“Qëllimi ynë, për këtë vit është të krijojmë një ekip cilësor, me lojtarë që kanë dëshirë për të luajtur dhe të aftë për të fituar”, – shprehet shefi i klubit kuqezi, Geri Çipi. Flamurtari pritet që të startojë stërvitjen më datë 25 korrik. Besohet se deri atëherë ekipi do të jetë gati për sezonin e ardhshëm,

ndërsa stafit teknik dhe trajnerit Muça, mendohet se mund t’u mundësohet një skuadër mjaft cilësore.

Shefi i klubit të Flamurtarit, Geri Çipi, pranon se deri në një farë pike, është bërë e mundur ruajtja e grupit të futbollistëve, ndonëse ka pasur largime, por kjo nuk do të thotë se objektivat e klubit do të ndryshojnë, por do të luftohet deri në fund, në mënyrë që këtë sezon vlonjatët të mos dalin pa trofe.

“Qëllimi ynë, për këtë vit është të krijojmë një ekip cilësor me lojtarë me dëshirë dhe të aftë për të fituar”, – shprehet Çipi duke vazhduar më tej se:

“Flamurtari këtë sezon kërkon të fitojë të paktën një trofe, dhe duhet që në sezonin e ardhshëm t’i gëzohemi jo vetëm pjesëmarrjes së thjeshtë në Kupat e Europës, por natyrisht të synojmë një nga trofetë sezonalë, pavarësisht se kampionati mbetet dëshira dhe objektivi ynë kryesor.

Po e nis pikërisht nga paraqitja në Kupat e Europës. Nuk e meritonim atë eliminim, pasi kemi treguar se kemi qenë një ekip më cilësor se hungarezët, por nuk shënuam dhe kjo solli edhe dwshtimin. E them me bindje se, kundërshtari që kishim përballë nuk kishte asgjë më shumë se skuadra jonë.

Shikoni një tjetër skuadër nga futbolli hungarez, jo më larg se dje, Debreçeni, pësoi një humbje në Korçë, prandaj mund të them, se ekipet hungareze që kishim përballë këtë vit, në këto eliminatore të Kupave të Europës, nuk ishin më lart se ekipet e vendit tonë.

Megjithatë ai dështim edhe pse i hidhur, tashmë është lënë pas krahëve. Fakti që kemi luajtur mirë, na ka bërë të besojmë te ky ekip.”- u shprehi shefi i klubit tw Flamurtarit, Geri Çipi

Largohet Pero Pejiç “Gjatë merkatos së verës janë afruar lojtarë shumë cilësorë dhe tashmë jemi duke firmosur me futbollistët, që mbyllën sezonin e kaluar me ekipin e Flamurtarit, të paktën në pjesën më të madhe të tyre.

Është larguar Pejiç, edhe pse ne e bëmë ofertën tonë, gjithashtu, shprehëm dëshirën për ta mbajtur në skuadër, por duhet të pranojmë gjithçka edhe pse ka ende një dritare hapur, por kjo mbetet për t’u parë.

Megjithatë, besoj se kemi një grup futbollistësh dhe lojtarësh mjaft cilësorë, të cilët do të kërkojnë të arrijnë objektivat që ka Flamurtari për sezonin e ardhshëm.

Mendoj se jemi në rrugë të mbarë, duke mbyllur gjithçka për sa i përket kontratave, por njëkohësisht duke mos lejuar që futbollistët cilësorë, të cilët janë në gjirin e Flamurtarit t’u bashkohen skuadrave të tjera të Superligës.

Për sa i përket merkatos së transferimeve, mund t’u them se, së bashku me trajnerin Muça, do të shohim mundësinë e afrimit të ndonjë lojtari cilësor, që do t’i nevojitet ekipit, pasi edhe kampionati është i gjatë.

Por e theksoj, se lojtarët që do të afrohen, nuk do të jenë thjesht për të plotësuar numrin e skuadrës, por vërtet lojtarë të aftë për të ndihmuar ekipin që të përmbushur objektivat për sezonin e ardhshëm. Mendoj se deri në datë 25 korrik, gjithçka do të jetë gati.

Ekipi do të nis stërvitjen në datën e përcaktuar dhe skuadra do të përbëhet në përgjithësi nga lojtarë, të cilët kanë luajtur vitin e kaluar me Flamurtarin, me ndonjë përjashtim të vogël, kjo në varësi të afrimeve të reja në skuadër. Puna e deritanishme është bërë në nivele të larta. Tashmë i takon skuadrës që të tregojë vlerat e veta”, -përfundon shefi i klubit të Flamurtarit, Geri Çipi.

sportishqiptar.