“Nuk do të ketë lojtarë stoli te Flamurtari ata që janë pjesë e jona ose mund të bëhen tani afër, duhet të na garantojnë se mund të luajnë që nga minuta e parë”. Kjo është deklarata e trajnerit të Flamurtarit, Shkëlqim Muça. Në një intervistë për “Panorama Sport”, kreu i pankinës kuqezi ka treguar për merkaton dhe situatën në ekip, 10 ditë para fillimit të sezonit të ri. Deri në prag të startit me Bylisin, trajneri la gjithçka të hapur për përforcimet.

Z.Muça, si e vlerësoni gjendjen e ekipit 10 ditë para startit?

Për kohën e mbetur në dispozicion duhet të rregullojmë disa gjëra, të cilat kanë të bëjnë me problemet fizike. Riparimi sa më shpejt i këtyre problemeve na bën që të vazhdojmë punën normalisht me lojtarët.

A keni një ide fikse për formacionin më të mirë?

Ekipi ky është, dhe të gjithë e kanë parë si në stërvitje, ashtu edhe në ndeshjet miqësore. Do të shikojmë deri pas një jave se cilët do të jenë lojtarët më në formë. Unë do të mundohem të mos ndërroj futbollistët, që do të na garantojnë rezultatin pozitiv.

Në ekip janë 6 lojtarë të huaj, ndërkohë që në fushë lejohen vetëm 5. A ndiheni në vështirësi për përzgjedhjen?

Mendoj se nuk ka vështirësi për të bërë zgjedhje te Flamurtari. Në formacion do të luajnë ata që kanë kondicionin e duhur për të përballuar një ndeshje.

E keni deklaruar se mbrojtja është problem për ju dhe se kërkoni përforcime. Në çfarë faze jeni?

Me këto ndeshje është parë që kemi deficite në repartin e mbrojtjes. Për emra konkretë po diskutojmë me drejtuesit e klubit, të shikojmë se çfarë mund të blejmë. Do të ketë edhe role të dubluara për të bërë ndërrimet përkatëse, kur mungojnë lojtarët.

Mund të na zbuloni ndonjë emër?

Do të shikojmë deri në fund të muajit. Emra nuk mund të deklaroj tani, por ta keni të qartë se nuk do të marrim lojtarë sa për të plotësuar organikën. Pra me pak fjalë, do të afrohen futbollistë që të luajnë në çdo kohë me Flamurtarin, që nga minuta e parë.

Ju si trajner keni pasur edhe kontestime nga tifozët. Çfarë u premtoni atyre?

Tifozët kanë të drejtë, sepse ata presin maksimumin. Ne duhet t’i kthejmë fansat në anën tonë, duke marrë rezultate pozitive. I dimë detyrat tona fare mirë, sidomos unë si trajner. Ky është sezoni që ne duhet të synojmë titullin. Unë u them tifozëve që do të bëjmë gjithmonë maksimumin për ta arritur këtë. Por, ata duhet të kenë pak durim, pasi edhe lojtarët cilësorë që janë afruar te Flamurtari kanë ardhur në momentet e fundit. Ndoshta nuk do të garantoj që në fillim lojë të mirë dhe spektakël, por kjo nuk do të thotë që unë të mos garantoj fitoren në çdo ndeshje. Duhet që çdo takim ta mbyllim në favorin tonë. Ky do të jetë dhe objektivi ynë. Tifozët të na mbështesin dhe të kenë durim.

Po për kalendarin, çfarë mund të na thoni?

Kalendari është normal, ka ndeshje të alternuara. Objektivi ynë patjetër që mbetet kryesimi dhe në fund titulli kampion.

Pisha, një alternativë për mbrojtjen

Kur kanë mbetur edhe dy javë nga mbyllja zyrtare e merkatos së verës, drejtuesit e klubit të Flamurtarit kërkojnë të bëjnë edhe afrime të tjera, pikërisht në mbrojtje. Në fakt, ky repart në ndeshjet miqësore të zhvilluara deri më tani ka treguar se ka deficite, gjë që e ka konfirmuar edhe numri një i pankinës vlonjate, Shkëlqim Muça. E për këtë, drejtuesit e Flamurtarit janë vënë në lëvizje, por ende nuk japin emra konkretë. Mirëpo, në mjediset e klubit vlonjat përflitet emri i mbrojtësit të Tiranës, Arjan Pisha, si i mundshëm për të veshur fanellën e këtij ekipi për sezonin e ri futbollistik. Gjithsesi, në ditët në vazhdim do të zbardhet gjithçka sa i përket këtij afrimi. Në fakt, elbasanasi luan në qendër të mbrojtjes, në një kohë që trajneri Shkëlqim Muça më shumë ka kërkuar lojtarë nga krahët. Gjithsesi, ardhja e Pishës do të shtonte alternativat në këtë repart, duke rritur akoma edhe më shumë konkurrencën.

ERMAL SIKA

panorama-sport.