Do rikthejmë Kupën e Shqipërisë në Vlorë”. Është ky premtimi i kryebashkiakut Shpëtim Gjika për tifozët kuqezinj. Në një intervistë për “Panorama Sport”, presidenti i Flamurtarit tregon synimet për vazhdimësinë në kampionat dhe kompeticionin e kupës. “Po ndërtojmë një skuadër që të bëjë krenarë çdo vlonjat”,- thotë Gjika. Kreu i klubit kuqezi komenton edhe merkaton, por nuk lë pas as problematikën e ndeshjes Skënderbeu-Flamurtari.

Ai rikonfirmon se do të bëjë kallëzim penal në Prokurori për delegatin e ndeshjes, Arsen Hoxha. Ndërkohë, u premton korçarëve se do t’iu krijojë kushte komode në dy ndeshjet që do të luajnë në Vlorë. “Ne nuk jemi në luftë me Skënderbeun. Problemi është te federata dhe përfitimet e drejtuesve të saj. Jemi të bindur se gjithçka është manipuluar, presim që Komisioni i Apelit të vendosë drejtësinë në vend”, – ka thënë ndër të tjera Gjika. Zoti Gjika, Flamurtari e nisi me fitore fazën e dytë. Jeni i kënaqur me atë çfarë po jep skuadra në këtë fillimviti? Pa dyshim që jam i kënaqur dhe këtë e them me plot gojën. Në fazën e parë kemi humbur shumë pikë, por futbolli kështu e ka. Gjithsesi, po këta lojtarë të mrekullueshëm do të rikuperojnë gjithçka. Ne po e formatojmë tani Flamurtarin e së ardhmes, atë skuadër që i duhet Vlorës për t’u krenuar vërtet. Mos ndoshta ju ndihmoi më shumë fati në Kamzë… Di të them që fitorja ishte e merituar, por ndikoi edhe terreni, i cili ishte i rënduar nga reshjet. Megjithatë, Flamurtari arriti t’ia dilte mbanë. Pas kësaj fitoreje, tashmë jemi më të qetë. Ndërkohë, më lejoni ta falënderoj për mikpritjen klubin e Kamzës. Të marrin shembull të gjitha klubet nga ky organizim. Pak më lart thatë që po ndërtoni Flamurtarin e së ardhmes. Po për këtë sezon, cilat janë objektivat konkretë të klubit? Objektivat janë të qarta: titulli kampion dhe Kupa e Shqipërisë. Ua kam komunikuar futbollistëve dhe stafit teknik, megjithëse duhet të presim dy ndeshjet e radhës. E kam fjalën këtu për takimin me Laçin në kupë dhe me Teutën për kampionatin. Janë dy ndeshje decizive për ne dhe në bazë të rezultateve do të kemi një konkluzion më të qartë për vazhdimësinë. Gjithsesi, synimi ynë madhor mbetet titulli kampion, por nuk dua ta anashkalojë kupën. Ky kompeticion është një tjetër sfidë për ne. Keni më shumë shpresa në kupë apo… Dua ta sjell kupën sërish në Vlorë. Zyra ime e ka një vend bosh, krahas kupës që ka fituar ekipi i basketbollit të femrave. Më duhet edhe ajo e futbollit. Ju e dini që mua kupa më pëlqen, pasi deri tani në të gjitha sfidat e mia kam qenë kampion. E them me modesti këtë. (Qesh). Një vlerësim për merkaton e janarit dhe a keni ndonjë peng? Është shumë cilësore. Lojtarët që u afruan te Flamurtari ishin kërkesë e trajnerit Muça. Kemi ngritur një ekip pretendent dhe tani presim edhe rikthimin e Rajoviçit, si dhe të dëmtuarve të tjerë për të vijuar ecurinë pozitive në kampionat dhe kupë. Nuk kam asnjë peng nga merkatoja, pasi çdo gjë më duket e realizuar. Thashë edhe më lart që u besova zgjedhjeve të trajnerit. Është folur shumë për një rikthim të Memellit. Si është e vërteta? Memelli është nën kontratë me një klub arab. Komunikojmë shpesh bashkë. E uroj dhe më uron, por nuk kam diskutuar për rikthimin e mundshëm të tij në Vlorë. Gjithsesi, mund të them se Memelli e ka të hapur derën te Flamurtari. Kurdo që të kthehet. Çfarë do të bëhet me portierin Moçka? Çdo gjë do të vendoset në vijim. Ai mbetet i pezulluar. Kalojmë te ngjarjet në ndeshjen ndaj Skënderbeut. Keni thënë se do të bëni kallëzim penal ndaj delegatit Arsen Hoxha… Po, i qëndroj asaj që kam thënë. Ajo çka ndodhi ishte turp për futbollin dhe drejtuesit e FSHF-së. Kemi ngritur një grup pune, në përbërje të të cilit janë avokatë të njohur dhe përfaqësues të klubit. Po vlerësohet çdo gjë që ndodhi në atë ndeshje. Në ç’vend të botës keni parë ju, që delegati nuk është në fushë, por në stol apo tribunë?! E pra, ja ku është katandisur futbolli që drejtohet nga klane, të cilët po e shkatërrojnë atë. Duke iu rikthyer asaj që ne do të bëjmë me të deleguarin, po ju them se po i shqyrtojmë të gjitha provat dhe faktet dhe jemi duke bërë gati dosjen për ta ndjekur penalisht këtë njeri, i cili vetëm delegat nuk mund të jetë. Po nga Komisioni i Apelit, çfarë prisni? Drejtësi. Janë të gjitha faktet dhe provat që ne na japin të drejtë. Gjithçka u manipulua, madje është keqinterpretuar neni që ne si klub na dënon për braktisje të ndeshjes. Ndeshja vijoji dhe nuk kemi të bëjmë me braktisje, as nga stafi dhe as nga futbollistët. Kështu që ne kërkojmë tri pikët. Për të sheshuar problematikat Korçë-Vlorë, a mund të shërbejë një miqësore bamirësie mes ekipeve… Nuk ka lidhje këtu miqësorja. Unë nuk e shikoj me vend. Ne nuk jemi në luftë as me drejtuesit e Skënderbeut dhe as me futbollistët korçar. Këto janë probleme klanesh dhe përfitimesh të drejtuesve të federatës. Ne do ta presim Skënderbeun me kulturë dhe të qetë, duke i siguruar kushte komode, larg dhunës. Rikthehet entuziazmi te tifozët Mjaftoi një fitore në transfertë me Kamzën për kampionat dhe paraqitja e mirë në dy ndeshjet e kupës ndaj Skënderbeut e Vllaznisë, që tifozët vlonjatë të besojnë se Flamurtari mund të jetë kompetitiv këtë sezon. Në kushtet kur gjithçka është e hapur, si për kreun e renditjes në kampionat dhe për kualifikimin në gjysmëfinalen e kupës, sportdashësit janë rikthyer entuziastë më tepër se kurrë. Në komentet e tyre në rrjetin social “Facebook”, ultrasit kuqezinj e shikojnë skuadrën mes më të mirave dhe pretendente reale për fitimin titullit dhe kupës. Tifozët vlerësojnë shumë blerjet në merkaton e janarit. Sipas tyre, klubi ka bërë goditje cilësore në këtë periudhë. Muça s’njeh pushime Flamurtari nuk njeh pushime. Edhe dje skuadra vlonjate ka zhvilluar stërvitje, pavarësisht se të shtunën luajti ndaj Kamzës. Trajneri Shkëlqim Muça bashkë me ndihmësit e tij e kanë ndarë skuadrën në dy grupe. Ata lojtarë që u aktivizuan 90 minuta të shtunën dje bënë një stërvitje të lehtë, ndërsa rezervat kryen një seancë normale, si zakonisht në fushën e Pyllit të Sodës
www.panorama-sport.com