Dy miqtë më të afërt të sulmuesit Pero Pejiç, Toni Pezo dhe portieri Enea Koliqi, kanë konfirmuar së fundmi, se kroati është i gatshëm të bëj një hap prapa dhe mund ta firmosë kontratën e ofruar nga drejtuesit e Flamurtarit, duke përfshirë edhe klauzolën e klubit.

Toni Pezo-“Unë besoj shumë, se do të kalohet pa ndonjë problem ajo pengesa e vogël, që e mban Peron larg Flamurtarit. Nuk ka shumë rëndësi, se kush do të hapë rrugë në këtë rast, kryesore është që të arrihet akordi midis paleve. Unë komunikoj çdo ditë në telefon me të dhe ai ofertën e Flamurtarit e ka në plan të parë. Nuk dua ta teproj me deklarata, pasi mund të keqinterpretohen, por jam i bindur, se me Pejiç dhe Memellin në sulm, Flamurtari do të fitojë patjetër trofe”. Enea Koliqi–“Nga bisedat që kam patur me Pejiç kam arritur të kuptoj, se në fillim të javës ardhshme ai do të vendosë përfundmisht, për të ardhmen e tij në kampionatin shqiptar. Do të ishte vërtetë mirë që të bënte këtë zgjedhje, sepse ka arritur të përshtatet shumë mirë me skuadrën. Unë bëj pjesë tek ata që besojnë, se Pejiç do të rikthehet tek Flamurtari”. Vetëofrimi–Duhet shpjeguar që Pejiç është vetë ofruar sërish dje në mbrëmje në Vlorë pasi ka dëgjuar ofertën e Skëndërbeut dhe pasi ajo mesa duket nuk i ka pëlqyer. Presidenti Gjika-Rikthimi i sulmuesit tek Flamurtari shihet si një mundësi, nisur nga oferta prej 80 mijë euro në sezon, që i është ofruar nga presidenti Gjika. Tashmë duhet të gjendet gjuha e përbashkët për klauzolën e ndalimit të 15% të kontratës, në rast se Flamurtari nuk e fiton titullin kampion. Siç dihet, palët janë ndarë pa thënë një “Jo” përfundimtare edhe pse pritja e përgjigjes përfundimtare po i lodh jo pak vlonjatët. Por sigurisht që fjala e fundit mbetet ajo e presidentit Gjika, i cili kthehet sot nga pushimet, por burime konfindenciale bëjnë me dije, se numri 1 i klubit vlonjat është në dijeni të të gjitha zhvillimeve tek Flamurtari. Të tjerët-Drejtuesit e klubit të Flamurtarit kanë kontaktuar dje dhe me Fagun e Muzakën, për të mësuar në lidhje me gjendjen e tyre në merkato. Ndoshta palët mund të bëjnë bisedime ditën e sotme. Pejiç, i penduar që nuk pranoi Flamurtarin Pero Pejiç ka pasur dje një ofertë zyrtare nga Skëndërbeu por hë për hë ka mbetur i pakënaqur nga oferta. Kroati gjithashtu mësohet se është penduar që nuk ka pranuar ofertën e Flamurtarit e cila shkonte në total 62 mijë euro. Kroati ka marrë një ofertë dje më të vogël nga kampionët, ndërkohë që Rubio ka thënë jo për të te Tirana .