Drejtori teknik i Flamurtarit, Ardi Behari, sqaron se pasi të jenë mbyllur kontratat me futbollistët aktualë, mund të bëhet ndonjë përforcim, nëse duhet.Me përfundimin e aventurës europiane, drejtuesit e Flamurtarit kanë nisur bisedimet me futbollistët aktualë, me qëllim rinovimin e kontratës.

Shumë pak largime do të ketë në ekipin vlonjat, por, në bazë të kontratave të reja, do të shihet edhe për afrime. Ky është konfirmimi që vjen nga klubi “Flamurtari”, konkretisht nga drejtori teknik, Ardi Behari. “Menjëherë kemi nisur bisedimet me të gjithë futbollistët, të cilët luajtën me Flamurtarin edhe në Ligën e Europës. Në fakt, një pjesë e futbollistëve kanë kontrata. Këtu bëjnë pjesë ata që erdhën në Vlorë gjatë merkatos verore, ndërsa nga futbollistët që mbeten dua të them do të vazhdojnë me ne 99 % e tyre. Nga ana sportive i duam të gjithë, por gjithçka do të vendoset më pas nga ofertë-kërkesa. Megjithatë, nuk mendoj se do të kemi shumë pengesa në këtë drejtim. Janë futbollistë, të cilët e kanë shprehur hapur dëshirën e tyre për të qëndruar te Flamurtari dhe kam mendimin se do ta gjejmë gjuhën e përbashkët. E thashë se ne duam që të qëndrojnë të gjithë dhe tani vendos ana financiare. Ajo që mund të them është se, nëse do të ketë kërkesa të ekzagjeruara nga ndonjë futbollist, mund të mos arrihet marrëveshja. Kam shumë besim se më 25 korrik stafi teknik do të ketë gati ekipin e duhur për sezonin e ardhshëm. Futbollistët gjenden në Vlorë për momentin dhe me pjesën më të madhe të tyre kemi nisur prej së shtunës pasdite të bisedojmë për kontratën. Them se jemi në rrugë të mbarë”, – ka bërë të ditur Behari, drejtori teknik i ekipit kuqezi.

.......................

Afrimet “Në këët moment nuk di të them shumë gjëra në lidhje me afrimet, sepse çdo gjë varet nga përfundimi i bisedimeve me grupin actual. Pasi ta dimë zyrtarisht se cilët futbollistë do të jenë pjesë e Flamurtarit për sezonin e ri, do të shohim nëse duhet ndonjë përforcim. Në bazë të kontratave do të bëjmë llogaritë tona. Për mesfushorin Taipi, i cili është përmendur nga trajneri Muça, mund të them se ka diçka në këët drejtim, por futbollisti është nën kontratë edhe për një vit me Shkëndijën, që do dëmshpërblim. Nëse me atë ekip do ta gjejmë gjuhën e përbashkët, do të marrim futbollistin, të cilin e pëlqejmë shumë. Pavarësisht nga këto që thashë, të jeni të bindur se Flamurtari do të nisë punën normalisht më 15 korrik”, – ka shtuar Behari.

........................

Honvedi Në fund, drejtori teknik i vlonjatëve, Ardi Behari, komenton edhe eliminimin e Flamurtarit nga hungarezët e Honvedit: “Më vjen shumë për faktin që jemi eliminuar që në turin e parë në Ligën e Europës. Eshtë fakt, që kemi luajtur shumë mirë në të dyja ndeshjet me Honvedin, por na ka munguar goli. Por, ky është futbolli. Flamurtari nuk ka pasur asgjë më pak se kundërshtari, madje për ndeshjen e parë mund të them të kundërtën. Nuk u kualifikuam dhe tani duhet të pranojmë verdiktin që dha fusha”, – ka përfunduar Ardi Behari, i cili kërkon që të gjithë të mendojnë për përgatitjet e sezonit të ardhshëm, ky Flamurtari do të jetë pretendent për titullin kampion.

.........................

Drejtuesit vlonjatë kanë menduar që dyshja e sulmit për sezonin e ri të jetë Pejiç-Memelli, por deri tani nuk asgjë zyrtare në lidhje me të dytin

Sulmuesi kroat, Pero Pejiç, konsiderohet nga drejtuesit e Flamurtarit si partneri ideal për Migen Memellin sezonin e ardhshëm. Futbollisti shtatlartë ndoshta në ndeshjen e kthimit me Honvedin nuk dha atë që pritej në fushë, por sërish ai shihet si një nga sulmuesit më të mirë në qarkullim. Të gjithë e duan atë në Vlorë edhe sezonin e ardhshëm, bashkë me Migen Memellin. Por, a do të jetë Pejiç pjesë e Flamurtarit të ri. Tek ekipi vlonjat thonë “Po”, edhe pse nuk konfirmojnë gjë zyrtarisht. Nga burime të besueshme pranë klubit kuqezi bëjnë me dije se kroati mund të ketë mbyllur gjithçka me Flamurtarin, madje ai mund të ketë përfituar edhe një pjesë të kontratës për sezonin e ri. Këto janë fjalë të pakonfirmuara zyrtarisht, por që tregojnë qartë vendosmërinë e drejtuesve të Flamurtarit për të mos e lëshuar sulmuesin edhe për sezonin e ardhshëm. Nga ana tjetër, futbollisti mësohet se ka kërkuar disa ditë kohë për të vendosur përfundimisht, pasi ka edhe oferta të tjera. Të shohim çfarë do të ndodhë konkretisht, por e vërteta është se në Vlorë llogarisin për kampionatin e ri dyshen Pejiç-Memelli për sulmin. Janë dy futbollistë me përvojë të gjatë dhe të fortë fizikisht, të cilët mund ta udhëhiqnin skuadrën bregdetare drejt titullit kampion, për të cilin janë bërë shumë përpjekje sezonet e fundit, por nuk është arritur. Për kroatin Pejiç janë të interesuar ndërkohë edhe rivalët e Skënderbeut, që sezonin e fundit morrën nga Flamurtari Daniel Xhafajn dhe Sebino Plakun. Dhe kuptohet që drejtuesit vlonjatë nuk duan që një sulmues me vlera si Pero Pejiç të kalojë në radhët e rivalit të drejtpërdrejtë. Për repartin e sulmit Flamurtari ka afruar gjatë merkatos së verës edhe lushnjarin Brunild Pepa, i cili ishte titullar me nënkampionët e Teutës gjatë sezonit të fundit. Edhe ky është një futbollist me vlera dhe me perspektivë, por kuptohet që nuk e ka përvojën e Pejiçit. Për këtë të fundit është folur çdo merkato vere, pasi në kampionatin shqiptar sulmuesit janë të paktë dhe ekipet pretendente e kanë të ëvshtirë të gjejnë futbollistë të tillë cilësorë. Pejiç ka luajtur deri tani në Shqipëri me Dinamon, Tiranën dhe Flamurtarin. Drejtuesit e këtij të fundit ia dinë vlerën,ndaj dhe nuk duan që ta lënë të veshë fanellën e ndonjë ekipi tjetër sezonin e ardhshëm.

.......................

Flamurtari nuk ka qenë jetim as në ndeshjen e kthimit me Honvedin në Budapest. Pavarësisht faktit se ekipi i zemrës e kishte humbur ndeshjen e parë në fushën e tij, sportdashësit vlonjatë kanë besuar deri në fund për një kualifikim të mundshëm dhe kanë shkuar deri në Budapest. Në fund ata kanë mbetur të zhgënjyer nga rezultati, ndërsa loja ka qenë përgjithësisht e një niveli të kënaqshëm. Sportdashësit vlonjatë nuk e lanë vetëm ekipin edhe në Hungari dhe në stadiumin e Honvedit ata kanë vendosur edhe famurin kuqezi. Një mbështetje e tillë është pa dyshim një sinjal i qartë se tifozët presin një ekip të fortë sezonin e ardhshëm, ku ata do të jenë një pjesë e rëndësishme e tij. Kur kanë qenë të pranishëm edhe mijëra kilometra larg, patjetër që ata do ta ndjekin Flamurtarin në çdo ndeshje të kampionatit të ardhshëm me besimin se ndoshta ka ardhur momenti për titullin kampion. Dukenisur nga data 25 gusht, tifozët vlonjatë nuk do të mungojnë në asnjë stadium të Shqipërisë.

sportishqiptar