Trajneri i Flamurtarit, Shkëlqim Muça, e ka lënë punën për një ditë me ekipin, ndërsa është nisur në drejtim të Budapestit. Mbrëmjen e djeshme ai ka ndjekur një miqësore të rivalit të tyre, Honved, me të cilin Flamurtari do të ndeshet në Ligën e Evropës më 5 korrik. Numri një i pankinës vlonjate, Shkëlqim Muça, ka qenë i shoqëruar në këtë udhëtim nga disa specialistë kuqezinj,

të cilët me laps në dorë kanë nxjerrë anët e dobëta, por edhe ato të forta të kundërshtarit. Në këtë mënyrë tekniku spiunon rivalin, duke e njohur më nga afër. Në një bisedë për “Panorama Sport” trajneri Shkëlqim Muça u shpreh se e njihte disi ekipin, ndërsa vajtja në Hungari ka krijuar më shumë njohje. “Është një kundërshtar me traditë dhe pa dyshim një ekip i fortë”. Megjithatë, për trajnerin Muça, Flamurtari ka shanse për ta kaluar turin e parë. “Sa i përket nivelit, mund të them se jemi të barabartë me kundërshtarin, ndaj edhe shanset për ta kaluar një tur ekzistojnë, për shkak se përgatitja nuk ka munguar”. Muça e ka shfrytëzuar udhëtimin në Hungari edhe për t’u njohur më nga afër me stadiumin, ku do të luhet ndeshja e kthimit. Reagimi Pas shqetësimit të tifozëve për çmimet e biletave kanë reaguar edhe drejtuesit e Flamurtarit. “Jemi në mbështetje të plotë të tifozëve dhe shqetësimit të tyre. Është një reagim i drejtë, por në këtë çështje klubi i Flamurtarit nuk ka asnjë kompetencë. Rritja e çmimit të biletave është kryer nga kompania private, me të cilin ne kemi një kontratë dhe nuk mund të ndërhyjmë në përcaktimin e çmimit”. Më tej, drejtuesit e klubit e pranojnë edhe vetë se çmimet e biletave janë relativisht të larta, ndërsa kërkojnë nga ana tjetër edhe mirëkuptimin e tifozëve. “Çmimet janë të larta dhe ne jemi të ndërgjegjshëm për këtë. Nuk kemi se çfarë të bëjmë, edhe pse do të dëshironim që të kishte sa më tepër pjesëmarrje në stadium në mbështetje të Flamurtarit. Do të ishte mirë që kompania të mund të reagonte pozitivisht duke krijuar disa lehtësira. Ne nuk kemi në dorë asnjë vendimmarrje, kërkojmë mirëkuptimin e tifozëve”, – bëjnë me dije drejtues të klubit. Një ditë më parë, përfaqësuesit e dy shoqatave të tifozëve, “Flota Kuqezi” dhe “Dragonjtë kuqezi”, në emër të të gjithë tifozëve në Vlorë, u kërkuan drejtuesve vlonjatë të rishikonin çmimet e biletave. Kompania private ka vendosur që çmimi i biletës në tribunën qendrore të jetë 3000 lekë, në tribunat A, B dhe C 1000 lekë, ndërsa në tribunën D 500 lekë. Veliu i lë të hapura ofertat: Vendos pas Evropës Franc Veliu i ka lënë të hapura të gjitha ofertat që ka marrë gjatë kësaj kohe, ndërsa do të vendosë pas Evropës. Oferta e fundit që ka marrë mbrojtësi është nga Lugano në Zvicër, ndërsa nuk kanë munguar kërkesat as nga klubet turke, greke, moldave, por edhe shqiptare. Në një prononcim për “Panorama Sport”, Veliu ka theksuar se dëshira e tij është të qëndrojë te Flamurtari, por gjithsesi do të vendosë pas Evropës. “Jam një lojtar profesionist dhe si i tillë nuk kam se si t’i mbyll shtigjet. Vendimin do ta marr në kohën e duhur, por së pari duhet të ulem e të diskutoj me presidentin Gjika. Kjo mundësi mbetet pas Evropës, kur mua më përfundon edhe kontrata me Flamurtarin. Dëshira është të qëndroj në Vlorë, por gjithçka do të varet edhe nga bisedimet që do të kem për kontratën e re”. Duke folur për ndeshjet e Evropës, Franc Veliu e shikon të vështirë përballjen me Honvedin, por shpreson te kalimi i turit. “Besoj se do të jetë një ndeshje e vështirë. Mund të them se gjendja e ekipit është e mirë edhe pas stërvitjes intensive që kemi bërë në fazën përgatitore në Ohër të Maqedonisë. Jemi duke u njohur me ekipin kundërshtar, sigurisht që është i fortë, por edhe ne nuk mbetemi pas për nga niveli. Do të bëjmë gjithçka për ta kaluar një tur”. “Kampionat i vështirë, të bëjmë kujdes” “Duhet të bëjmë kujdes, pasi kampionati i ardhshëm do të jetë edhe më i vështirë”. Kështu shprehet në një prononcim për “Panorama Sport” drejtori teknik i Flamurtarit, Ardi Behari. Ai ka ndjekur nga afër shortin e hedhur pak ditë më parë nga FSHF-ja, së bashku edhe me specialistin pranë klubit vlonjat, Petraq Bifsha. Behari më shumë sesa te cilësia e ekipeve, e ka vënë theksin te skema e re e kampionatit. “Skema e re e bën kampionatin edhe më të vështirë. Çdo ndeshje duhet të luhet me kujdes. Pra, kemi të bëjmë me një kampionat që nis i vështirë që në fillim dhe jo në fund, siç ka ndodhur deri më tani. Kjo pasi tani në garë do të jenë 12 skuadra, ndërsa 4 do të bien direkt nga kategoria. Në këto kushte, çdo ekip duhet t’i bëjë mirë llogaritë që në fillim”.<div>panorama-sport</div>