Në mungesë të një ndeshje miqësore, ditën e shtunë, trajneri Shkëlqim Muça ka zhvilluar një ndeshje kontrolli brenda grupit. Takimi është luajtur në orën 20:30, pikërisht në orarin që do të zhvillohet ndeshja Flamurtari – Budapest Honved. Edhe pse ishte thjesht një ndeshje kontrolli, nuk ishte e vështirë të kuptohej se

tek çdo futbollist kishte dëshirë dhe ambicie për të bërë një paraqitje sa më të mirë. Interesi dhe vëmendja ishte përqendruar tek dyshja e sulmit, Pejiç - Memelli. Trajneri Muça pret shumë nga kjo dyshe, e cila do të ketë në dorë fatin e skuadrës. “Ata të dy kanë pak ditë që stërviten dhe punojnë bashkë si partnerë për vijën e parë të sulmit tonë. Jam shumë i kënaqur nga ata dhe kam arritur në konkluzionin që bashkëpunimi i tyre është shumë efikas. Jam i sigurtë që në Kupat e Europës ata do të bëjnë një paraqitje shumë të mirë dhe falë këtij bashkëpunimi, skuadra do të bëjë paraqitje shumë të mira”, është shprehur trajneri Muça. Nga ana tjetër, të dy futbollistët janë ndjerë mirë gjatë gjithë ndeshjes. Dikush më parë, duke menduar karakteristikat e të dy këtyre sulmueseve edhe mund të ketë menduar ndryshe, por fakti tregoi se gjithçka funksionon mirë me dyshen Pejiç-Memelli.

Ndryshimi i skemës - Ardhja e sulmuesit Migen Memelli solli ndryshimin e skemës tek Flamurtari. Vendosja e mëparshme 4-2-3-1, me Pejiçin të deklaruar në vijën e parë, duket se është lënë pas dhe tani Flamurtari do të luajë me vendosjen klasike, 4-4-2. Kësaj skeme i përshtaten mjaft mirë zgjedhjet e bëra në repartet e tjera. Me Koliçin si titullar, porta është e sigurt. Në mbrojtje me Arbërin nga e djathta dhe Micin në të majtë, ndërsa dyshja e qendrës, Veliu-Rajoviç është për t’u vlerësuar. Mesfusha ka shumë rivalitet, sepse për një vend titullari janë në garë tetë futbollistë. Deri tani, Pezo, Telushi, Progni dhe Lena janë zgjidhjet më të mira, por nuk përjashtohen që të tjerët si Soza, Çela, G.Muça e Pepa, të kenë mundësi për të qenë pjesë e mesfushës së Flamurtarit.

Hungarezët “dalin zinxhirësh”,

trajneri Muça “terrorizohet”

Kreu i stolit vlonjat e ka

ndjekur sfidën në tribunë

Dje në mëngjes, trajneri Muça është nisur drejt Budapestit, ku ka ndjekur nga afër kundështarin e radhës të ekipit të tij në një ndeshje miqësore që ka zhvilluar në stadiumin e vet, përballë Vezhprem FC, skuadër e Kategorisë së Dytë në kampionatin hungarez. Honved ka fituar me një rezultat të çmendur, 9-1, gjë që do ta ketë tronditur trajnerin Muça, që doshta është më mirë që e pa “live” se çfarë janë në gjendje të bëjnë kundërshtarët e tij.

Klubi nxjerr 6 mijë bileta në shitje

Dje, drejtuesit e klubit të Flamurtarit bënë të ditur se, nëpërmjet kompanisë që ka marrë përsipër monitorimin e bilateve të kësaj ndeshje, ka hedhur për shitje rreth 6 mijë bileta. Shitja e tyre ka tre ditë që ka filluar dhe deri tani ka një ecuri të mirë. Ndërkohë, në ditën e parë të shitjes disa tifozë të skuadrës vlonjate kanë kundërshtuar çmimin e biletave 3000 lekë për tribunën qëndrore, 100 lekë në tribunat A, B e C dhe 500 lekë tek harqet. M.D.

sportepkspres