Ka mjaftuar një denoncim i trajnerit të Flamurtarit, Shkëlqim Muça, parmbrëmë në përfundim të Flamurtari – Honved (0-1), që policia e Vlorës të thërrasë babain e futbollistit Gerhad Progni, me pandehmën se ka kanosur e kërcënuar trajnerin kryeqytetas lidhur me zëvendësimin e tij në ndeshjen e vlefshme për Europa Ligë. (marre nga sportekspres.com)

Nik Progni i është përgjigjur thirrjes së uniformave blu dhe për rreth një orë e gjysmë, nga 12:00 deri në 1:30 të mëngjesit të ditës së premte, në mjediset e stadiumit “Flamurtari” është sqaruar mundimshëm gjithçka dhe palët janë ndarë pa u marrë ndonjë masë shtesë nga ana e policisë. Ngjarja Progni ka qenë titullar në ndeshjen e së enjtes kundër hungarezëve të Honvedit. Në 60’, trajneri Mua e ka zëvendësuar, çka nuk është kapërdirë nga lojtari, por sidomos nga i ati, Nik Progni, që është dhe menaxher i të birit, “vetëm për kampionatin shqiptar”, thotë ai”, pasi nuk jam i pajisur me liçensë për transferime ndërkombëtare”. Sipas trajnerit, ndërrimi ka qenë thjesht i karaktereit teknik, ndërsa menaxheri pretendon se ky ka qenë një qëndrim në vijimësi i trajnerit ndaj lojtarit dhe se veçanërisht në ndeshjen e parmbrëmshme ai duhej të ishte në fushë, pasi ndaj tij ishte shfaqur interes nga menaxherë të huaj. Lidhur me këtë, babai menaxher ka kërkuar të flasë me trajnerin. “Doja të kërkoja sqarime pse e zëvendësoi Prognin”, thotë Nika. “Më kërcënoi e më ofendoi”, thotë Muça që ka njoftuar policinë. Vendimi i klubit Drejtuesit e klubit vlonjat i kanë komunikuar futbollistit se është i pezulluar deri më datë 12 korrik. Meqë, ashtu sikurse thuajse të gjithë lojtarët e tjerë, edhe Progni ka qenë me një kontratë periodike për deri në fund të aventurës në Europa Ligë, ka të ngjarë që rrugët të jenë ndarë përfundimisht me trajnerin Muça. Bomba e babait të Prognit: “Muça më kërkoi para!” Nik Progni që bën dhe menaxherin e të birit: Që kur ishte te Dinamo ma pat bërë një gjë të tillë. Atëherë pranova… “Nuk më prish punë të prezantohem si babai i Gerhardit, por në fakt dua të denoncoj si menaxheri i futbollistit. Në fakt marrëdhëniet tona janë prishur që kur Muça ka qenë trajner te Dinamo e Gerhardi luante për të. Më ka kërkuar para dhe unë ia kam dhënë, por asnjëherë nuk është sjellë si profesionist me lojtarin. Nisur nga këto marrëdhënie, pasi kemi rënë dakord me drejtuesit e Flamurtarit, këtu e dy vjet më parë, i vetmi kusht, në fakt i pashkruar, ka qenë që do ta tërhiqja lojtarin nëse në krye të skuadrës do të vinte Muça. Dhe fati e solli që ky trajner të vijë në Vlorë”, nis prononcimin Nik Progni, që kërkon të thotë se përkundër faktit që është me prejardhje nga Tropoja, në Vlorë e kanë pritur mjaft mirë Gerhardin. E duan dhe e respektojnë. Me këtë lloj tendosjeje, lojtari ka vijuar të jetë edhe këto gjashtë muaj, periudhë në të cilën drejton Muça. Por të mbarsura kësisoj, është pritur vetëm “shkëndija” që gjërat të “pëlcasin”. Sipas, Nik Prognit, “isha me makinën time dhe me një person në të që mund të shërbejë edhe si dëshmitar përsa po ju them. Kam ndaluar në afërsi të pallatit ku banon edhe Gerhardi, edhe Lena, edhe trajneri Muça. Në një nga palmat në trotuarin para pallatit ishte trajneri. I kam thënë që mund ta çoja në stadium me makinën time, por refuzoi”. Nuk dihet se si ka vijuar biseda – dëshmia ka një kapërcim – por, sipas Nikës, trajneri i ka thënë: “E fus djalin në fomacion po më dhe 1 milion lekë”. Dhe këputet sërish dëshmia… “E hoqi lojtarin në 60’ dhe për këtë kam kërkuar të më japë spjegime. Por Muça i interpretoi si kërcënime dhe thërriti policinë. Vetë takimi që bëmë me policinë dha të kuptohet qartë se nuk qëndronte asgjë nga ato që kishte thënë trajneri, pasi ndryshe nuk do të më linin të lirë”, thotë Nika, që mbyll duke lajmëruar se, “po pres vendimin e klubit, më pas do të shoh dhe mundësinë e lëvizjes. Me këtë trajner është shumë e vështirë, për të mos thënë e pamundur…”. Trajneri: Shpifje e ndyrë! Kërcënoi, njoftova policinë “Si mund t’i kërkoj para, të mos ia marr dhe pastaj ta fus në lojë? Qesharake, por tendencioze për imazhin tim” Mirë humbja dhe prag eliminimi nga Europa Ligë, por Shkëlqim Muçën nuk e lënë të qetë as problemet jashtë fushe. Lidhur me atë që ka ndodhur me babain – menaxher, trajneri kryeqytetas fillimisht ka neglizhuar të flasë, por më pas është kujtuar se ngjarja, e interpretuar vetëm nga një krah, mund të kishte “pasojë”për të. Siç e tha edhe vetë, “është prishje imazhi edhe unë do ta kërkoj këtë”. Trajneri mohon kategorikisht të ketë patur bisedë para ndeshjes me të atin e Prognit (gjatë gjithë kohës, Muça shmang termin menaxher) dhe se e tëra është një sajesë, “tani që e shikon se sa dëm i ka bërë djalit, pas pezullimit që i dha klubi”. “Pas ndeshjes”, rrëfen ngjarjen Muça, “babai i lojtarit më ka marrë në telefon. Më kërkonte llogari përse e zëvendësova Gerhardin. I thashë se ka qenë një zgjedhje taktike, ndërsa ai nisi të më ofendonte e më pas më tha se i kisha prishur punë ngaqë kishin ardhur menaxherë për ta parë dhe se në tribunë ishte dhe trajneri i përfaqësueses. Pasi vijoi me ofeza e kërcënime, jam detyruar të njoftoj shefin e policisë që e ka telefonuar, duke i thënë që të vinte menjëherë, “përndryshe do të të gjejmë ne ku je”, i tha ai. Ka ardhur në hollin e stadiumit, aty ku është bërë dhe ballafaqimi. Mohoi gjithçka më kishte thënë në telefon. Prezent ka qenë dhe drejtori Behari. Policia u mjaftua t’i thotë që të mos më shqetësonte më dhe u larguam”, mbyll mbrëmjen e gjatë të së enjtes trajneri. Dje, që në mëngjes, Muça ka njoftuar zyrtarisht klubin për ngjarjen e për rrjedhojë ka ardhur dhe pezullimi i Prognit për deri më datën 12 korrik. “Gjithë pjesa tjetër është veçse një shpifje e ndyrë. Unë përbuz të flas për banalitete të tilla që nuk kanë vend në një mjedis profesionist. E kuptoj dhembshurinë e një prindi, por jo të të erren sytë e të kalosh në fjalë e veprime të tilla që refuzoj dhe t’i komentoj. Teknikisht po ju them se, përkundër gjithë pretendimeve të babait, që kur kam ardhur në Vlorë, Gerhardi ka qenë sistematikisht lojtar titullar. Dhe po ju them se ka qenë në planet e mia edhe për skuadrën e sezonit të ardhshëm”. Ka qenë, thotë Muça. A do të jetë? Vështirë! Dhe mbyllja e trajnerit: “Është një përpjekje për të më prishur imazhin. Kam 20 vjet që merrem me futboll dhe të gjithë e njohin personalitetin tim!”. Pezullohet dhe Gentian Muça Për drejtorin teknik, Behari, ka qenë sjellje jo korrekte; për mesfushorin është një …“telefon i prishur” Në pushim të ndeshjes me hungarezët ka patur dhe një moment tjetër polemike. Ka qenë thuajse një “telefon i prishur”: mesfushori Gentian Muça pranon të ketë thënë diçka, që sipas tij nuk ka patur aspak lidhje me drejtorin teknik, Ardi Behari, por që ky i fundit, i ndodhur aty pranë, e ka keqkuptuar sikur është folur në adresë të tij. Ka vijuar një zënkë e vogël, ndërsa dje, drejtori Behari, në prani të trajnerit Muça, ka thirrur futbollistin. Edhe pse Gentiani ka kërkuar të sqarohet keqkuptimi sipas tij, Behari ka qenë i prerë: “Merr materialet personale dhe largohu nga grumbullimi. Deri më datën 12 korrik je i pezulluar”. Në fakt, thuajse të gjithë lojtarët e Flamurtarit janë me kontratë periodike (deri në fund të përfaqësimit në Europa Ligë), çka do të thotë që, me shumë gjasë, Gentian Muça nuk do të jetë më pjesë e Flamurtarit. Tre kokat drejtuese diskutojnë humbjen Pas humbjes në shtëpi ndaj Budapest Honved me rezultatin 0-1, drejtuesit e skuadrës së Flamurtarit janë mbledhur paraditen e djeshme për të diskutuar rreth ndeshjes. Presidenti Gjika, shefi i klubi Çipi dhe trajneri Muça janë takuar për të analizuar humbjen. Persona pranë tyre janë shprehur që ka qenë thjesht një takim që është bërë për të diskutuar rreth udhëtimit drejt Budapestit për ndeshjen e kthimit, por në fakt nuk është kjo ëe vërteta. Vlonjatët, pas përfundimit të ndeshjes, kanë dalë të zhgënjyer nga stadiumi për shkak të lojës që tregoi skuadra kuqezi, pavarësisht se trajneri Muça në përfundim u shpreh: “Djemë luajtën mirë dhe u ndëshkuam në një moment ku mbrojtja jonë ishte e papërgatitur”. Nga burime pranë drejtuesve mësohet se tema e bisedës ka qenë loja që skuadra zhvilloi, ritmi, mungesa e golit dhe zëvendësimet e bëra me vonesë. Për hir të së vërtetës, të gjitha këto ishin defekte që u konstatuan në ndeshjen e parë të Flamurtarit në Kupat e Europës për këtë sezon. Trajneri Muça është shprehur së skuadra e Flamurtarit do ta ketë të vështirë të fitojë në Hungari, por djemtë e tij do të provojnë gjithçka. Pavarësisht mendimit të trajnerit, presidenti Gjika dhe shefi Çipi nuk kanë shprehur shumë besim tek justifikimi për një përmbysje të rezultatit. Historikisht, skuadra e Flamurtarit, në 24 ndeshje të zhvilluara deri tani në Kupat e Europës nuk e ka përmbysur asnjëherë rezultatin. Kjo nuk ka ndodhur as në vitin `87 kur Flamurtari kaloi tuirin ndaj Partizan Beogradit, përmes një goli “fushe” të Kushtës. Një vit më pare, fitoi 3-1 ndaj Buduçnostit në Podgoricë, por skuadra aktuale nuk është në kalibrin e asaj “malazeze”, me lojtarë që bënin diferencën dhe fitonin jashtë fushe. Tej arkivës, pas përfundimit të takimit tresh Gjika – Çipi - Muça, asnjëri prej tyre nuk ka zyrtarizuar objektivin që do të synojë të bëjë realitet Flamurtari në ndeshjen e kthimit më 12 korrik në Budapest. MOISI DALIPI Me Honvedin “shpëtojnë” shumë pak, Flamurtari zhgënjen kolektivisht Telushi, Veliu, Mici dhe Pejiç janë të paktët që arritën të jepnin diçka në fushë, ndërsa shumë dobët Soza, Pezo dhe Lena, nga të cilët pritej më shumë. Memelli i sakrifikuar, s’mund të bënte më shumë me vetëm tre stërvitje Momenti europian pritej si të ishte mbrëmja e ndërrimit të viteve dhe, në sajë të përgatitjeve, ishin ndezur edhe dritat në stadiumin “Flamurtari”, përuruar biletat elektronike dhe shumë e shumë risi të tjera të infrastrukturës. Pra, një parapërgatitje e cila arriti të gjente edhe përkrahjen e tifozerisë, që nuk mungoi, por që e shumtë në numër, u ul në stolat e stadiumit, duke lënë për një ditë plazhin, ose punët. Por, në fushë, kuqezinjtë jo vetëm që nuk ia shpërblyen, por përveç volumit të lojës, nuk arritën që ta dërgonin topin në rrjetën e kundërshtarit. Diçka kjo e cila ka irrituar jo pak jo vetëm tifozerinë vlonjate, por sidomos edhe drejtuesit e klubit, duke nisur nga kryebashkiaku Gjika, që edhe pas ndeshjes ka qenë i acaruar me sjelljen e disa futbollistëve në fushë. Pavarësisht fjalëve të trajnerit Shkëlqim Muça, “të gjithë dhanë maksimumin”, kritikat për këtë Flamurtar janë të ligjërura. Motivi? Sepse pritej që sulmi të bënte çudira, por nuk ndodhi. Sepse pritej që entuziazmi të ishte i madh në fushë dhe nuk ndodhi. Sepse pritej të paktën një gol, por nuk erdhi. Atëherë, lind pyetja: çfarë nuk ka shkuar? Vetëm Mici shpëton–Nëse në portë nuk ka asnjë faj për portierin Koliqi në momentin e golit, për mbrojtjen s’mund të thuhet e njëjta gjë. Në fakt, avantazhi i hungarezëve ishte një gabim kolektiv, por sidomos i qendrës së mbrojtjes, e cila duhet të ishte më e vëmendshme, sidomos Brahja, të cilit arriti t’i çmarkohej kundërshtari në momentin e goditjes në portë. Por, edhe Veliu nuk është se bëri një ndeshje të madhe, edhe pse duhet thënë se në dy momente iu afrua në golit në specialitetin e tij, goditjen e dënimit. Për t’u harruar edhe paraqitja e Arbrit, ndërsa një notë pozitive shkon për më të mirin në fushë, të ardhurin e merkatos së verës, Micin, i cili e nisi ndeshjen “i rezervuar” dhe e mbylli në sulm. Po Lena?–Ndërsa, për sa i përket mesfushës, një KO të madhe meriton edhe Nijaz Lena, mesfushori maqedonas i cili gjatë gjithë ndeshjes nuk luajti në nivelet që jemi mësuar të shohim. Me shumë skarcitet në pasin e fundit, edhe pse nuk i mungoi grinta. E njëja gjë mund të thuhet edhe për Pezon, i vendosur në “kabinën” e regjisë, por tepër i bllokuar nga kundërshtarët. Surpriza më e bukur ishte Bruno Telushi. Mesfushori tregoi vlerat e tij dhe, madje, befasoi të gjithë, sidomos në pjesën e dytë, kur edhe ishte më aktivi për Flamurtarin. Ndërkaq, sulmi, përveç Pejiçit, la për të dëshiruar. Nuk është se kroati bëri gjëra fantastike, por të paktën u mundua, ndërsa e njëjta gjë s’mund të thuhet për Prognin dhe Sozën. Pikërisht te argjentinasi ishin sytë e të gjithëve, por zhgënjeu dhe konfirmoi faktin se forma e tij është ende larg të qenurit mirë. Për Memellin, komenti do të ishte i tepërt, pasi me vetëm tre stërvitje s’mund të bëhej më shumë. Merkato–Edhe pse pritet ende ndeshja e dytë, sipas burimeve brenda klubit, pakënaqësitë mund të çojnë deri në rikthimin në merkato dhe largimin e dikujt. Një gjë është e sigurtë, të gjithë janë në “monitorim”. A.Cicani Tifozët “kërcënojnë” me bojkot “Nëse Flamurtari fiton, atëherë do të bëjmë çmos që të organizohemi dhe të udhëtojmë deri në Budapest për të ndjekur sfidën me Honvedin”. Këtë premtim kishin bërë tifozët vlonjatë përpara sfidës së Europa League, por humbja brenda fushës ka sjellë edhe zhgënjimin e tyre të madh: “Tani jo vetëm që s’do të udhëtojmë në Budapest, por ka mundësi që të mos shkojmë në stadium as në ndeshjet e para të kampionatit, në shenjë proteste dhe bojkoti”. Nuk ka pushim, ekipi stërvitet Edhe pse ekipi ka konsumuar jo pak në ndeshjen e së enjtes, dje mbasdite në ora 18:00, skuadra ka dalë në seancë të rregullt stërvitore. Vrapime të lehta dhe streçing kanë qenë ushtrimet e para të zhvilluara për të vazhduar më pas me taktikë dhe disa minuta lojë. Edhe sot skuadra e Flamurtarit do të zhvillojë një seancë stërvitore. M.D