Flamurtari, menjëherë pas barazimit me Laçin në ndeshjen e fundit të sezonit të luajtur në shtëpi, ka nisur pushimet. Jabanxhinjtë, por edhe të huajt, kanë bërë gati “valixhet” dhe dje janë nisur pranë familjeve të tyre për t’u rikthyer më 6 qershor në Vlorë. Kjo datë është vendosur nga klubi për nisjen e fazës përgatitore dhe katër ditë më vonë,

pra më 10 qershor, do të udhëtojnë drejt Ohrit të Maqedonisë. Duke qenë se ky sezon nuk shkoi ashtu si duhej, si dhe rreth 90% të lojtarëve të Flamurtarit u mbaron kontrata, këto 23 ditë pushimesh për drejtuesit e klubit do të kthehen në ditë pune. Kjo, pasi atyre u duhet të reflektojnë mbi futbollistët që do të mbajnë në ekip për sezonin e ri futbollistik. Dhe të huajt kanë udhëtuar në drejtim të vendeve të tyre, nën ethet e “divorcit” me vlonjatët, duke qenë se klubi ka deklaruar se do të mbajë në ekip vetëm 5 lojtarë të huaj.

Përgatitorja Flamurtari nuk doli pa asgjë nga ky sezon, teksa siguroi pjesëmarrjen në Kupat e Evropës. E për t’u shfaqur denjësisht në këtë kompeticion, sigurisht që edhe përgatitjet duhet të jenë intensive. Prandaj drejtuesit e klubit kanë vendosur datën 6 qershor për t’u grumbulluar dhe 10 ditën e nisjes për në Ohër të Maqedonisë, vend ku do të zhvillojnë fazën përgatitore. Të paktën kështu kanë bërë të ditur burime zyrtare pranë klubit të futbollit “Flamurtari”. Gjithashtu, ata kanë konfirmuar se pothuajse i gjithë grupi që mbylli sezonin do të aktivizohet në Ligën e Evropës. Madje, në këtë kompeticion do të jetë edhe blerja me e re zyrtare e vlonjatëve për sezonin e ri, Soza, i cili do ta nisë nga Evropa zyrtarisht karrierën e tij te Flamurtari. Gjika Pas kthimit nga pushimet, kryetari i Bashkisë së Vlorës, njëherësh edhe president i Flamurtarit, Shpëtim Gjika, do të takojë të gjithë futbollistët. E ndërsa ka munguar një shtrëngim duarsh mes Gjikës dhe lojtarëve në nisje të pushimeve, burime pranë numrit një të presidencës kuqezi, bëjnë me dije se një gjë e tillë është lënë para nisjes për në fazën përgatitore, pra në datën e grumbullimit të ekipit. Burimet tregohen të rezervuara se çfarë mund të diskutohet në këtë takim, por ka shumë mundësi që disa prej lojtarëve mund t’u komunikohet largimi, ndërsa disa të tjerëve qëndrimi edhe për fazën e re. Ajo çka dihet për momentin është se largimet do të nisin në muajin korrik, i cili do të jetë edhe më i ethshmi. Kontratat për futbollistët përfundojnë pikërisht në fund të këtij muaji, por do të ketë një shtyrje të saj për të gjithë lojtarët që do të luajnë në Evropë.

Tifozët, pro Shtubinës dhe kundër Muçës

Marrëdhëniet midis shkodranit Shtubina dhe trajnerit të Flamurtarit, Shkëlqim Muça, vazhdojnë të jenë të ftohta. Një gjë e tillë u përforcua edhe në takimin me Laçin, ku Shtubina nuk u aktivizua as edhe një minutë. Për këtë, grupimi i tifozëve “Flota Kuqezi”, protestoi në drejtim të trajnerit Muça duke hedhur në fushë fishekzjarrë tymues. “Nuk po e kuptoj sjelljen e Muçës, edhe pse disa gjëra i kam sqaruar me të”, – shprehet Shtubina. Në lidhje me pretendimet e trajnerit se Shtubina nuk ka pasur formë të mirë dhe, për pasojë, nuk është aktivizuar, lojtari u përgjigj: “Unë kam dhënë maksimumin dhe jam ndier në formë të mirë”. Ndërsa sa i përket të ardhmes, shkodrani tha: “Nuk mendoj të largohem nga Flamurtari. Më kanë komunikuar që të paktën deri edhe pas kupave të Evropës do të jem në Vlorë. Më pas, pres të takoj presidentin Gjika për të folur rreth sezonit të ri”.

Pejiç, Rajoviç dhe Pezo

Pero Pejiç, Toni Pezo, por edhe Blazho Rajoviç, mund të jenë emrat e parë që mund të rinovojnë edhe për një sezon tjetër me Flamurtarin. Paraqitja e tyre e mirë mund të bëjë që të përfshihen në listën që do të hartojnë drejtuesit e klubit të Flamurtarit për sezonin e ri. Gjithsesi, gjithçka mbetet për t’u parë në ditët në vijim.

ERMAL SIKA

panorama-sport