Drejtuesit kërkojnë që ekipi të jetë sa më i përqendruar për ndeshjen e kthimit me hungarezët, duke i lënë mënjanë ngjarjet e fundit. Sidoqoftë, për mesfushorin Gentian Muça tashmë mund të thuhet se është një ish-lojtar i Flamurtarit.

Ai pezullua pas ndeshjes me Honvedin, për shkak të thyerjes së disiplinës, ashtu si edhe Progni, i cili u bë çështje me akuzat në adresë të trajnerit Shkëlqim Muça për mitmarrje. Për Prognin do të vendoset përfundimisht pas ndeshjes në Hungari.

“Te Flamurtari po mendohet vetëm për ndeshjen me Honvedin, ku besimi nuk mungon. Pra, do të kërkojmë të bëjmë më të mirën, pavarësisht shanseve të pakta që kemi për kalimin e turit. Aktualisht, Progni është një lojtar i pezulluar, pas një vendimi të klubit. Më pas, vetë futbollisti do të ulet me drejtuesit e klubit për të bërë bisedimet përkatëse.

Progni ka një kontratë dhe janë të dyja palët, që do të vendosin për të ardhmen e këtij futbollisti. Do të dëshiroja që atmosfera në ekip të fitonte sadopak qetësi në prag të një takimi shumë të rëndësishëm që ka përpara Flamurtari.

Më mirë të flasim për këtë përballje se për problemet, që u shfaqën papritur ditët e fundit dhe ndoshta kanë ndikuar për keq. Mendoj se futbollistët do të kenë përqendrimin e duhur për 90-minutëshin e Budapestit, pasi janë profesionistë.

Në takimin e parë kemi gabuar vetëm në një moment dhe u mundëm me rezultatin 0-1, por, duke parë cilësinë e të dyja skuadrave, nuk është çudi që jetë Flamurtari të surprizojë në Hungari. Ne jemi optimistë”, – tha mes të tjerash drejtori teknik i Flamurtarit, Ardi Behari.

Bisha Drejtuesit vlonjatë deklaruan disa ditë më parë se nuk do të kishte lëvizje në merkato deri në momentin që do të mbylleshin ndeshjet e Ligës së Europës. Por, 24 orët e fundit gjithçka ka ndryshuar. Alvaro Bisha është zyrtarisht një lojtar i Flamurtarit, pasi ka nënshkruar me të një kontratë dyvjeçare.

Ai është bashkuar me ekipin në stërvitje, por nuk do të jetë i gatshëm për ndeshjen e kthimit në Hungari. Alvaro Bisha kthehet tek ekipi i vendlindjes, pas aventurës së sezonit të kaluar me Vlorën fazën e parë dhe me Tomorin në Superligë të dytën.

Bisha ka bërë një paraqitje shumë të mirë me beratasit, madje ka shënuar edhe një gol, pavarësisht se luan në qendër të mbrojtjes. Nënshkrimi me këtë lojtar shihet si një politikë e klubit vlonjat për të afruar elementë të rinj, të cilët i shërbejnë të ardhmes.

Bisha përforcon kështu repartin e mbrojtjes, pasi pas Kupave të Europës mund të ketë ndonjë tjetër largim nga Flamurtari. Vlonjatët nuk e kanë mbyllur merkaton dhe pas ndeshjes në Hungari me siguri do të ketë zhvillime. Afrime apo largime? Gjithçka mbetet për t’u parë.