Nga ELTON NIKA

Nuk është zyrtare, por pas dy të huajve që përmendi edhe trajneri Muça, duket se do të largohen edhe dy të tjerë, një mesfushor dhe një portier. Shtubina, Selimi dhe Abraham, janë këta emrat e lojtarëve të parë që flitet se nuk do të vijojnë të jenë më pjesë e Flamurtarit.

Nuk dihet ende nëse lojtarët në fjalë do të jenë pjesë e ekipit për Kupat e Europës, apo largimi i tyre do të ndodhë më parë. Trajneri i Flamurtarit, Shkëlqim Muça, konfirmoi pak ditë më parë, por madje edhe pas ndeshjes me Laçin, se grupi që mbylli këtë sezon do të jetë i plotë më datë 6 qershor.

Sipas Muçës, të gjithë lojtarët kanë kontratë me klubin deri në përfundim të ndeshjeve europiane dhe duhet ta respektojnë atë. Por deri në datën e grumbullimit, te Flamurtari priten surpriza. Jo vetëm për sa u përket lojtarëve që pritet të mbërrijnë në Vlorë e të veshin fanellën kuqezi, por kryesisht për largimet. Emrat e parë kanë dalë, edhe pse jo zyrtarisht, por nuk mbeten këtu.

Lojtarëve të sipërpërmendur, mund t’i shtohet edhe portieri lushnjar Mikel Spaho. Minutat e pakta në të cilat është aktivizuar Spaho, duket se kanë sjellë që edhe ky i fundit të shohë mundësinë e largimit. Edhe pse diçka e tillë nuk konfirmohet zyrtarisht nga vetë futbollisti, burime brenda klubit vlonjat bëjnë me dije se aktualisht është konfirmuar edhe për sezonin tjetër Koliqi, portieri që mbërriti gjatë merkatos së dimrit në Vlorë.

Prej disa ditësh në ambientet e klubit flitet edhe për emrin e Isli Hidit, që u lakua edhe në janar. Megjithatë, gjithçka mbetet në hipoteza, por largimi, nëse kryhet, i portierit Spaho, lidhet edhe me ekipin e tij të vendlindjes. Nëse Lushnja fiton një vend në superiore pas ndeshjes shtesë, kjo mund të sjellë të reja, në të kundërt duhet të presim.

E sigurt është që vlonjatët gjatë kësaj merkatoje do të afrojnë jo më pak se tre lojtarë, mbërritja e të cilëve duhet të bëjë të nisen të tjerë. Flamurtari i 6 qershorit pritet me surpriza, në Vlorë janë duke i pritur.

Ndeshjet europiane do të luhet me drita në Vlorë

Ndeshjet në Kupat e Europës do të luhen me drita në stadiumin e Vlorës. Tashmë është thuajse zyrtare një fakt i tillë, ku në stadiumin “Flamurtari” prej disa ditësh vijohet të punohet për të lidhur kullat e ndriçimit me sistemin qendror të projektorëve. Kabuj elektrik të shtrirë në të gjithë sipërfaqen e stadiumit, ndërsa bëhet me dije se në fillim të muajit qershor pritet të bëhet prova e parë në stadiumin “Flamurtari”.

Pas një periudhe gati 18 mujore, kur edhe u vendosën kullat e ndriçimit, në stadiumi “Flamurtari” pritet të luhet edhe në mbrëmje. Në ndryshim nga një vit më parë, kur ndaj Buduçnostit dhe Jablonecit u luajt nën temperatura të larta, këtë vit pritet gjithçka ndryshe. Pra, do të luhet në mbrëmje.

sportishqiptar