Trajneri i Flamurtarit, Shkëlqim Muça, shprehet mjaft i kënaqur në lidhje me fazën përgatitore që ekipi zhvilloi në Ohër të Maqedonisë. Në një prononcim për “Panorama Sport” tekniku flet edhe për ndeshjet e Ligës së Evropës,kundërshtarin dhe për merkaton. “Jam mjaft i kënaqur me

,fazën përgatitore që ekipi zhvilloi në Ohër. Bëmë detyrën dhe them se e kemi realizuar çdo gjë më së miri. Ishte një fazë përgatitore, e cila i përgatiti futbollistët në maksimum, duke qenë se ajo ishte me intensitet të lartë. Mund ta vlerësoj si një fazë të suksesshme”. Evropa Muça shprehet se Flamurtari në fazën përgatitore mendoi për Kupat e Evropës dhe se aktualisht kjo është edhe primarja në një kohë që ekipi ka mësuar edhe kundërshtarin. “Kundërshtari i Flamurtarit në Ligën e Evropës është Budapest Honved. Jam njohur me këtë ekip, madje mund të them se po e forcojmë dita-ditës këtë njohje. E vlerësoj si një kundërshtar me tradita dhe të fortë. Për sa i përket nivelit, mund të them se jemi aty-aty në krahasim me kundërshtarin, ndaj edhe kemi shanset tona për të kaluar më tej”. Nëse vlonjatët kalojnë turin e parë, do të përballen me një ekip edhe më të vështirë, me rusët e Anzhit, por trajneri nuk ka komentuar më tej, duke qenë se më parë duhet të përfundojnë ndeshjet e turit të parë. Muça shprehet mjaft i kënaqur teksa flet për merkaton, ndërsa pa dyshim Memelli mbetet edhe blerja më e madhe. “Jam i kënaqur nga merkatoja. Blerjet janë cilësore. Falënderoj edhe klubin për plotësimin e grupit me lojtarë cilësorë”. Por, teksa flet më tej për afrimet dhe largimet e kësaj merkatoje trajneri Muca shprehet: “Pjesë e Flamurtarit do të jenë ata që e meritojnë. Shprehem kundër atyre që janë thënë se unë jam kundër lojtarëve vlonjatë. Nuk janë të vërteta. Si futbollistët vlonjat, ashtu edhe të tjerët, do të luajnë te Flamurtari nëse e justifikojnë. Ju them me bindje të plotë se nuk jam kundër vlonjatëve. Po të shikoni unë kam aktualisht në ekip 4 futbollistë të rinj nga ky qytet që vijnë nga ekipet e moshave. Ata që janë larguar nuk e kanë merituar të jenë në këtë skuadër. Unë jam specialist dhe e kam thënë edhe njëherë se paguhem për të përzgjedhur një ekip cilësor, ndërsa lojtarët për të luajtur”. I pyetur për Flamurtarin e së ardhmes dhe nëse grupi aktual është pretendent për kampionatin e ardhshëm, trajneri përgjigjet: “Flasim më vonë për këtë çështje, do të kemi kohë. Tani jemi të përqendruar te Liga e Evropës”. Megjithë deklaratat koncize, trajneri Muça nuk ka fshehur kënaqësinë dhe bindjen e tij për këtë grup që, ndoshta, edhe me ndonjë blerje tjetër pas ndeshjeve të Kupës së Evropës do të jetë pretendent për titullin. Në Vlorë të gjithë janë të përqendruar te ndeshja e parë e Ligës së Evropës, që do të luajnë më datën 5 korrik ndaj skuadrës hungareze të Budapest Honved. Memelli: Direkt në fushë? Atë e di trajneri Flamurtari i rikthehet fushës së stërvitjes në Vlorë pas fazës përgatitore. Ora 19:00 ka shënuar nisjen e stërvitjes në fushën sportive në Pyllin e Sodës. Çka binte në sy ishte fakti se të gjithë futbollistët ishin pjesë e kësaj stërvitje, ndërsa shfaqin dukshëm një gjendje mjaft të mirë. Edhe më të rinjtë si Pepa, Mici e deri te Memelli janë bërë pjesë e kësaj stërvitjeje të parë pas fazës përgatitore në Ohër. Memelli ishte në një formë mjaft të mirë dhe shumë i lëvizshëm në fushën stërvitore. I pyetur nëse do të aktivizohej në ndeshjet e Ligës së Evropës, me modesti dhe buzëqeshje u shpreh: “Atë e di trajneri”. Çmime “të çmendura”, 30 mijë lekë një biletë Klubi i futbollit Flamurtari dhe kompania private që menaxhon takimet e skuadrës vlonjate në fushën e vet, kanë përcaktuar dje edhe çmimet e biletave për të gjitha tribunat për ndeshjen, e cila do të luhet më 5 korrik në Vlorë, ku Flamurtari do të presë hungarezët e Budapest Honved në kuadër të sfidës së parë të turit të parë paraeliminator të Ligës së Evropës. Kështu, një biletë në tribunën qendrore do të kushtojë 30 mijë lekë të vjetër, në tribunat A, B dhe C 10 mijë lekë të vjetër, ndërsa në tribunën D 5 mijë lekë të vjetër. Çmime paksa të shtrenjta këto për të ndjekur një sfidë të Ligës së Evropës. Për më tepër që skuadra që do përballen nuk është e ndonjë niveli të lartë dhe ka në përbërje të saj lojtarë mesatarë. Gjykon një luksemburgas pa eksperiencë Është përcaktuar dje dita dhe orari i ndeshjes së parë të Ligës së Evropës, Flamurtari-Budapest Honved. Ky takim do të luhet më 5 korrik në orën 20:30 në stadiumin “Flamurtari” në Vlorë. Ndërkaq, dje UEFA ka bërë të ditur edhe gjyqtarin e kësaj ndeshjeje. Sfida do të drejtohet nga arbitri kryesor nga Luksemburgu, Sven Bindels. Ky i fundit është 33 vjeç dhe ka debutuar në kampionatin vendës në vitin 2008. Vetëm 1 vit më parë arriti të ngjitej nga kategoria 4 në të 3- ën. Në nivel ndërkombëtar ka arbitruar disa takime zyrtare eliminatore të U-21 dhe një vit më parë drejtoi sfidën e parë në Ligën e Evropës, Fuglafjorour(Ishujt Faroe)-Kr (Islandë). Trajneri kontrollon fushën e stadiumit Trajneri Shkëlqim Muça shfaq edhe njëherë shqetësimin e tij të vjetër për gjendjen e fushës së stadiumit “Flamurtari”. Sapo ka hyri në stadium ai ka shkuar menjëherë te fusha duke parë me vëmendjen më të madhe gjendjen e terrenit, si dhe investimin e kryer për vendosjen e stolave. Pasi ka vëzhguar situatën nga cepi në cep, Muça ka shprehur kënaqësinë e tij për investimin. I pranishëm ka qenë edhe shefi i klubit, Geri Çipi, i cili është takuar me futbollistët dhe stafin teknik duke i uruar ata për një punë përgatitore të mbarë gjatë seancave stërvitore të këtyre ditëve në Vlorë, para ndeshjeve të Ligës së Evropës. ERMAL SIKA