Nga Elton Nika Mesfushori malazez, Petar Vukçeviç, është i bindur se ka bërë zgjedhjen e duhur për të vazhduar karrierën e tij. Ai flet me superlativa për ekipin dhe qytetin Petar Vukçeviç është malazezi i dytë i Flamurtarit, pas mbrojtësit Bllazho Rajoviç, që do të luajë sezonin e dytë në Vlorë. Edhe pse ka pak ditë që është bashkuar me Flamurtarin, Vukçeviç ka lënë përshtypjet e para pozitive. (marre nga sportishqiptar.com.al)

Për formën që ka shfaqur mesfushori, ish-lojtari i Buduçnostit, edhe stafi teknik ka mbetur i kënaqur. Vukçeviç luajti edhe në miqësoren e së shtunës me Apoloninë, ndërsa vetë lojtari pranon se ka ardhur në Vlorë me qëllimin për të fituar trofe. “Kam disa ditë që stërvitem në Vlorë, – thotë malazezi, – dhe përshtypjet e mia janë nga më të mirat. Kam gjetur nëj skuadër të mirë, njëkohësisht edhe një ambient të shkëlqyer. Besoj se jam në vendin e duhur për ta vazhduar karrierën time. Flamurtari nuk është i panjohur për mua. Kam luajtur një vit më parë kundër tij në Kupat e Europës. Tani fati e solli që të luaj me fanellën e Flamurtarit. Firma në kontratë nuk është problem, sepse erdha për të qëndruar te Flamurtari dhe këtë do të bëj. Firma është thjesht një formalitet, që do të realizohet në ditët në vijim. Mendoj se kam gjetur një skuadër, që, me sa jam informuar dhe me sa po shoh nga afër, kërkon trofe sezonin e ardhshëm. Kjo është diçka pozitive, pasi natyrisht edhe unë e dua diçka të tillë, pra të fitoj tituj. Kam fituar me ish-skuadrën time në Mal të Zi dhe tashmë dua ta bëj këtë edhe me Flamurtarin. Shanset janë, pasi mendoj se ky grup lojtarësh është shumë cilësor, me shumë përvojë dhe i mësuar me sfida të rëndësishme. Ka edhe disa javë kohë që të nisë kampionati dhe jemi tashmë në një periudhë shumë të rëndësishme përgatitjesh dhe ndeshjesh miqësore, që vlejnë shumë për skuadrën. Janë ditë me shumë ngarkesë në stërvitje dhe lodhja bën punën e saj, por dihet që kjo është e domosdoshme për një sezon të gjatë dhe të lodhshëm. Titulli kampion? E thashë edhe më lart se kam ardhur te Flamurtari pikërisht për këtë gjë dhe besoj shumë se do të kurorëzojmë punën tonë me titullin kampion. Vlora është një qytet shumë i bukur, sidomos tani në verë. Ka shumë pushues dhe deti është shumë i mirë. Pra, jam shumë mirë dhe mendoj se kam bërë zgjedhjen e duhur”, – përfundon mesfushori Petar Vukçeviç.