Zhurma e ditëve të fundit në shtyp, në lidhje me vonesën e rinovimit të kontratave të lojtarëve të Flamurtarit, por edhe për largimet e mundshme nga skuadra vlonjate, kanë detyruar presidentin Shpëtim Gjika të udhëtojë sot urgjent drejt Ohrit. Në fakt, pikërisht sot kuqezinjtë luajnë një ndeshje miqësore ndaj Metalurgut të Shkupit. Burime të sigurta pranë kryebashkiakut treguan për “Panorama Sport”

se ai do të udhëtojë drejt Ohrit për t’i dhënë një mbështetje skuadrës dhe qetësuar në këtë mënyrë disa lojtarë, të cilët kanë dhënë sinjale padurimi për kontratat e reja. “Nuk është çudi që nesër (sot) presidenti t’i mbyllë përfundimisht marrëveshjet me lojtarët më të rëndësishëm”,- tregon për gazetën i njëjti burim. Pritet që Gjika të ulet fillimisht me stafin teknik, për të mësuar ecurinë e përgatitjeve dhe më pas me “senatorët” e skuadrës. Presidenti kuqezi e ka shprehur hapur se do të mbajë 5 të huaj në ekip. Bëhet fjalë për Pejiçin, Pezon, Rajoviçin, Lenën dhe Sozën. Sipas të gjitha gjasave, sot do të arrihet akordi financiar me katër të parët, pasi argjentinasi Soza është nën kontratë për sezonin e ri. Mendohet se kryebashkiaku do të zhvillojë një takim edhe me kapitenin Artan Sakaj, i përfolur se mund të largohet. Vizita e presidentit ka si synim qetësimin e futbollistëve, edhe pse informacionet që vijnë pranë skuadrës, tregojnë se deri më tani çdo gjë ka shkuar mirë dhe nuk ka pasur asnjë problem.
Muça Trajneri Shkëlqim Muça është i bindur se situata në skuadrën e tij është shumë e qetë dhe ai po punon në kushte normale, duke përgatitur Flamurtarin për ndeshjet e Ligës së Evropës. Megjithatë, zërat e ditëve të fundit në shtyp, por edhe thashethemet e përhapura nga tifozët në rrjetet sociale, kanë shqetësuar jo pak trajnerin. I kontaktuar dje nga “Panorama Sport”, ai sqaroi: “Nuk bëj asnjë dallim midis të huajve dhe vendësve që kam në skuadër. Mjafton të vëresh që në ndeshjen e fundit kanë luajtur të gjithë futbollistët që kam në dispozicion”. Kësisoj, Muça hedh poshtë çdo insinuatë për një lloj mënjanimi ndaj lojtarëve vlonjatë. Ditët e fundit kanë qarkulluar shumë zëra për një largim të mundshëm të kapitenit Artan Sakaj, por zyrtarisht nuk ka asnjë vendim nga ana e klubit.

Miqësore me Metalurgun
Flamurtari do të përballet sot në një tjetër miqësore ndaj Metalurgut të Shkupit. Në ndeshjen e parë me këtë ekip, kuqezinjtë fituan 1-0 me gol të Prognit. Pritet që Flamurtari t’i përmbyllë miqësoret në Ohër të hënën, teksa përballë do të ketë Shkëndijën e Tetovës. Më 25 qershor hidhet dhe shorti i Ligës së Evropës, datë në të cilën vlonjatët do të mësojnë kundërshtarin.

“Sirena” zvicerane për Veliun, dilema për Pezon
Mbrojtësi i talentuar i Flamurtarit, Franc Veliu, mësohet se ditët e fundit ka marrë një ofertë joshëse nga një klub zviceran. Burime pranë lojtarit tregojnë se nga të gjitha skuadrat e huaja që janë interesuar deri më tani për të, zviceranët janë më bindës. Megjithatë, emri i klubit nuk bëhet i ditur, ndërkohë që më parë është përfolur rreth interesimit konkret të moldavëve të Sherif Tiraspolit dhe një skuadre turke për mbrojtësin. Veliu është ndër futbollistët më të paguar te Flamurtari, madje njihet edhe si një nga beniaminët e presidentit Shpëtim Gjika. Vështirë që ky i fundit ta lërë të lirë mbrojtësin, në një kohë që synimi për sezonin e ri është fitimi i titullit kampion. Nga ana tjetër, një çështje delikate te Flamurtari duket edhe rinovimi i kontratës së Pezos. Rritja e pretendimeve të lojtarit pritet të mos gjejë mbështetje nga drejtuesit, sidoqoftë kjo mbetet për t’u parë.
JORGIS MEMO

Panorama Sport