Kur flasim për Europën e shqiptareve, flasim për një rrugë e cila vazhdon të jetë e shtruar me “kalldrëm” dhe jo me “asfalt”. Duke iu larguar Champions League, ku vetëm dy ditë më parë ishim dëshmitarë të shkatërrimit të Skënderbeut në Hungari, ndaj Debrecenit, i kthehemi kompeticionit të dytë europian më të rëndësishëm, pra “Europës së Vogël”, ose të quajtur sot UEFA Europa League. (marre nga sportekspres.com)

Dikur është quajtur Kupa UEFA, edhe pse në fillimet e saj mbante emrin “Kupa e Panaireve” dhe merrnin pjesë vetëm ekipe me ftesë. Në vitin 1971, u vendos të quhej Kupa UEFA dhe ky emër vazhdoi deri në ndryshimin e madh, atë të vitit 2009, kur edhe mori emrin Europa League. Dhe, duke qenë se bëhet fjalë për Kupën ku marrin pjesë skuadrat që klasifikohen menjëherë pas vendeve Champions, ka pasur më shumë skuadra shqiptare që kanë marrë pjesë: Tirana, Partizani, Dinamo, Vllaznia, Flamurtari, Elbasani, Besa dhe Laçi. E megjithatë, vetëm Flamurtari ka prishur atë që quhet “mallkim i turit të tretë”, duke u eliminuar nga Barcelona, pikërisht kur do të kalonte “kufirin” e kthyer në një pengesë dekadash kuqezi. Shkrirja në një- Deri në vitin 1999, kur edhe u bë shkrirja e Kupës së Kupave me Kupën UEFA, vetëm Dinamo dhe Flamurtari kanë arritur të kalojnë turin e parë. Blutë mundën në sezonin 1985-’86 maltezen Hamrun Spartans, por në turin e dytë kualifikues u gjetën përballë Sporting Lisbonës, duke barazuar në Tiranë dhe humbur vetëm 1-0 në Portugali. Por, në memorien e të gjithë shqiptarëve është kualifikimi historik i Flamurtarit, në sezonin 1987-1988. Një ecuri legjende për ekipin vlonjat që dëboi nga raundi i parë Partizan Beogradin, ekipin historik serb, gjermanët e Vismut AUE-s dhe kaluan në tur të tretë, por Barcelona ishte tepër e fortë për kuqezinjtë, që fituan ndeshjen në Vlorë dhe u mundën 4-1 në “Camp Nou”. Por, këtu duket se nisi një tjetër epokë për shqiptarët dhe fakti që edhe fituesit e Kupave nisën të merrnin pjesë, rriti edhe shanset për të gjetur kundërshtarë të dorës së tretë. Një fat, të cilin Tirana e gjeti te Varteksi, në sezonin 2006-2007, por që më pas hasi pengesën e Kaiserisporit në tur të dytë. Edhe Partizani i Albert Xhanit, në 2004-2005, pasi kaloi maltezen Birkirkara, udhëtoi në Izrael, ndaj Hapoel Bnei Sahin, por u eliminua. Një fat të njëjtë pati edhe Vllania, kur pasi eliminoi sllovenët e Koperit, hasi në pengesën Napoli dhe u shkatërrua në dy ndeshje. Zgjerimi- Në 2009-n, pas 38 edicionesh, u modifikua sërish formati (pasi u zhduk “Intertoto”), duke i dhënë jetë Europa League, që ndoqi një model të ngjashëm me atë të Champions League, në mënyrë për ta bërë më spektakolare. Këtu u përfshinë më shumë skuadra, duke e çuar numrin në 76 skuadra në tur të parë dhe duke i dhënë mundësi skuadrave të Lindjes, nëpërmjet një shorti rajonal, që i jepte mundësi ekipeve më të dobëta në renditjen UEFA të konfrontoheshin mes tyre. Por, edhe kjo formulë, nuk rezultoi efikase për ekipet shqiptare. Madje, surprizat e kampionatit, Laçi dhe Bylisi, në paraqitjet e vetme, u poshtëruan. Ndërkaq, Partizani iu largua panoramës europiane dhe vetëm Tirana mbeti “besnike”, duke hasur në pengesën Spartak Tërnava në tur të dytë. Motivi? Koefiçienti UEFA i dha mundësi të ngjitej një tur më sipër. Edhe Vllaznia provoi të ecte, por pasi hoqi Sligo Rovers, u kthye në shtëpi nga Rapid Vjena. Sot, shpresa është që Alesundi, pas Grevenmakerit, të kalohet nga Tirana dhe të arrihet i famshmi tur i tretë, ai të cilin Flamurtari e provoi.