Sulmuesi vlonjat i Flamurtarit, Daniel Xhafaj, pohon se do ishte mirë të fitonte edhe “Këpucën e artë”

15 gola ka shënuar këtë sezon Daniel Xhafaj, duke i pari, 3 gola më shumë se Pejiç i Tiranës

2 herë e ka fituar Xhafaj trofeun “Këpuca e artë”, me Teutën dhe me Besën sezonin e kaluar



2 tituj ka fituar në karrierën e tij Xhafaj, me Dinamon dhe me Tiranën para dy sezonesh

7 ekipe ka ndërruar Xhafaj, me Bylisin, Dinamon, Teutën, Xamaksin, Tiranën, Besën dhe Flamurtarin

Asnjë mungesë nuk do të ketë Flamurtari në ndeshjen e radhës përballë Teutës në Durrës, pasi të gjithë janë të gatshëm për këtë përballje shumë të rëndësishme. Ndërsa synimi mbetet fitorja edhe në këtë ndeshje. I këtij mendimi është edhe sulmuesi kryesor i Flamurtarit dhe golashënuesi më i mirë i këtij sezoni deri më tani, Daniel Xhafaj.

Me 15 gola të realizuar, Xhafaj kërkon të vijojë të japë edhe më tej kontributin e tij për fanellën kuqezi, në arritjen e objektivit që kanë vlonjatët për këtë sezon. Me 15 gola në krye të listët së golashënuesve, duket shumë e vështirë që ndokush tjetër të kërcënojë Xhafajn për “Këpucën e artë” gjatë këtij sezoni.

Kjo edhe për faktin se Xhafaj është shkëputur tre gola nga Pejiç. Por sipas sulmuesit vlonjat, veç kënaqësisë që të jep një titull i tillë, ai kampion, titulli goleador të jep edhe më shumë. “Ndaj, edhe pse e dua edhe “Këpucën e artë”, e lë nëse marr titullin kampion.

Por unë besoj se do t’i marr të dy këto trofe në fund të këtij sezoni futbollistik,” - thekson Xhafaj, i cili për ndeshjen e radhës, thotë: “Ju e patë edhe në ndeshjen e luajtur në Vlorë se sa i vështirë është të çahet një ekip si Teuta, ku ne fituam në ndeshjen e parë me vetëm një gol.

Por edhe në fazën e parë hasëm shumë vështirësi ndaj tyre, ndërsa e veçanta në këto ndeshje qëndron në faktin se në Durrës mund të luajmë lirshëm. Nga Durrësi kam kujtime shumë të bukura, gjatë kohës që jam aktivizuar me këtë ekip, por tashmë më duhet të kërkoj suksesin veç me Flamurtarin.

Vlen shumë kjo ndeshje për ekipin tonë dhe nuk mendoj se mendja jonë do të jetë në ndeshje e Krujës. Ne do të shkojmë në Durrës, për të pasur vëmendjen veç te ndeshja jonë përballë Teutës, me qëllimin për ta fituar atë ndeshje.

Mendoj se të dyja ndeshjet, si ajo në Durrës, edhe ajo në Krujë, do të përcaktojnë diçka, por gjithsecili bën llogaritë e veta. Ne nuk kemi pse të tregohemi euforikë, por thjesht të hyjmë në fushën e lojës dhe të luajmë ashtu si edhe dimë të bëjmë.

Nuk them se duhet të jemi totalisht të fiksuar vetëm pas një rezultati, por të luajmë për ta arritur atë, janë 90 minuta lojë dhe gjatë saj mund të vendosen shumë gjëra. Teuta për mua, me aq sa kam parë, ka një ekip simpatik, me futbollistë që dëshirojnë të spikatin dhe kjo i bën ata më të vështirë.

Por të mos harrojmë: nëse duam të vijojmë të mbetemi në vend të parë dhe të shkëputur, të paktën tri pikë larg kundërshtarit, nuk na lejohen gabime. Ekipi është në gjendje të mirë dhe mendoj se deri në fund presioni qëndron mbi korçarët dhe jo te ne,” ka përfunduar sulmuesi i Flamurtarit, Daniel Xhafaj.

Xhafaj rikthehet në Durrës si “ish”

Ka luajtur sezone më parë me Teutën, duke qenë goleadori i saj, madje duke luftuar edhe për “Këpucën e artë”, që e ka arritur njëherë. Golat e tij të shumtë mbahen mend te tifozët durrsakë dhe për ta mbetet akoma në mendje.

Por edhe për Xhafajn, Durrësi është qyteti që ka lënë gjurmë, pasi te Teuta ka një pjesë të madhe të karrierës. Kësaj radhe në Durrës nostalgjia do t’i lërë vendin profesionizmit, aq më tepër që Flamurtari i tij luan për titullin kampion.


Vlonjatët sfidojnë shiun në stërvitje

Me dy seanca në ditë ka vijuar stërvitja e Flamurtarit. Pavarësisht reshjeve të shiut që kanë vijuar gjatë gjithë ditës në Vlorë, trajneri Magani dhe stafi teknik nuk kanë toleruar aspak në procesin stërvitor.

Kjo sepse Magani e quan ndeshjen shumë të rëndësishme, ndërsa sipas tij, tashmë pushimet janë një fjalë e ndaluar për futbollistët e Flamurtarit, të cilët duhet të djersitin edhe më shumë për të përfunduar ashtu siç duhet këtë sezon futbollistik.
www.sportishqiptar.com.al