Franc Veliu ka humbur një shans për t’u larguar në një klub jashtë vendit gjatë verës, me Dinamon e Bukureshtit dhe Rizesporin dy ofertat më të rëndësishme që i janë bërë, por mbrojtësi i Flamurtarit nuk duket se po e vuan gjithë këtë. Lojtari që tri javë më parë debutoi në një ndeshje zyrtare me Kombëtaren, zhvilloi një ndeshje prej lideri të vërtetë dje. i padiskutueshëm në qendër të mbrojtjes, një organizator i vërtetë i kësaj faze për ekipin e tij por edhe personalisht një protagonist absolut në thuajse çdo top, si në ajër apo edhe në luftën një-për-një. Prej një mbrojtësi nuk pritet të

ekzekutohen goditjet e dënimit, por ja që me Veliun ndodh edhe kjo, si në rastin e golit të dytë të ndeshjes, të cilin e shënoi vetë.

Tha pas ndeshjes

E.Lutaj (trajner i Flamurtarit): “Kemi zhvilluar një ndeshje me kërkesa maksimale për cilësi loje dhe rezultat. Për fatin tonë të keq, pasi kemi shënuar golin e tretë për më shumë se 20 minuta lojë nga fundi ndeshjes i kemi lënë shumë terren kundërshtarit. Nuk më pëlqen kjo vetëkënaqësi nga skuadra. Në minutat shtesë kemi pësuar dhe një gol për fajin tonë. Skuadra ka rritje, ka dëshirë për lojë dhe rezultat, por defektet unë nuk i fal në asnjë rast. Në analizën e kësaj ndeshje do të futemi më konkretisht edhe tek gabimet. Replika ime me trajnerin Ndreu? Nuk zmadhoj asgjë por për një moment erdhi gabimisht në zonën e pankinës tonë dhe unë e kujtova se ishte në “kundravatje”. Nuk kuptova përse reagoi në atë mënyrë, kur gjithçka mund të kalonte shumë qetë”.

Vlonjatët rrisin përmasat e fushës

Në ndeshjen Flamurtari-Kastrioti, vendasin kanë inauguruar ndryshimin e përmasave të fushës. Kjo e fundit ka qenë me përmasa ndryshe, përsa i përket sidomos gjerësisë së saj. Kështu nga gjerësia 68 metra që ka qenë për vite me rradhë, dje fusha ishte zgjeruar nga 1 metër në secilën anë, gjë që do të thotë se është bërë plot 70 metra e gjerë, ndërsa gjatësia nga porta në portë është 105 metra.

Ndeshja në temperature të larta

Takimi i djeshëm mes Flamurtarit dhe Kastriotit është zhvilluar në një orar të pazakontë për kampionatin tonë në muajin shtator, në orën 13:00. edhe pse është fundi i këtij muaji dhe tashmë kemi hyrë në vjeshtë, temperaturat kanë qenë reth 30 gradë Celsius, që do të thotë një i nxehtë i pazakontë. Gjyqtari e ndërpreu lojën vetëm një herë në pjesën e dytë, duke ju dhënë mundësi futbollistëve të freskohen me ujë. Lojtarët janë ankuar për vapën e madhe.