Një vizitë e shkurtër në zyrën e kryetarit të Bashkisë së Vlorës, Shpëtim Gjika dhe gjithçka e përapërgatitur ditë më parë është konkretizuar me firmosjen e kontratës, që e mban sulmuesin Migen Memelli dy vjet të lidhur me Flamurtarin. Shumë humor dhe batuta, ndërkohë që për Memellin ishte e tepërt të thoshte se do të bëj maksimumin, pasi një gjë të tillë e

bën gjithmonë. Ndërkohë, drejtuesit e klubit “Flamurtari” kanë bërë gati fanelën me numër 25 për sulmuesin pogradecar. Memelli është aktivizuar edhe më parë me Flamurtarin dhe vetëm në 17 ndeshje që është aktivizuar, ka shënuar 14 gola. “Kam ardhur të luaj dhe të shënoj gola për Flamurtarin”, është shprehur Memelli.
Nga ana tjetër, drejtuesit e klubit vlonjat, me kontratën në dorë kanë nxituar drejt Tiranës për të kryer federimin e futbollistit, me qëllimin për të marrë pjesë në ndeshjet e Europa League. Vetë Memelli ka bërë me dije që do të bashkohet me skuadrën ditën e premte. Trajneri Muça është shprehur i bindur, se me përforcimin e bërë skuadra e tij kompletohet dhe për më tepër vija e sulmit, tashmë është e frikshme. “Është një prurje e rëndësishme dhe e mirëpritur për skuadrën tone, sepse dihen vlerat e sulmuesit Memelli, ndaj uroj që ai të përshtatet sa më mirë me skuadrën, gjë që nuk besoj se do të jetë e vështirë, pasi e ka pasur një eksperiencë në këtë skuadër dhe ka qenë e përsosur”, ka përfunduar trajneri Muça.

“Sindroma Gjika”
Një skuadër më sulmuese se kaq në kampionatin shqiptar, pothuajse është e pamundur. Do të jetë Pejiç e Memelli dhe goli duket i garantuar. Gjika nuk është nga ata që nxitohet, por herë pas here bën ndonjë lëvizje, që të bën të besosh se edhe këtë radhë e ka seriozisht.

Ja si ndryshojnë vlonjatët
Ardhja e sulmuesit Memelli tek Flamurtari ka bërë që trajneri Muça të mendohet për të ndryshuar edhe skemën e vendosjes së skuadrës në fushën e lojës. Tashmë, se do të jetë i detyruar të luajë me skemën 4-4-2 dhe formacioni i parë mendohet të jetë: Koliqi në portë, Sakaj nga e djathta, Mici nga e majta. Veliu e Rajoviç në qendër të mbrojtjes, Soza nga e djathta dhe Progni nga e majta në mesfushë. Pezo dhe Lena në qendër. Pejiç dhe Memelli në vijën e sulmit.

www.sportekspres.com