Shqipëri-Moldavi mund të mos luhet fare, ose të zhvillohet në një orar më pak të përshtatshëm, pasdite dhe jo në mbrëmje sikundër ishte parashikuar. Arsyeja qëndron te borxhet që, sipas kompanisë CEZ, i ka drejtoria e stadiumit “Qemal Stafa” kësaj të fundit. Në këtë mënyrë, CEZ-i ka vendosur të ndërpresë furnizimin me energji, pasi nuk është paguar energjia prej disa muajsh.

“Fundjavën e shkuar na lajmëruan se stadiumi ‘Qemal Stafa’ nuk do të ketë energji elektrike, për shkak të disa borxheve të vjetra që ndërmarrja shtetërore së cilës i përket akoma teorikisht ky impiant i ka kompanisë CEZ. Unë personalisht sapo u ktheva nga një takim që pata me një drejtues të lartë të kompanisë, i cili më konfirmoi se stadiumi nuk do të ketë drita. Realisht u çudita, pasi nuk arrij ta kuptoj sesi një kompani e regjistruar në Shqipëri ka kaq pak, ose aspak ndjesi publike, për një gjë që nuk na përket ne, por imazhit të Shqipërisë. Ndaj, i bie që të lajmërojmë FIFA-n dhe t’u kërkojmë moldavëve ndryshimin e orarit të ndeshjes. Shkaku? Nuk ka drita në stadium”, – ka pohuar dje para konferencës për shtyp të trajnerit të Kombëtares, sekretari i Përgjithshëm i FSHF-së, Eduard Prodani. Ky i fundit sqaron se nuk e ka idenë sesa është borxhi, por për më tepër nuk ka arsye që federata t’i paguajë borxhet e një ndërmarrjeje shtetërore, cilado qoftë kjo, të akumuluara në kohë nga vetë kjo e fundit. “Nuk e di sesa është borxhi dhe nuk në intereson. Unë si sekretar i federatës ia parashtrova zgjidhjen CEZ-it, duke konfirmuar se ne ishim gati të paguanim çdo shpenzim që tani e tutje, paçka se ende stadiumi nuk na ka kaluar tërësisht ne, për shkak të disa burokracive shkresore, por ne nuk mund të marrim përsipër borxhin që një kompani e mëparshme shtetërore, e cila ka pasur në administrim stadiumin, ka karshi një kompanie tjetër, siç është në rastin konkret CEZ-i. Kjo është e pakonceptueshme. Unë pashë një mungesë vullneti nga ana e drejtuesve të CEZ-it dhe, si qytetar, pyes që çfarë mund të ndodhë nëse një spital i ka borxh kësaj kompanie? Do t’i heqë dritat?”, – ka vazhduar Prodani. Ndërkohë ai konfirmon se një gjë e tillë mund të prishë imazhin e vendit karshi FIFA-s dhe madje eksiton mundësia që ndeshja të mos luhet fare. “Në të tilla kushte rrezikohet që ndeshja edhe të mos luhet fare. Ne do të lajmërojmë hë për hë FIFA-n, por pa drita është e pamundur zhvillimi i ndeshjes. Mund të sigurohet pa problem edhe një gjenerator por, gjithsesi, FIFA ka rregulla strikte dhe nuk të lejon nisjen AVI, e një ndeshjeje ndërkombëtare pa dy burime alternative”, – ka pohuar Prodani. Kujtojmë se stadiumi për momentin vazhdon të jetë nën administrimin e shtetit shqiptar. Edhe pse për ndërtimin e një impianti të ri u vendos që të krijohej një shoqëri aksionere, ku 75 përqidn i ka federata dhe 25 përqind i ka qeveria shqiptare, përsëri kjo gjë nuk ka përfunduar totalisht për shkak të disa burokracive. Vetëm në përfundim të kësaj problematike, do nisë shembja e stadiumit dhe ndërtimi i një impianti të ri dhe modern.

CEZ: Nëse nuk paguhet, nuk do të ketë energji

CEZ Shpërndarje, pas reagimeve të përfaqësuesve të Federatës Shqiptare të Futbollit, dëshiron të theksojë se ndërprerja e energjisë për dy kontratat që furnizojnë stadiumin “Qemal Stafa” është kryer për shkak të debisë qe ky institucion ka ndaj kompanisë së shpërndarjes së energjisë. Detyrimi që “Qendra Sportive” sh.a i ka “CEZ Shpërndarje” sh.a, përfshirë fatura të papaguara dhe kamatëvonesat përkatëse, shkon deri në 756,934.36 lekë. Këto janë fatura të papaguara përgjatë viteve 2008, 2010, 2011, 2012, për dy kontrata që furnizojnë stadiumin. Përfaqësues të CEZ, gjatë takimeve që kanë patur me shoqërinë menaxhuese dhe me përfaqësuesit e FSHFsë, u kanë ofruar skema lehtësuese pagese të dyja palëve. Pas këtyre takimeve që u zhvilluan javën e kaluar, ku janë pranuar edhe debitë përkatëse, nga shoqëria menaxhuese nuk ka patur asnje reagim tjetër. Të dyja kontratat të cilat furnizojnë stadiumin “Qemal Stafa” rezultojnë ende debitore ndaj kompanisë së shpërndarjes. CEZ Shpërndarje thekson se, derisa të shlyhet një pjesë e detyrimit, sipas skemave të ofruara nga përfaqësuesit e shitjeve të kompanisë, nuk do të ketë rilidhje të energjisë elektrike për stadiumin “Qemal Stafa”.

FIFA pritet të “djegë” stadiumin

Ndërkohë Prodani ka shprehur haptazi shqetësimin edhe për punimet që po bëhen para stadiumit. “Sakaq, një problem shqetësues është fakti se sheshi përpara është rrethuar për disa punime. Në takimin që u bë para pak kohësh mes bashkisë, federatës dhe inspektorit të FIFA-s, u ra dakord që të gjendej një zgjidhje duke bërë disa punime të vogla. Një gjë e tillë nuk është bërë ende dhe nëse nga momenti në moment inspektorët e FIFA-s vijnë për të parë gjendjen para ndeshjeve kualifikuese, atëherë stadiumit mund t’i hiqet licenca, pasi aty nuk është bërë asnjë punim, sikundër u ra dakord në atë takim”, – sqaron sekretari.

De Biazi: Ndaj Moldavisë shuaj dilemat e kualifikimeve

Trajneri i Kombëtares shqiptare, Xhani de Biazi, ndoshta kishte programuar një konferencë normale shtypi, në të cilën do flitej për mënyrën sesi do të luajë skuadra ndaj Moldavisë, por sherri ÇEZ-”Qemal Stafa” ka përfshirë edhe italianin. Duke qenë se rrezikohet seriozisht që kjo ndeshje të mos luhet në orarin e përcaktuar, De Biazi nuk e ka pritur aspak mirë, aq sa nuk ka nguruar të qartësojë se, në rastin konkret, po luhet jo vetëm me imazhin e Kombëtares, por të gjithë Shqipërisë. Sipas tij, është e patolerueshme që problematika të tilla të sjellin shpërqendrim, apo edhe më shumë shqetësim të ekipit kombëtar para një ndeshjeje, nga ku ai pret të marrë përgjigjet e fundit nga lojtarët e tij para kualifikimeve zyrtare që nisin në shtator për “Botërorin 2014″.

Pasnesër (nesër) luajmë kundër Moldavisë, çfarë pret De Biazi nga kjo ndeshje?

Për ne është një ndeshje e rëndësishme, pasi është testi i fundit para kualifikimeve për “Botërorin 2014″ dhe unë pres që të marr ato përgjigje që dua nga lojtarët e mi. Uroj që takimi të zhvillohet sikundër është programuar, pra të mërkurën në darkë, duke shpresuar në zgjidhjen e problemit të energjisë, i cili për të qenë i sinqertë më duket paksa anormal. Nuk është as në të mirën e Kombëtares, por as në imazhin e Shqipërisë që ndeshja të mos luhet për teknikalitete të tilla. Realisht në jetën time nuk e kam hasur asnjëherë një gjë të tillë, ndaj uroj që ata që janë përgjegjës për vendimmarrjen në këtë rast, të mendojnë se po bëhet fjalë për Kombëtaren, e cila nuk është e imja apo e federatës, por e gjithë shqiptarëve.

Si mendoni se mund të zgjidhet një ngërç i tillë?

Unë mendoj se në këto momente të gjithë duhet të jemi bashkë duke përkrahur Kombëtaren. Nuk më vjen aspak mirë që, duke qenë ndeshja të mërkurën, gjendet një shkak nga një kompani për të marrë pikërisht tani një borxh të vjetër, të cilin ndoshta nuk e ka për detyrë as federata që ta paguajë. Ua thashë që një gjë të tillë e dëgjoj për herë të parë në jetën time dhe kërkoj që ata që janë përgjegjës për këtë të ndërhyjnë sa më parë për ta zgjidhur problemin.

Në këtë mënyrë rrezikohen jo vetëm seancat stërvitore, por edhe zhvillimi i kësaj ndeshjeje, apo jo?

Sigurisht që kjo gjendje më krijon shumë probleme. Kemi programuar dy seanca stërvitore, çka nuk mund të them se është maksimumi që mund të bënim dhe, nëse nuk i bëjmë si duhet as këto, atëherë sigurisht që për ekipin do të jetë një problem. Në këtë këndvështrim nuk mund të jem i kënaqur me atë që po dëgjoj, pasi dua që ta stërvit skuadrën me qetësi sonte (mbrëmë), nesër dhe të mërkurën të shikoj se në ç’nivel është ekipi, tri javë para ndeshjes së parë për kualifikimet e Botërorit.

Keni një ide të skuadrës që do të jetë titullare në kualifikime?

Unë e kam një ide të skuadrës me të cilën do t’i përballoj kualifikimet, por hë për hë kam zgjedhur rreth 34 lojtarë, kjo për arsyen se edicioni është i gjatë dhe mund të ndodhin probleme nga më të ndryshmet. Kështu që duhet që të kem në dispozicion sa më shumë lojtarë, me qëllim që të bëj edhe një edicion të mirë. Mendoj se, pas këtij takimi, do të kem edhe një ide më të qartë të skuadrës për kualifikimet e Botërorit.

Ç’mund të na thoni për lojtarë si Basha, Kukeli, Meha, të cilët po shkëlqejnë në Evropë, por nuk kanë ende pasaporta shqiptare?

Ne po mundohemi që të afrojmë sa më shumë lojtarë të mirë që luajnë në Evropë, si në rastin e Bashës. Ndonjëherë ekziston dëshira, por ka probleme nga më të ndryshmet për t’i teseruar që ata të luajnë për Shqipërinë. Ne po bëjmë më të mirën e mundshme në të gjitha aspektet.

Po Sukaj, i cili është lënë jashtë në të gjitha miqësoret që keni zhvilluar?

Edhe ai, sikundër edhe disa lojtarë të tjerë që i kam në mendje por që nuk i kam grumbulluar, janë pjesë e Kombëtares dhe do të kenë rastin që ta tregojnë veten në këtë skuadër.

Në dy ndeshje të mëparshme, Shqipëria ka fituar ndaj Moldavisë, e shikoni këtë si një ogur të mirë?

Të shpresojmë, madje po prek diçka (qesh). Më vjen mirë që Shqipëria ka bilanc pozitiv ndaj Moldavisë, por kjo nuk do të thotë asgjë. Këto dy ndeshje do të mbeten në arkivin e Kombëtares, ndërsa të mërkurën do të luhet një 90-minutësh i ri, krejt tjetër, gjatë të cilit ne do kërkojmë të bëjmë më të mirën për të parë edhe se ku është gjendja e disa lojtarëve. Disa luajnë tashmë në kampionatet e tyre, disa kanë kryer vetëm faza përgatitore, ndaj kjo është ndeshja më e mirë për t’i parë se ku janë me përgatitjet.

Në tri ndeshjet e para nuk keni luajtur asnjëherë me të njëjtën skemë dhe me të njëjtët lojtarë, a mund të na thoni sesi do të jetë Shqipëria me De Biazin?

Unë personalisht e kam të qartë në kokën time. Sigurisht, në tri miqësoret e para kam eksperimentuar shumë, pasi doja jo vetëm që ta njihja skuadrën, por edhe të shikoja se ku duhet përmirësuar dhe ku mund të marr më të mirën nga lojtarët e mi. Të njëjtën gjë do të bëj edhe me Moldavinë, ku do marr edhe të dhënat e fundit që më nevojiten para kualifikimeve.

Ndaj Moldavisë keni grumbulluar edhe tre lojtarë të rinj nga kampionati shqiptar…

Po, pasi dua që t’i shikoj këta djem sesi reagojnë në Kombëtare. Unë i kam ndjekur me ekipet ku ata aktivizohen, por ka një ndryshim, sipas meje, Kombëtarja nga klubet. Ka shumë futbollistë që stërviten mirë gjatë javës dhe më pas, kur vjen dita e ndeshjes, stonojnë totalisht, ashtu sikundër ka lojtarë që japin rezultat me Kombëtaren, por jo edhe aq me klubin, ose anasjelltas. Pikërisht për këto dilema i kam grumbulluar, pasi dua që të kem ide të qartë për të gjithë lojtarët.

Fusha e mjerueshme, “tmerrohet” De Biazi

Nuk është ndriçimi problemi i vetëm i stadiumit “Qemal Stafa”. Madje, zhvillimi i ndeshjes me drita apo jo, nuk është asgjë përpara asaj që të paraqet ky impiant, i lënë në mëshirë të fatit, dhe në degradim e sipër. Pisllëk gjithandej, stola të shkatërruar, një tribunë ku do turpërohej cilido me pamjen me të cilën t’i shfaqej, pa folur pastaj për fushën. Kjo e fundit të ofron një spektakël të vërtetë të mjerimit, aq sa trajneri i Kombëtares, Xhani de Biazi “ka vënë duart në kokë”, para fillimit të stërvitjes së djeshme. Teknikut i ka mjaftuar një shikim i përgjithshëm aty-këtu, pa u futur në gjithë perimetrin dhe sipërfaqen e “Qemal Stafës”, për t’ia nisur nga ankesat, për hir të së vërtetës, krejt të kuptueshme dhe të justifikueshme. “E si mund të lush në këtë fushë? Është e pamundur. Shiko gropën këtu, shiko çfarë disniveli. Do luajmë ndeshje ne në këtë fushë apo çfarë?”, i ka kërkuar shpjegime tekniku, si fillim një pjesëtari të drejtorisë së stadiumit dhe më pas edhe menaxherit të Kombëtares, Alban Bushi dhe sekretarit të përgjithshëm të FSHF-së, Eduard Prodani. Duhet thënë se impianti më i madh në vend është bërë pre e burokracisë dhe e lojërave politike që prej shumë kohësh. Edhe pse u tha se ai do prishej dhe në vend të tij do të ndërtohej një stadium modern, i cili do të inaugurohej për 100 vjetorin e Pavarësisë, fakt është se jo vetëm që nuk është bërë asgjë nga këto, por momentalisht “Qemal Stafa” po kthehet në një katrahurë ku nuk i del për zot kurrkush. Shteti, as nuk ia jep federatës dhe as nuk investon për të. E megjithatë, dje Kombëtarja ka vijuar stërvitjen e parë për ndeshjen miqësore të mbrëmjes së nesërme ndaj Moldavisë. E kotë që ankohet De Biazi, tani duhet të mësohet me mjerimin e topkëmbës shqiptare.

Trajneri i Moldavisë

“Shqipëria, test real para sfidës me Anglinë”

Trajneri i Moldavisë, Jon Caras, e ka vlerësuar maksimalisht ndeshjen ndaj Shqipërisë. Kjo, jo vetëm se edhe ai sikundër De Biazi kërkon të marrë sa më shumë përgjigje pozitive nga lojtarët e tij, por edhe për faktin se Kombëtarja shqiptare për të është një skuadër e denjë për të përgatitur ndeshjen e parë kualifikuese të Moldavisë ndaj Anglisë në shtator. “Ky është testi i fundit, para kualifikimeve për Botërorin 2014. I kam parë në kaseta ndeshjet e fundit të Kombëtares shqiptare dhe mund t’ju them se kemi të bëjmë me një skuadër shumë të fortë. Ndoshta, në pamje të parë, nuk ka shumë yje, por është e disiplinuar dhe vrapon shumë në fushën e lojës. Gjithsesi, ne do të shkojmë për të bërë lojën tonë dhe çka është më e rëndësishme, për të parë reagimin e disa lojtarëve. Siç e keni parë në fillim, unë grumbullova 30 lojtarë, ndërsa drejt Shqipërisë po shkoj vetëm me 18 të tillë. Mes tyre ka shumë lojtarë të rinj, nga të cilët pres shumë që në këtë ndeshje. A do jetë Shqipëria një test para përballjes me Anglinë? Po, në vija të përgjithshme po. Pjesa më e madhe e formacionit që mund të përdor ndaj Shqipërisë mund të luajë edhe në ndeshjen e parë kualifikuese ndaj Anglisë”, – ka pohuar Caras.

LEONARD KARAJ

panorama-sport.