Me mbylljen e se zonit 2011-2012, në Vlorë ka nisur të hidhet projekti për edicionin pasardhës. Drejtuesit mendojnë që të afrojnë më shumë futbollistë shqiptarë, ndikuar edhe nga rregullorja më e fundit. Ndaj ka gjasa që ekipi i ri të ketë edhe më tepër futbollistë shqiptarë, ku sigurisht do të dominojnë vlonjatët.

Burime brenda klubit bëjnë me dije se po kontaktohet me disa lojtarë shqiptarë që momentalisht luajnë jashtë vendit, por edhe me disa titullarë të kampionatit shqiptar, megjithëse deri më tani nuk bëhet asgjë publike. Një prej tyre është edhe Migen Memelli, i cili e ka derën të hapur te Flamurtari. Siç ka bërë me dije pak kohë më parë edhe presidenti Gjika, ai do të kënaqej me afrimin e lojtarit vetëm për Kupat e Evropës, ndonëse më e mira do të ishte zyrtarizmin e tij përfundimtar. Por gjithçka ka mbetur e hapur, pasi vendimin përfundimtar i takon vetë futbollistit.

Projekti - Flamurtari “i madh” hedh sytë tek “të vegjlit”. Pas deklaratës së drejtuesve të ekipit se, disa prej te huajve do të largohen nga Vlora, ka nisur “gjuetia” për evidentimin e talenteve shqiptare. Vëmendja nuk ka lënë pas as ekipet e moshave të këtij klubi. Krerët e klubit, pas një periudhe 5-vjeçare, kthejnë sytë te këto skuadra. Ndërsa ditët e fundit janë treguar shumë të vëmendshëm në evidentimin e talenteve të reja tek ekipet U-17 dhe U-19, për t’i bërë ata në një të ardhme pse jo të afërt, pjesë të ekipit të parë. Një gjë e tillë u evidentua edhe më shumë në ndeshjen e fundit të kampionatit përballë Laçit, ku u aktivizuan dy lojtarë të ekipit të paratërinjve, sulmuesi Bregu në minutën e 56- të dhe mbrojtësi Borakaj në të 68-ën, dy futbollistë të talentuar të ekipit U-17, që duhet thënë se Flamurtarit nuk i mungojnë talentet. E ndërsa gjatë këtyre viteve ekipi ka qenë më tepër i fokusuar te blerjet e zhurmshme të futbollistëve të huaj apo edhe vendës, por me një karrierë të pasur, duke harxhuar kështu edhe shumë para. Mirëpo, tani ka menduar të kursejë dhe pritet që t’i rikthehet edhe Akademisë së Futbollit vlonjat, e cila në fakt ka brum. Qysh prej vitit 2007 ekipi i parë nuk ka marrë në gjirin e tij futbollistë nga moshat. Disa nga të fundit që erdhën te Flamurtari nge ekipi U-19, ishin Myrto, Bifsha, Çaushaj dhe Idrizi, të cilët në fakt nuk gjenden më në Vlorë, por luajnë në skuadra të tjera. Nëse i referohesh grupit të sezonit futbollistik 2011-2012, të bie ne sy se shumë pak vlonjatë janë pjesë e tij, ndërsa më shumë janë të ardhur, thënë ndryshe jabanxhinjtë. Sakaj, Kuqi, Telushi, Beqiri, Liçaj janë vlonjatët e vetëm, nga 22 lojtarë që ka gjithsej ekipi, por jo të gjithë ata janë bërë gjatë këtij sezoni pjesë e 11-shes së fushës së lojës. Duket se ekipi i parë do të kthehet te tradita për të pasur edhe më shumë vlonjatë, teksa drejtuesit e klubit së fundmi janë duke menduar për afrimin e gjakut të ri në ekip.

“Nuk dalim pa trofe sezonin e ardhshëm”

Dëshira shprehet nga portieri i Flamurtarit, Koliqi. Në një analizë të shkurtër që i bën ekipit gjatë këtij sezoni, gardiani shprehet për “Panorama Sport” se janë përmbushur objektivat dhe se arritja e Evropës është arritje. Mirëpo, për sezonin e ri duket se pretendimet do të jenë më të mëdha, teksa vlonjatët synojnë trofe. “Objektivi ynë ishte të merrnim pjesë në Kupat e Evropës. E arritëm një gjë të tillë dhe për këtë fakt ndihem shumë mirë. Tani kemi marrë disa ditë pushime për të nisur më pas punën intensive për të përballuar me sukses pjesëmarrjen tonë në Evropë. Tani jam duke bërë gati valixhet për t’u rikthyer pranë familjes sime e për të kaluar disa ditë pushimi”, – u shpreh ai. Duke folur për të ardhmen, Koliqi tha se e shikon veten pjesë të Flamurtarit. Në përfundim, portieri shton: “Jam shumë mirë këtu. Pasi të kthehemi nga pushimet do të diskutojmë me presidentin Gjika. Deri më tani nuk kam pasur asnjë kontakt me të për të diskutuar për çështjen e kontratës, por më pëlqen të jem pjesë e Flamurtarit sezonin e ardhshëm”. Gjithsesi, Koliqi mendohet të jetë ndër të parët futbollistë vendës që do të përsërisë kontratën me Flamurtarin për sezonin e ri.

ERMAL SIKA

panoramasport