Pas 6 qershorit, drejtuesit e klubit të Flamurtarit do të ulen me stafin teknik për të diskutuar në lidhje me afrimet e mundshme. Shkëlqim Muça tregohet i kujdesshëm për të mos deklaruar asnjë emër të mundshëm, duke i cilësuar emrat që qarkullojnë së fundmi si zëra. Mirëpo, në anën tjetër, tekniku nuk nguron të tregojë planet e tij. Ai kërkon që të ndërtojë

një ekip shqiptar, pra në merkato nuk do të realizohen më blerje të huaja. Në një intervistë për “Panorama Sport”, Muça ka folur edhe për Ligën e Evropës, si dhe ka shprehur pëlqimet e tij për ekipet me të cilat Flamurtari mund të ndeshet. Ditët e fundit po qarkullojnë shumë emra futbollistësh që mund të bëhen pjesë e ekipit të ri të Flamurtarit. A mund të na konfirmojë diçka Muça? Jemi me pushime. Bisedimet për sa u përket blerjeve të reja do të nisin pas datës 6 qershor, kur do të kthehemi në Vlorë. Gjatë kësaj kohe ekipi është po ai, nuk do të ketë asnjë afrim tjetër. Natyrisht që kam dëgjuar shumë emra edhe nga mediat, por ata mbeten jo zyrtarë. Momentalisht jemi në këtë pikë që po ju them. Ekipi është shpërndarë për pushime, por edhe klubi gjithashtu. Gjatë këtyre ditëve nuk ka pasur asnjë bisedim të tillë dhe nuk është folur për emra konkretë. Natyrisht që ne kemi planet tona dhe gjithçka do ta nisim në kohën e duhur. Si parashikohet Flamurtari “i ri”, sa i ndryshëm do të jetë nga ai i sezonit që lamë pas? E kam shprehur edhe më parë. Ekipin, në një farë mënyre, e kemi konsoliduar. Nuk do të ketë shumë ndryshime. Do të ketë blerjet e duhura që ne i shikojmë të nevojshme, aty ku na çalon puna dhe duam të jemi më të fortë. Pas 6 qershorit do të bëj propozimet përkatëse te drejtuesit e klubit e do të nisim edhe negociatat. Pas kupave të Evropës, besoj se do ta kemi të formatuar ekipin e ri. Do të afrohen lojtarë të huaj te Flamurtari? Besoj se çështjen e lojtarëve të huaj e kemi mbyllur. Mendoj se nuk ka më hapësira për të afruar të tjerë të huaj, në një kohë kur do të largojmë. Pra, mendoj se nuk është e domosdoshme. Tashmë do të hedhim sytë nga lojtarët shqiptarë, pra nuk mundemi të afrojmë më të huaj. Te Flamurtari do të qëndrojnë vetëm 5 të tillë. Aktualisht cili është objektivi juaj? Pa dyshim që të paraqitemi denjësisht në kupat e Evropës. Për këtë do të nisin përgatitjet serioze pas datës 6 qershor, por edhe në fazën përgatitore që do ta zhvillojmë në Maqedoni. Duhet të bëjmë një lojë dinjitoze në këtë kompeticion. Edhe nga ana e futbollistëve nuk do të na mungojë një përqendrim i tillë, pasi edhe ata mezi po i presin këto ndeshje. I njihni rivalët dhe keni ndonjë preferencë? Me atë që kemi parë, e dimë se ku jemi dhe cilët janë rivalët tanë. Ne duam që të kemi përballë ekipe të nivelit tonë, por të jenë edhe në një distancë të afërt edhe për sa i përket anës financiare. Do më pëlqente nëse do të ndesheshim me një ekip maqedonas dhe jo një nga Islanda, për shembull. Jo se kemi frikë, por do të dëshironim të mos shkonim shumë larg. Lena e përsërit: Dua të qëndroj te Flamurtari “Dëshiroj një pasaportë shqiptare me shqiponjë të madhe”. Kështu është shprehur shqiptaro-maqedonasi Nijaz Lena, teksa shpreh dëshirën të qëndrojë te Flamurtari me çdo lloj çmimi edhe me ndryshim të nënshtetësisë. Edhe pse gjendet me pushime pranë familjes së tij në Maqedoni, Lena ka pranuar të flasë për “Panorama Sport”, duke mos lënë pa përmendur të ardhmen e tij që e shikon të paktën edhe për sezonin e ardhshëm te Flamurtari. “Kam dëshirë të qëndroj te Flamurtari. Pas kupave të Evropës, do të merret një vendim përfundimtar. Tani le të përqendrohemi te këto ndeshje dhe t’i kalojmë ato me sukses. Unë falënderoj pa masë të gjithë sportashësit vlonjatë që më kanë mbështetur në çdo kohë dhe drejtuesit e klubit e ekipit për mundësitë që më kanë ofruar. Kam disa oferta, por kam kohë për të vendosur. Gjithsesi, më pëlqen të jem pjesë e Flamurtarit”, – përfundon Lena. Ermal Sika