Mbrojtja po kthehet në një çështje në Vlorë. Me mbylljen e sezonit të kaluar, pati disa largime në këtë repart, sidomos nga krahët. Mes tyre, Sakaj dhe Aleçenu, të cilët vlerësoheshin si titullarë dhe kishin mjaft peshë në skuadër. Në klub duket se janë penduar që i lanë të iknin. Nëse do t’i kishin bindur për të qëndruar, tashmë nuk do të vuanin në këtë drejtim. Por, fakti që disa prej tyre vendosën kushte për formacion,

bëri që ata të iknin. Kriter që nuk u pranua nga drejtuesit, e për rrjedhojë “firot” s’u evituan. Edhe për Begajn është shtuar “pishmani”, pasi edhe ai mund të ishte një alternativë e mirë. Fakti që Muça pohoi publikisht se donte përforcime në krahët e mbrojtjes, konfirmon se në klub nuk i kishin bërë mirë llogaritë. Për momentin, alternativat mungojnë dhe vlonjatët i ka zënë halli. Vetëm qendra e mbrojtjes jep siguri me dyshen Rajoviç-Veliu, ndërsa nga krahët, edhe pse Arbri e Mici parashikohen titullarë, mungojnë dubluesit. Duke marrë në konsideratë që sezoni është i gjatë, shto këtu që do të ketë penalizime e dëmtime, trajneri do që t’i paraprijë së keqes dhe të jetë i qetë kur ta kthejë kokën nga stoli.

Koliqi - Pas trajnerit Muça dhe kapitenit Veliu, është portieri Enea Koliqi ai që mendon se skuadra ka nevojë për përforcimin në mbrojtje. “Unë nuk kam se çfarë të shtoj më shumë se sa trajneri Muça. Ai gjykon se ekipi ka nevojë për afrime në mbrojtje. Mund të them se rezerva ne kemi, por ata nuk kanë përvojën e nevojshme. Pra, na duhen lojtarë që të kenë më shumë eksperiencë. Mbrojtja mbetet problem ynë për sa u përket lojtarëve që duhet të pranojnë stolin, pasi me titullarët e kemi mbyllur gjithçka. Ne kemi bërë përgjithësisht merkato cilësore. Kemi një grup shumë të mirë, por tani, siç thashë edhe më lart, na duhen lojtarë për stolin”, – tha portieri i vlonjatëve.

Synimet - Koliqi nuk është i kënaqur nga paraqitja e ekipit në miqësore, por është i bindur se në kampionat gjendja do të ndryshojë. “Më duhet të them se nuk jam edhe aq i kënaqur nga rezultati, apo edhe nga paraqitja në ndeshjet miqësore. Megjithatë mund të them se një pjesë janë lojtarë të rinj dhe duan pak kohë që të ambientohen. Në miqësoren e fundit me Luftëtarin ne u penalizuam edhe nga dëmtimet. Besoj se situata do të ndryshojë me të nisur kampionati. Kemi edhe dy javë kohë në dispozicion, do të arrihet forma që ne na duhet. Objektivi tashmë është më se i qartë. Ne do të duhet të jemi kampionët e rinj. Janë të gjitha mundësitë për këtë. Drejtuesit kanë shpenzuar shumë si në infrastrukturë, ashtu edhe në ndërtimin e ekipi, ndaj ky duhet të jetë shpërblimi më i mirë”, – përfundon portieri.

Klubi, gati t’i plotësojë kërkesat trajnerit Muça

Ngulmimi i trajnerit Muça se ekipi ka ende nevojë për ndërhyrje, ka bërë që klubi të reagojë dhe të mendojë që ta plotësojë atij kërkesat. Kur na ndajnë edhe dy javë nga starti i kampionatit, pritet që ata të gjejnë një zgjidhje dhe të afrojnë dublues për krahët e mbrojtjes. Drejtuesit e klubit vlonjat mbështesin trajnerin Muça për lojtarë stoli. Ata bëjnë me dije se nëse do të krijohet mundësia për të afruar ndonjë element që ka përvojë në Superiore, vështrimi do të hidhet nga akademia. Pra, nëse nuk gjejnë ata futbollistë me specifikat që kërkon trajneri i kuqezinjve, ata do të përzgjedhin ndonjë lojtar cilësor nga ekipi i të rinjve të Flamurtarit. Deri më tani ky duket si opsioni më i mundshëm. Për titullarët tashmë ka përfunduar merkatoja, pasi 11-shja bazë është krijuar në mendjen e teknikut.

Rikuperohen Memelli dhe Arbri, Kuqi veçmas grupit

Pas pushimit të së dielës, lojtarët i janë rikthyer stërvitjes në fushë ndërsa i gjithë grupi ka qenë në dispozicion të trajnerit Muça. Kur kanë mbetur edhe dy javë nga starti, te vlonjatët po mundohen që të rifitojnë lojtarët e dëmtuar. Ata duan të zbresin në javën e parë të plotë në fushë, për të treguar qartë forcën e tyre. Duket se lajmet më të fundit kanë qenë pozitive edhe nga infermieria, teksa dy lojtarët e dëmtuar, Memelli dhe Arbri, kanë hyrë dje në stërvitje me grupin. Ata kanë pasur probleme të vogla, madje as në miqësoren e fundit kundër Luftëtarit nuk ishin në kondicionin për të luajtur. Rikuperimi i tyre është i plotë tashmë, që do të thotë ata janë në dispozicion të trajnerit Muça. I vetmi që një ditë më parë ka kryer stërvitje të diferencuar është Taulant Kuqi. Sipas mjekëve të ekipit, lojtarit i duhen të paktën edhe pesë ditë për të kapur formën. Ndaj gjatë kësaj kohe ai do të stërvitet individualisht. Megjithatë, deri më 25 gusht, koha është e mjaftueshme që mesfushori të jetë i gatshëm për të nisur punën bashkë me grupin.

ERMAL SIKA

panorama-sport.