“Pas pushimeve do të vendos për për të ardhmen time”. Kështu shprehet nga Vlora sulmuesi vlonjat, Daniel Xhafaj. Ai gjithsesi nuk e ka përmendur asnjëherë fjalën “nuk”, duke e lënë të hapur një derë për rikthimin. Gjithsesi, Xhafaj nuk e ka pohuar këtë zyrtarisht, por ama as e ka mohuar.

I kontaktuar nga “Panorama Sport”, sulmuesi u shpreh se momentalisht gjendet me pushime në qytetin e tij të lindjes, në Vlorë, ndërsa nuk ka pranuar të japë një përgjigje përfundimtare për një rikthim të mundshëm te kuqezinjtë. “Ndodhem këtu në Vlorën time të dashur me familjen për të kaluar në plazhet e saj të mrekullueshëm disa ditë pushimesh. Kam lexuar disa shkrime në shtypin e shkruar në lidhje me një rikthim timin te Flamurtari. Nuk dua që në këto momente të përzihem në këtë vorbull, unë jam me pushime dhe për të ardhmen time do të vendos në kohën e duhur”. Xhafaj nuk ka pranuar të flasë për kontaktet që ka pasur me drejtues të klubit vlonjat, por thotë se për gjithçka në lidhje me të ardhmen e tij do të prononcohet në kohën dhe momentin e duhur: “Patjetër që një lojtar me eksperiencë ka gjithnjë kërkesa në treg. Nuk dëshiroj të flas konkretisht për to, por do t’i shqyrtoj të gjitha me kujdes”. Sa i përket të shkuarës së tij me Flamurtarin, Daniel Xhafaj u shpreh: “Besoj se për një vit që kisha kontratë me Flamurtarin, detyrën time e bëra mjaft mirë, madje mund të them shkëlqyeshëm”. Në Vlorë e kërkojnë një rikthim të mundshëm të Daniel Xhafajt. Në fakt drejtues të klubit mundohen ta mbajnë të fshehtë ende mundësinë e rikthimit për lojtarin, por dëshira nuk mungon nga drejtuesit dhe tifozët, madje edhe lojtarët e Flamurtarit të pyetur nga “Panorama Sport” janë shprehur se afrimi i Xhafajt do të ishte një arritje e madhe. Ndoshta pritet rikthimi nga pushimet i presidentit Gjika, për të nisur zyrtarisht bisedimet e afrimit sërish në ekip të Xhafajt. Ndërkaq nëse ai afrohet te Flamurtari dhe palët bien dakord, Muça do të ketë në dispozicion një tjetër sulmues me eksperiencë, sepse pas largimit të Pejiçit është vënë në kërkim të një të tilli. Trajneri ka bërë kërkesë edhe për dy mbrojtës krahu ose një mesfushor të avancuar.

Gjika përgjigjet me diplomaci

Presidenti i Flamurtarit ka dhënë një përgjigje shumë diplomatike kur është pyetur për një rikthim të mundshëm në Vlorë të sulmuesit Daniel Xhafajt. “Jam me pushime në Korfuz, u bënë 10 ditë. Nuk kam asnjë sinjal, duke qenë se jemi në bisedime me ndonjë futbollist. Kur të kthehem do të kem akoma më shumë energji për t’u marrë me futbollin”, – ka qenë përgjigja e shkurtër e kreut të Bashkisë së Vlorës. Raporti mes lojtarit dhe presidentit të klubit u tensionua disi verën e kaluar, kur Xhafaj u largua i pakënaqur nga skuadra. Megjithatë, nuk pati tejkalim limitesh.

Arbëri, edhe një vit tjetër në Vlorë

Mesfushori beratas, Polizoi Arbëri, është një nga lojtarët që duket se ka e bindur trajnerin Muça dhe drejtues të klubit vlonjat, pasi ai ndryshe nga të tjerët që u larguan, do të jetë pjesë e Flamurtarit edhe për një vit tjetër. Polizoi Arbëri rrjedh nga një familje futbollistësh, madje është i gjashti në radhë në familjen që i është përkushtuar futbollit. Të gjithë eksperiencën vetjake dhe familjare ai dëshiron të vijojë të kontribuojë te Flamurtari. “Unë do të jap maksimumin te Flamurtari. Ky ekip i ka të gjitha mundësitë që të jetë pretendent për trofe këtë sezon. Më vjen mirë për lojtarët që janë afruar së fundmi dhe i përgëzoj drejtuesit e klubit për merkaton e zhvilluar”, – përfundon Arbëri.

ERMAL SIKA

panorama-sport.