Flamurtari është drejt fundit të javës së tretë të fazës përgatitore. Prej 8 ditësh skuadra stërvitet në Strugë të Maqedonisë. Sipas informacionit të marrë nga sulmuesi Arlindo Rustemi, stërvitja e skuadrës në Strugë është intensifikuar gradualisht drejt ngarkesave maksimale. Pas dëmtimit që pësoi gjatë sezonit të shkuar, 29-vjeçari tani gëzon një formë të mirë fizike dhe mendon se do të jetë një nga golashënuesit më të mirë të Flamurtarit. Ja çfarë thotë ai në intervistën e tij:

Në çfarë kushtesh stërvitet skuadra në Strugë po ta krahasosh me atë të periudhës 12-ditore në Vlorë?
Pjesa e dytë e përgatitjes në Strugë po zhvillohet në kushte ideale jo vetëm në drejtim të trajtimit të akomodimit, por edhe për shkak të klimës së freskët e natyrës së bukur. Të gjithë, faktorët të cilët vlerësohen nga ne si pozitivë kanë ndikuar ndjeshëm në aspektin psikologjik, duke na favorizuar për të gjetur qetësinë.
Si po ecën stërvitja?
Vërehet dukshëm se ka një përmirësim në aspektin e qëndrueshmërisë dhe rezistencës të lojtarëve. Këta elementë të rëndësishëm të përgatitjes fizike konstatohen qartë në formën sportive të skuadrës gjatë stërvitjes. Një tregues i tillë u arrit nëpërmjet rritjes së ngarkesës në stërvitje, veçanërisht në drejtim të aspektit fizik.
Sipas mendimit tuaj, çfarë ka për të korrigjuar ende skuadra?
Kuptohet, korrigjimet bëhen pasi ke konstatuar mangësi në ndeshjet miqësore. Gjithsesi, me sa dëgjojmë, stafi ynë teknik kërkon të afrojë një sulmues dhe një mbrojtës. Mendoj se nëpërmjet ndeshjeve miqësore, trajneri Canaj do të ndërhyjë për të plotësuar boshllëqet për të përcaktuar konturimin përfundimtar të skuadrës.
Nisur nga përgatitjet e programuara dhe përbërja e grupit, deri ku do të shkojë Flamurtari në superligë?
Eksperienca ka treguar se, kur skuadra stërvitet nga profesionistë dhe lojtarët janë cilësorë, rezultatet do të jenë pozitive. Unë e parashikoj Flamurtarin midis 4 skuadrave më të mira në superligë.

Soprtishqiptar