Publikuar te Shtunen, 17 Shtator 2011 Shkruar nga SOT NEWS Basketbolli shqiptar ka probleme. Këtë nuk e thonë vetëm sportistët e trajnerët, por një gjë e tillë pranohet edhe nga zyrtarët e Federatës Shqiptare të koshit, të cilët bëjnë me faj fondin e pakët të akorduar për këtë federatë nga buxheti i shtetit. Me më pak se 100 mijë euro në vit, FSHB-ja është ndoshta federata më e varfër në Europë e në botë dhe me kaq pak para është e vështirë të organizosh një gamë të plotë aktivitetesh por të rinj e të rritur, meshkuj e femra, rrjedhimisht nuk do të ketë as cilësi.

Por kulmi ka arritur me faktin se ekipet e basketbollit nuk po mundin dot të regjistrohen në kohë pranë federatës, gjë që mund të sjellë një shtyrje të kampionatit. Federata e koshit i ka rregullat e shkruara dhe klubet kanë rënë dakord më parë për kushtet, pasi u duhet të paguajnë një tarifë regjistrimi pranë FSHB-së. Në mungesë të parave ekipet nuk regjistrohen dhe humbasin mundësinë e luajtjes në kampionat. Por nuk është vetëm një ekip. Bëhet fjalë pothuajse për të gjitha skuadrat, të cilat nuk kanë mundësi financiare. Sidomos basketbolli është sporti që vuan nga një krizë e rëndë financiare. Kjo është shprehur kohë më parë dhe në funksionimin e ekipit kombëtar, ku stafi teknik i përfaqësueses nuk merrte asnjë qindarkë për drejtimin e ekipit. Trajneri Fatmir Cuka dhe ndihmësi i tij Aleksandër Damo e udhëheqin ekipin vetëm në sajë të pasionit dhe dëshirës së tyre për të bërë diçka më shumë në krye të skuadrës. Interesimi ynë në FSHB për këtë çështje nuk merr përgjigje të plotë dhe kjo është normale. “Fshati që duket s’ka nevojë për kallauz”, thotë populli. Edhe Federata e koshit nuk i ka punët në terezi, pavarësisht dëshirës së mirë të drejtuesve. Kjo për shkak të mungesës së parave. Natyrisht që Federata nuk mund të imponojë me forcë klubet të sjellin brenda afatit kuotën e regjistrimit dhe detyrimet e tjera financiare. Pra do të ketë tolerime, pasi kriza financiare nuk prek vetëm FSHB-në, por në radhë të parë vetë klubet. Kësisoj, pritet që kampionati i parashikuar për të startuar në kohën e duhur do të shtyhet për disa ditë ose disa javë. Ultimatumet e federatës ndaj klubeve nuk pinë ujë, pasi gjendja dihet se si është. As vetë federata nuk ka interes të gjobisë klubet për mospërputhje të kritereve në kohë, pasi gjendja kjo është dhe një tentim për të marrë masë ndëshkimore mund të sjellë agravim të situatës dhe rëndim të mëtejshëm në funksionimin e basketbollit. Realisht, basketbolli shqiptar është shumë larg basketbollit të vendeve të rajonit, që janë në elitën e botës. Madje vendet fqinje kanë dhe basketbollin më të zhvilluar në kontinentin tonë. Por këto vende investojnë miliona euro për zhvillimin e basketbollit. Talenti nuk mungon, por sporti i koshit kërkon një konceptim tjetër, një mbështetje më të madhe. Së fundi, kujtojmë se Tirana te meshkujt dhe Flamurtari te femrat janë dy skuadrat që dominojnë prej vitesh basketbollin shqiptar dhe është bërë shumë pak për krijimin e një atmosfere rivaliteti në kampionatin e basketbollit. Infrastruktura është përtokë dhe shumë qytete nuk kanë kushtet elementare për zhvillimin e këtij sporti. Ka pasur disa përpjekje nga ana e Federatës për të nxitur basketbollin nëpër shkollat e mesme dhe këto projekte janë mbështetur fuqimisht. Madje ato kanë qenë pozitive, pasi kanë nxitur shumë të rinj të ushtrohen me basketboll. Por fatkeqësia e basketbollit tonë lidhet me mungesën e infrastrukturës dhe të investimit të klubeve.