Kapiteni Sakaj: Skëndërbeu nuk fitonte dot ndryshe

Edhe pse ka kaluar dy ditë nga ndeshja me Skënderbeun në kampin vlonjat, vazhdojnë të jetojnë me shijen e hidhur të humbjes së pësuar. Këtë gjë e përjeton sipas mënyrës të vet dhe kapiteni i skuadrës, Artan Sakaj që në intervistën e tij për gazetën tonë tregoi se është pjesë e atyre njerëzve jo të pakët në Vlorë që nuk pranojnë humbjen.

…

- Sakaj, çfarë shije ju ka lënë humbja me Skënderbeun?

- Unë personalisht vazhdoj të bëj pjesë në atë grup njerzish që nuk janë të pakët për të mos e pranuar humbjen në atë ndeshje. Ndodh kështu me mua dhe me të tjerë në skuadër dhe qytetin e Vlorës, sepse kam arsye të argumentuar me fakte dhe detaje që më bëjnë të vazhdoj të mos bindem.

- A mund të përmendni disa që nuk e pranojnë këtë humbje?

- Së pari është e gjithë skuadra jonë. Tifozët dhe shumë specialistë të tjerë që kanë ndjekur këtë ndeshje. Edhe ai që është më kundërshtari i Flamurtarit për këtë rast e thotë qartë se kjo ndeshje nuk është fituar nga Skënderbeu, por e “dhuruar” nga gjyqtari me atë penallti fantazëm që nga do që ta shikosh vetëm penallti nuk është.

- Gjithsesi zyrtarisht Skënderbeu e ka fituar ndeshjen….

- Mund ta shpallin dhe kampion, se shikojnë ëndrra tani në fund të dimrit, por nuk e meritojnë. Me atë që tregoi kjo skuadër në ndeshje kundër Flamurtarit besoj se të gjithë u bindën se di të fitojë vetëm me gjyqtarë.

- Përse keni këtë mendim për skuadrën korçare?

- Sepse për fitoret rresht që bënin në fazën e tretë të kampionatit të kaluar në shtyp ulërin për ndonjë gol të bërë me penallti të merituar nga Flamurtari. Për humbjen e thellë 4-0 që pësuan këtë kampionat në Vlorë u justifikuan me togëfjalshin: “As më trimat nuk e kishin parashikuar ketë humbje”. Kurse dy javë më parë kishin bënë dhe klasifikimin duke shpallur veten kampion dhe Flamurtarin në vend të katërt.

- Edhe këto janë pjesë e lojës të një kampionati…

- Pranohen të tilla këto kur e shikon që je vetë në krye të grupit dhe jo kur qëndron poshtë dhe shikon lart se çfarë po bën ai tjetri. Kësaj nuk i them as ambicje dhe as dëshirë, por një xhelozi e sëmurë për atë që nuk arrin dot ta bësh vet.

- Në fillim të intervistës premtuat se keni fakte dhe argumenta kundër?

- Këtu përveç penalltisë fantazëm do të shtoja rastin kur Xhafaj “u kap” jashtë loje, kartonat e verdhë pa llogari kundër skuadrës tonë, shumë ndërhyrje të rënda për korçarët ta pandëshkuara dhe në fund gjyqtari për ta “zbukuarar” ndeshjen jep disa ndëshkime për vendasit për të thënë “unë jam i rreptë, nuk fal …”. Të gjitha këto nuk janë pak brenda një ndeshje për të thënë se sa ndihmoi gjyqtari Jemini skuadrën e Skënderbeut në këtë ndeshje.

- Çfarë i thatë gjyqtarit në momentin e dhënies të penalltisë?

- Bëra detyrën si kapiten i skuadrës duke thënë: “Nuk është penallti, por simulim i hapur i sulmuesit Soza. Ju keni vërshëllyer përpara se të shikonim të gjithë rënien e lirë të argjentinasit. Po na ndëshkoni padrejtësisht”. Këtë moment kishte pritur dhe realizoi si dinte vetë …

- Korçarët janë shprehur se tani gara do të jetë më e bukur ?

- Ne si skuadër kemi dashur të bëjmë në çdo ndeshje llogarinë tonë pa u ndikuar fare për atë që bëjnë rivalët që na ndjekin. Këto ditë dëgjoj shpesh se kampionati do të ketë një mbyllje interesante me ndeshjen e fundit, Flamurtari-Skënderbeu. E them me bindje të plotë se Flamurtari nuk lë titullin për ta zgjidhur në javën e fundit. Unë i ftoj korçarët që të vijnë atë javë në Vlorë për të hapur së bashku sezonin turistik.

- Po tregoni shumë besim për fitimin e titullit kampion?