Presidenti Shpëtim Gjika nuk e përjashton mundësinë e ndonjë përforcimi tjetër, por beson se grupi aktual e ka kualitetin për të fituar trofe. Firmos edhe Bratiç. Po ndërtohet një Flamurtar me synime të qarta për titullin kampion. Kreu i bashkisë, njëherësh edhe president i ekipit, Shpëtim Gjika,

edhe pse me pushime, është informuar për të gjitha zhvillimet, që kanë të bëjnë me ekipin vlonjat. Ai mendon se janë bërë afrime të goditura dhe vlerëson edhe dy mesfushorët e ardhur së fundit te Flamurtari, kroatin Bratiç dhe malazezin Vukçeviç. Sipas presidentit Gjika, janë lojtarë shumë cilësorë dhe do t’i bëjnjë shumë punë Flamurtarit. “Pasi kemi ruajtur pjesën më të madhe të grupit të sezonit të kaluar, kemi bërë edhe disa përforcime. Kemi vepruar me kujdes, duke afruar lojtarë shumë të rëndësishëm dhe me vlera, siç janë Memelli dhe Soza e ndonjë tjetër, pa harruar dy të fundit, që janë Vukçeviç dhe Bratiç. Në të njëtën kohë, është menduar t’u jepet mundësia edhe lojtarëve vlonjatë, ndaj në gjirin e ekipit janë afruar disa të rinj, të cilët vijnë nga ekipet e moshave. Duam që në të ardhmen ata të jenë pjesë e rëndësishme e Flamurtarit. Pra, kemi punuar në të dyja drejtimet. Mendoj se kemi punuar mirë në merkato dhe tashmë gjithçka është në dorë të ekipit. Vukçeviç është një lojtar, i cili ka treguar vlera, kur ka luajtur kundër nesh vitin e kalyar. Pastaj, edhe në dy miqësoret e fundit është paraqitur shumë mirë. Po kështu, edhe Bratiç është një lojtar me nivel, që do t’i bëjë shumë punë Flamurtarit”, – është shprehur presidenti Gjika. Te vlonjatët mund të ketë edhe lëvizje të tjera në merkato dhe për këtë ai sqaron: “Ditët e fundit nuk kanë munguar zërat për afrimin e njërit apo tjetrit lojtar. Dua të sqaroj diçka. Pejiç nuk do të kthehet tek Flamurtari dhe largimin e kërkoi vetë ai. I afruam më të mirën, por lojtari zgjodhi tjetër rrugë, kështu që nuk ka kthim prapa. Një emër tjetër është ai i Daniel Xhafës, por me të nuk kam patur kontakt apo ndonjë kërkesë nga ana e tij. Kryesorja është se Flamurtari ka një grup shumë cilësor lojtarësh dhe sezonin e ardhshëm pa dyshim që do të bëjmë gjithë përpjekjet për titullin kampion. Mungon Pejiç, por në sulm është Memelli, i cili njihet për vlerat e tij, por ka edhe shumë futbollistë të tjerë. Për merkaton do të shohim ditët në vijim, por ndoshta qëndrojmë edhe kështu si jemi”, – përfundon presidenti i Flamurtarit, Shpëtim Gjika, i cili e pret me shumë besim sezonin e ri. Ai është i bindur se Flamurtari do të sjellë një trofe në Vlorë.

.....................

Firmos Bratiç Davor Bratiç është zyrtarisht pjesë e Flamurtarit të sezonit të ardhshëm. Konfirmimi vjen nga klubi vlonjat, që sqaron se kroati ka firmosur. Ai është lojtari i dytë që vjen në Vlorë nga Skënderbeu, pasi këtë gjë e ka bërë më parë argjentinasi Soza. Ndoshta Bratiç nuk do të jetë lëvizja e fundit në merkato. Janë disa emra të tjerë që përfliten, edhe pse në ambientet e klubit vlonjat flitet me rezerva për arritjen e ndonjë akordi tjetër.

.......................

Vlonjatët, në kërkim të një vendi më të freskët

Te Flamurtari janë duke menduar për një largim disaditor nga Vlora. Po shihet mundësia për ta lëvizur ekipin në një vend më të freksët për të zhvilluar një minifazë përgatitore, sepse në Vlorë temperaturat janë shumë të larta. Në fakt, diçka e tillë u quajt si një problem edhe nga trajneri Muça, për të cilin moti i nxehtë është “armiku” kryesor. Me rikthimin e drejtuesve kryesorë të ekipt, pritet të vendoset, nëse Flamurtari do të largohet jashtë Vlorës apo jo. Madje, është folur edhe për një turne në SHBA, i sponsorizuar nga disa bashkatdhetarë, por gjithçka ka mbetur në kuadrin e fjalëve. Megjithatë, dy ditët e ardhshme do të merret nëj vendim edhe për këtë çështje.

..........................

Sinjale pozitive për stafin nga Gjirokastra

Fitorja në miqësoren me Luftëtarin në Gjirokastër ka sjellë sinjale pozitive te vlonjatët. Stafi teknik, i kryesuar nga trajneri Muça, ka mbetur i kënaqur jo vetëm për fitoren, por mbi të gjitha për lojën e zhvilluar. Në ndeshjen me Luftëtarin kanë spikatur Memelli dhe Soza, autorët e golave, por edhe të tjerët kanë dhënë shenja pozitive. Edhe malazezi Vukçeviç është vlerësuar si një nga më të mirët në fushën për Flamurtarin. Për në fundjavë është programuar një tjetër ndeshje miqësore me gjirokastritët, këtë herë në qytetin e Vlorësa.

sportishqiptar