Drejtuesit e klubit të Flamurtarit kanë hedhur sytë nga skuadrat që luajnë në Ligën e Evropës, Skënderbeu dhe Tirana, me qëllim që të rrëmbejnë lojtarë cilësorë. Në një kohë kur ka përfunduar dhe nënshkrimi i pjesës më të madhe të kontratave, ekipi është thuajse i kompletuar,

por drejtuesit kuqezinj janë në hall për gjetjen e një sulmuesi pas largimit të kroatit Pero Pejiç. Vetë numri një i pankinës vlonjate, Shkëlqim Muça, deklaroi se janë në kërkim të një lojtari në repartin ofensiv, jo vetëm nga tregu vendës, por edhe ai i huaj. Madje, nga sa mësohet, në Vlorë qarkullojnë disa emra si të mundshëm për të veshur fanellën e këtij ekipi për sezonin e ri. Trajneri i Flamurtarit nuk bëri të ditur klubet se ku do të “peshkohet”, por la të kuptohet se janë dy skuadra në vëzhgim, ai i Skënderbeut dhe Tirana. “Lojtarët që ne kërkojmë janë duke luajtur aktualisht me ekipet e tyre në ndeshjet ndërkombëtare”, – u shpreh shkurtimisht trajneri Muça.

Dilemat - Në Vlorë ende nuk ka përfunduar firmosja e kontratave me grupin që mbylli sezonin. Aktualisht janë dy lojtarë në pikëpyetje, kapiteni Artan Sakaj dhe Julian Brahja. Kapitenin Sakaj e ka shprehur në fakt dëshirën për të qëndruar te Flamurtari, por me një kusht, që të mos qëndrojë në stol. “Më është komunikuar nga drejtuesit e klubit se unë jam në planet e ekipit. Mirëpo, më duhet të them se, nëse do të jem pjesë e Flamurtarit këtë sezon, duhet të aktivizohem. Unë jam një lojtar karriere dhe, si i tillë, nuk mund të qëndroj në stol. Pra, ky është kushti im për të qëndruar te Flamurtari. Në të kundërt do të largohem”, – tha Sakaj. Ndërkohë, ashtu siç duken gjërat në Vlorë, Julian Brahja nuk do ta ketë të sigurt një vend në ekip. “Ende nuk më kanë njoftuar nëse do të jem pjesë e Flamurtarit, por di t’ju them se sot kam lënë një takim me presidentin Gjika dhe besoj se do të mbyllet gjithçka. Dëshira ime është të qëndroj te Flamurtari, por kjo do të varet nga diskutimet me drejtuesit”.

Largohet Çela: Muça ka përçarë Flamurtarin

Semiran Çela është larguar nga Flamurtari. Një ditë më parë ai ka tërhequr të gjithë dokumentacionin nga klubi, duke qenë tashmë një lojtar i lirë. Në një bisedë për “Panorama Sport”, Çela ka pohuar se ua ka bërë të qarta edhe drejtuesve të klubit arsyet e largimit, ndërsa ka akuzuar hapur trajnerin Shkëlqim Muça si përçarës. “Largohem me vetëdijen time të plotë nga Flamurtari. Dhe shkak për këtë është trajneri Muça. Që kur klubi mori si vendim që të rikonfirmonte në krye të pankinës Shkëlqim Muçën, isha i bindur për të mos vazhduar më tej. Një gjë të tillë ia kam bërë të qartë edhe presidentit Gjika. Ky i fundit më tha që të vazhdoja të luaja edhe në Ligën e Evropës dhe më pas të shikoja se çfarë mund të bëja. Madje, mund të them se kam shkuar në Budapest me zemër të thyer, duke e cilësuar këtë udhëtim sikur isha me pushime. Shkaku i largimit tim dhe akuzat ndaj trajnerit janë më se të qarta dhe të drejtpërdrejta: ai më ka lënë në stol. Unë erdha nga një ekip ku isha titullar, por Muça më la në pankinë”. Duke vazhduar më tej, Çela shkon deri aty saqë e akuzon trajnerin Muça si përçarës të grupit. “Ju nuk e dini se çfarë ka bërë trajneri Muça. Ai e ka ndarë Flamurtarin më dysh, ajo pjesë që i bën fresk trajnerit aktivizohet, të tjerët jo. Unë i uroj suksese Flamurtarit, por mendoj se me Muçën në krye nuk do të ketë shumë ndryshime nga ky sezon që u mbyll, përkundrazi përçarja edhe mund të thellohet”. Sa i përket së ardhmes, Çela tha: “Gjatë kësaj periudhe kam marrë disa oferta nga skuadra të ndryshme të Superiores. Por dëshira ime është të mos vazhdoj më këtu. Kështu që do të largohem në ndonjë klub jashtë vendit, pasi kam edhe oferta”.

Memelli djeg shaminë

Kjo javë do të jetë e ngarkuar për futbollistin titullar të Flamurtarit, Migen Memelli. Nuk e kemi fjalën për ngarkesë në seancat stërvitore, por për një ngarkesë emocionale, që lojtari pritet të përjetojë të dielën. Sulmuesi ka vendosur ta kurorëzojë me martesë dashurinë e tij, ku do të djegë shaminë e beqarit. Nga sa mësohet, në këtë ditë të veçantë nuk do të mungojnë surprizat nga drejtuesit e e Flamurtarit, si dhe shokët.

Pritet ardhja e Taipit

Gjelbërim Taipi, me shumë gjasa, mund të jetë pjesë e Flamurtarit sezonin e ardhshëm futbollistik. Në fundjavë flitet se menaxheri i tij mund të jetë në Vlorë për të diskutuar me drejtuesit e klubit për çështjen e kontratës. Nëse do të arrihet një akord, atëherë Taipi mund të firmosë për vlonjatët. Në fakt, Taipi është një lojtar që kërkohet nga trajneri Muça. Gjithsesi, gjithçka mbetet për t’u parë në ditët në vijim.

E. Sika

panorama-sport.