te Tirana pasi, në fund të fundit, Tirana e ka firmosur kontratën dhe vetëm nëse dëshiron vetë spanjolli të largohet. Ky i fundit nuk ka ndërmend ta bëjë një gjë të tillë në fundin e merkatos, pasi ndërkohë dhe oferta të tjera me një shumë më të madhe sesa Tirana në dispozicion nuk ka pasur. Ndërkohë imediate është ndërhyrja në merkato pasi skuadra ka ende nevojë për përforcime.

Abilaliaj, ende pa “karton”

Nuk duket të rrezikojë megjithatë sot është afati i fundit. Arbër Abialiaj nuk është më nën kontratë me Inter Zapresiç dhe ka firmosur me Tiranën, por kartoni i tij është ende në Federatën Kroate dhe klubi po bën të gjitha përpjekjet për ta transferuar atë në Shqipëri.

Pashaji s’është në 100%

Entonio Pashaji ende nuk është në 100% dhe vetëm 24 orë përpara Superkupës do të vendoset nëse do të luajë apo jo në këtë sfidë. Ai ka një dëmtim që zgjat prej ditësh dhe për momentin nuk është në formë të plotë.

Hoxha donte

2000 euro në muaj

Klubi i ofron 15 mijë euro në vit; lojtari do të mendohet

Sulmuesi i ri që vjen nga Italia, Fabio Hoxha, nuk dihet ende nëse do të jetë pjesë e Tiranës në të ardhmen. Duke qenë në moshë të re, Tirana i froi 15 mijë euro në vit, ndërsa lojtari dëshironte 20 mijë euro në vit. Për momentin lojtari është duke u menduar nëse do ta firmosë apo jo kontratën e ofruar.

Gola, batuta dhe shumë alegri, Tirana është në formë

Dje një miqësore e paralajmëruar kundër U-19. Trajneri provon disa piketa të formacionit bazë. Çota dhe Abilaliaj bashkë kombinojnë shumë mirë. Tafaji: “Ftojmë tifozët, do ngremë Superkupën”

Tirana ka zhvilluar dje një ndeshje stërvitore me skuadrën e të rinjve, një sfidë e cila është interpretuar pothuajse perfekt nga ana e të besuarve të Rubios, që vetëm tri ditë përpara Superkupës kanë treguar një formë shumë të mirë dhe shpresëdhënëse për tifozët. Në prag të takimit me Skënderbeun trajneri ka bërë disa prova, të cilat i kanë dhënë përgjigje pozitive. Çota sidomos, duket se ka bashkëpunuar shumë mirë me Abilaliajn dhe ky i fundit i ka shërbyer në mënyrë perfekte të paktën tre herë me destinacion goli ish-sulmuesit të Teutës. Trajneri ka bërë ndërkohë disa eksperimente në krahun e djathtë të mbrojtjes, pasi aty nuk ka ende një lojtar stabël pas largimit të deklaruar të Sinës.