Klubi i Flamurtarit ka reaguar pas akuzave të babait të Prognit, në drejtimin e trajnerit Shkëlqim Muça, nëpërmjet drejtorit teknik, Ardi Behari. Vlonjatët i dalin në mbrojtje teknikut të tyre dhe i cilësojnë si trillime gjithçka që thuhet nga prindi i futbollistit. (Marre nga panorama-sport.com)

“E kemi ndjekur jo me pak shqetësim këtë ngjarje që ka kërkuar të ulë imazhin e skuadrës dhe klubit tonë. Në akuzat e bëra në drejtim të trajnerit Muça nuk ka asgjë të vërtetë dhe gjithçka është një trillim i së vërtetës, që ka të bëjë me pakënaqësinë e futbollistit dhe familjarëve të tij lidhur me zëvendësimin e kryer gjatë kësaj ndeshjeje nga trajneri Muça. Reagimi i familjarëve pas ndeshjes, me sharje dhe fyerje ndaj drejtuesit të skuadrës, për të cilat janë vënë në dijeni dhe organet e policisë, përbëjnë shkelje të rregullores së brendshme të klubit tonë dhe, në kushte të tilla, ndaj futbollistit Gerhard Progni është marrë masa e pezullimit për ndeshjen e kthimit të Ligës së Evropës ndaj Honvedit. Sqarojmë se një masë e tillë është marrë edhe ndaj futbollistit tjetër të skuadrës, Gentian Muça për thyerje të disiplinës në skuadër. Ndërkohë, bëjmë me dije se trajneri Shkëlqim Muça gëzon besim të plotë në kryerjen e detyrës në krye të skuadrës së Flamurtarit”, – thuhej në deklaratën zyrtare të klubit. Flamurtari i ka dalë qartazi në mbrojtje trajnerit të skuadrës, ndërkohë që qëndrimi i vlonjatëve ishte barometër edhe për vazhdimësinë e lojtarëve si Progni e Gentian Muça, të cilët nuk pritet të jenë më pjesë e ekipit për sezonin e ardhshëm, duke qenë se tekniku aktual gëzon besimin e plotë të drejtuesve. Gentian Muça: Ika nga Flamurtari Në stërvitjen e djeshme të Flamurtarit binte në sy mungesa e dy futbollistëve që u pezulluan nga klubi për ndeshjen e ardhshme të Ligës së Evropës, Gerhard Progni dhe Gentian Muça. Lojtarët u pezulluan për thyerje të rregullores së brendshme të klubit, por mungesa e tyre në stërvitje dha sinjale të qarta se ata mund t’i kenë dhënë fund para kohe aventurës së tyre me klubin vlonjat. Kontratat e lojtarëve përfundojnë pas ndeshjeve të Evropës, por duket se drejtuesit e klubit ua kanë bërë të qartë se nuk bëjnë më pjesë në planet e trajnerit Muça, me të cilin kanë pasur edhe një përplasje kohët e fundit. Mesfushori Gentian Muça ka thënë se është larguar përfundimisht nga klubi, pasi drejtuesit ia kërkuan këtë gjë. “Nuk jam më pjesë e Flamurtarit. U largova përfundimisht, pasi kështu kërkuan drejtuesit. Sot (dje) bëra dorëzimet edhe ika – ka thënë Muça për ‘Panorama Sport’ – Pse ika? Sepse drejtuesit më akuzuan se kisha bërë spiunin pas një përplasje që ndodhi aty. Nuk dua të përmend emra. Më thanë se i kisha thënë një shokut tim se trajneri e kishte sharë nga stoli. Lojë kalamajsh… kërkuan të më largonin dhe gjetën një pretekst. Trajneri? Fola me të, por më tha se ishte i pafuqishëm, pasi nuk mund të dilte kundër drejtuesve të klubit”. Progni “driblon” babain: Rëndësi ka kualifikimi Gerhard Progni nuk dëshiron të përfshihet në akuzat që ka bërë i ati i tij për trajnerin Shkëlqim Muça, por të mendojë vetëm për ecurinë e Flamurtarit në Evropë, në mënyrë që të mos prishet edhe harmonia brenda ekipit. “Nuk kam asnjë reagim në lidhje me këtë çështje. Më shumë se çdo gjë tjetër, mua më intereson Flamurtari dhe ecuria e tij. Dhashë kontributin tim në ndeshjen e parë të Ligës së Evropës që luajtëm në Vlorë, për aq sa unë isha në fushë. Ajo për mua ishte një humbje e pamerituar, pasi u ndëshkuam kur nuk e prisnim. Madje, ne luajtëm edhe më mirë se kundërshtari. Duhet të më kuptoni për sa i përket qëndrimit tim me gjërat që kanë ndodhur së fundmi, pasi nuk dua të bëhem unë shkaktar për prishjen e atmosferës së skuadrës. Ajo që ka më shumë rëndësi për mua momentalisht është ecuria që do të ketë skuadra në Ligën e Evropës. Shpresoj që në ndeshjen e kthimit gjithçka të shkojë sa më mirë dhe ekipi të kualifikohet për në fazën tjetër”, – ka thënë Progni për “Panorama Sport”. Ai nuk ka dashur të polemizojë as mbi vendimin e klubit për ta pezulluar për ndeshjen e kthimit. “Është vendim i klubit. Nuk dua të komentoj më shumë mbi çështjen e pezullimit, por të zbatoj atë që ka vendosur klubi”, – shtoi ai. Në fund, lojtari ka folur mbi të ardhmen. “Unë do pres që të më përfundojë kontrata, pikërisht pas ndeshjeve të Evropës. Do ulem me drejtuesit e klubit dhe do diskutoj mbi të ardhmen time”, – përfundoi Progni. Lutaj: U çudita me zëvendësimet e Muçës Ish-trajneri i Flamurtarit, Edmond Lutaj, e vlerëson takimin e parë të Ligës së Evropës mes Flamurtarit dhe Honvedit si një ndeshje të nivelit mesatar. Sipas tij, vlonjatët kishin dëshirë të fitonin, por u mungonte taktika, ndërsa Honvedi mori më shumë nga çfarë kishte menduar. “E ndoqa me vëmendje ndeshjen dhe mund të them se ishte e një niveli mesatar. Honvendi nuk ishte një ekip i një niveli të lartë. Kishin një mbrojtje të stabilizuar dhe një portier tepër cilësor, kurse repartet e tjera mund të them se ishin nën mesataren. Ata morën një rezultat shumë pozitiv, i cili i kalonte parashikimet që kishin para fillimit të takimit. Ndërsa Flamurtari u mundua dhe tregoi dëshirë për të fituar, por për mendimin tim nuk ishte shumë i qartë në mënyrën e kërkimit të golit. Vetëm dëshira është pamjaftueshme për të fituar”. Në vazhdim ish-trajneri i Flamurtarit, Edmond Lutaj, flet për disa mangësi, të cilat u vunë re dhe që sipas tij duhet të rregullohen patjetër në ndeshjen e kthimit. “Nuk e kuptova detyrën taktike të disa prej futbollistëve. Nëse Lenës i duhej të mbështeste sulmin, ai luante shumë larg Pejiçit dhe si rrjedhojë pati probleme për ta furnizuar si duhet sulmin me topa. Me futjen e Memellit në fushën e lojës, Flamurtari kishte dy sulmues potentë në repartin e avancuar, por u çudita me faktin që u zëvendësua edhe Soza, edhe Progni. Duke qenë dy lojtarë krahu, ata ishin edhe personat që duhet të jepnin topa për sulmuesit, mirëpo me daljen e tyre, si Memelli dhe Pejiç nuk patën mbështetjen e duhur në fushë. Përpos sfidës së parë, mendoj se Flamurtari ka potencialin e mjaftueshëm për ta fituar ndeshjen e kthimit dhe për t’u kualifikuar”, – përfundoi analizën e tij Lutaj. Ruci: Mesfusha duhej të ishte më e lëvizshme Ish-trajneri i Flamurtarit, Vasil Ruci, në analizën e tij post- Honved ka treguar për “Panorama Sport” shkaqet që e çuan këtë skuadër të dështonte në shtëpi. Sipas tij, kuqezinjtë kanë lojtarë cilësorë dhe në rast se do të ishin më shumë organizatorë në fushë, do t’ia dilnin mbanë të përmbysnin gjithçka. “Flamurtari në kontingjentin e vet ka lojtarë mjaft cilësorë, gjë që u pa edhe në fushën e lojës. Në rast se ata do të ishin treguar edhe pak më tepër organizatorë e të lëvizshëm, mund të kishin bërë mrekullinë ndaj Honvedit”. Duke vazhduar më tej prononcimin e tij, legjenda vlonjate Ruci shprehet optimist për të ardhmen e Flamurtarit. Sipas tij, historia e vlonjatëve në Ligën e Evropës, ku shpresohet përballja me Etonë, nuk do të mbyllet këtu. Sipas Rucit gjithçka do të varet nga 90 minutat e tjera, që do të jenë decizive për ekipin e drejtuar nga Shkëlqim Muça. Dhe të gjithë pa dyshim shpresojnë te përmbysja e rezultatit në Hungari. “Edhe pse rezultati i ndeshjes së të enjtes nuk ishte në favor të Flamurtarit, ai nuk ka humbur. Përkundrazi kualifikimi do të jetë i hapur. Kësisoj, gjithçka do të varet nga paraqitja e ekipit në ndeshjen e kthimit me hungarezët e Honvedit. Nuk mund të them se rezultati 1-0 është i thellë dhe përbën ndonjë dramë për kuqezinjtë, përkundrazi aspak. Gjithçka mund të ndryshojë në 90 minutat e tjera që do të vendosin përfundimisht se cila prej skuadrave do të kualifikohet për në turin tjetër, ku do të përballen me një tjetër rival, atë të Anzhit. Megjithatë, kam besim se lojtarët e Flamurtarit, duke i vënë në zbatim këshillat e dhëna, do të dinë të dalin kryelartë nga ky kompeticion”, – ka përfunduar ish-trajneri i Flamurtarit, Vasil Ruci. Alvaro Bisha, pranë firmës Mbrojtësi Alvaro Bisha ka nisur dje stërvitjen me skuadrën e Flamurtarit. Lojtari, i cili fazën e dytë të sezonit që sapo përfundoi e zhvilloi me Tomorin, është shumë pranë akordit me klubin vlonjat dhe pritet që në ditët e ardhshme të firmosë një kontratë 1-vjeçare. Ai ishte në tratativa edhe me klubin e Bylisit, por nuk kanë arritur dot një marrëveshje. E.Sika