Nijas Lena do të jetë kapiteni i Flamurtarit për sezonin e ri. Mesfushori 26-vjeçar ishte nga lojtarët e parë që rinovoi kontratën me klubin vlonjat. Tashmë, pas riformatimit të skuadrës, Lena komenton për “Panorama Sport” lëvizjet në merkato. Edhe pse drejtuesit e klubit kanë paralajmëruar se nuk do të bëjnë më blerje,

mesfushori mendon se ardhja e një tjetër lojtari do ta fuqizonte më shumë skuadrën. “Më bëhet qejfi që grupi është ruajtur në pjesën më të madhe të tij në krahasim me sezonin e kaluar. Sigurisht, ndonjë blerje tjetër do të rriste edhe më tepër konkurrencën në ekip”,- nis bisedën shqiptaro-maqedonasi.

Lëvizjet - Lena shprehet se lojtarët e larguar nga Flamurtari ishin cilësorë, por nga ana tjetër, ai është i bindur se ardhjet e fundit janë po të të njëjtit nivel. “Ka pasur 2-3 largime kryesore, siç ishte kapiteni Sakaj, Pejiç dhe Brahja. Ata kanë qenë lojtarë me peshë te Flamurtari, por dua të theksoj faktin se edhe ardhjet kanë potencial të madh. Më duhet të vlerësoj të dy lojtarët e repartit të mesfushës, Bratiç dhe Vukçeviç. Mund të them se janë cilësorë dhe e meritojnë të jenë pjesë e formacionit. Besoj se ata do të bëjnë më të mirën për Flamurtarin. Shpresoj që të gjithë futbollistët e ardhur së fundmi në skuadër të ambientohen shpejt me grupin. Sigurisht, duan pak kohë të përshtaten plotësisht, por e përgjithshmja është pozitive, pasi ekipi është parë tashmë në miqësoret që kemi zhvilluar”,- ka thënë më tej kapiteni i Flamurtarit.

Synimet - Titullari i skuadrës kuqezi ka besim se me këtë grup lojtarësh dhe me këto investime të klubit, Flamurtari do të jetë kampioni i sezonit të ri. “Janë të gjitha mundësitë që Flamurtari të jetë ekipi kampion. Kemi një grup të kompletuar dhe nuk ka asnjë arsye pse të mos sulmojmë titullin. Tashmë nuk ka kthim pas dhe asnjë objektiv tjetër, veç titullit kampion. Kemi një eksperiencë të hidhur nga sezonet e shkuara, por jam i bindur se është viti ideal që Flamurtari të marrë atë që meriton. Kam dëgjuar se drejtuesit e klubit janë shprehur se e kanë mbyllur tashmë merkaton. Sigurisht, kjo është punë e tyre, pasi ata i dinë mundësitë financiare. Por, e përsëris se ndonjë afrim tjetër cilësor nuk do të ishte keq, përkundrazi do të rriste më shumë konkurrencën në grup”,- theksoi mesfushori i vlonjatëve.

Shiriti - Në fund, Lena flet edhe për rolin që ka në skuadër, teksa pas largimit të Sakajt, trajneri Muça i ka besuar shiritin e kapitenit. “Faleminderit të gjithëve për vlerësimin, por për këtë çështje nuk mund të prononcohem. Do të jap maksimumin tim për Flamurtarin, ashtu siç kam bërë deri më tani”,- u shpreh me modesti lojtar. Nga emra si Veliu, Lena dhe Memelli trajneri Muça pret shumë, pasi këta janë futbollistët kryesorë në ekip.

PanoramaSport