Pas shumë vitesh heshtjeje, tifozeria pritet të shpërthejë. Ja çfare po përgatitet para superndeshjes kundër Dinamos

Ka një traditë të mirë në qytetin e Vlorës që edhe pse në përmasa pak më vogla ruhet edhe sot tek tifozët vlonjatë. Stadiumi merr një ngarkesë më ndryshe kur skuadra e Flamurtarit përballet me ekipet e kryeqytetit. Dhe kjo ndodh edhe nga fakti, sepse rivaliteti në vite në futboll midis vlonjatëve dhe kryeqytetasve ka qene i madh. Duket se kështu po ndodh edhe këto ditë, në prag të ndeshjes Flamurtari-Dinamo. Ndeshja e ditës se diele është bërë kryebiseda në çdo ambient shoqëror dhe familjar. Vlonjatët, qe duket se e kanë harruar Flamurtarin e madh të viteve 1980-1990, u është zgjuar dëshira për të parë skuadrën e këtij sezoni që ka mbyllur fazën e parë në krye të klasifikimit, kampione te vendit. Siç duket edhe ata që nuk kanë shkelur në stadium për shumë vite, në këtë ndeshje do të kërkojnë të jene. Shumë prej tyre, të “thekur” pas Flamurtarit të atyre viteve kanë vënë si kusht qe ta ndjekin këtë ndeshje në po ato vende në stadium si në ato vite, ku thirrjet “Flamurtar, Flamurtar ” pushtonin gjithë hapesirën e qytetit tyre.

Shoqata - Në një prononcim të bërë dje nga shoqatat e tifozëve vlonjatë mësohet se në këtë ndeshje nuk do të ndodhë si me Skënderbeun, kur një grup tifozësh pa mbaruar ndeshja filluan të largoheshin nga stadiumi. Një fenomen të tillë dikush kërkon ta shpjegojë me atë se “pas shënimit të golit katërt nga vlonjatët humbi interesi për ndeshjen”. Por në fakt në shumë grupime të tifozëve vlonjatë, kjo është kritikuar dhe bëhet me dije se për të gjithë këto ditë është lëshuar thirrja “të gjithë duhet të jemi në festën e pas ndeshjes”. E, pra vetë tifozeria vlonjate premton reflektim në vetvete, jo vetëm për pjesëmarrjen, por dhe për përkrahjen dhe respektimin e skuadrës deri në fund të ndeshjes. Jo shumë larg, pak ditë më parë presidenti Gjika bëri shembull pozitiv grupin e tifozëve të rinj që përkrahën Flamurtarin në Elbasan. Madje, presidenti shkoi edhe më tej kur shpreh: “Në stadium na duhen tifozë që mbështesin skuadrën, dhe jo nga ata që bërtasin dhe fyejnë skuadrën kundërshtare. Ne do të përkrahim në çdo rast ata që me entuziazmin e tyre krijojnë atmosferë pozitive në stadium”. Ky togfjalësh i lëshuar nga presidenti Gjika në prag të kësaj ndeshje në opinonin sportiv vlonjat ka filluar të përkthehet “më shumë entusiazëm, më shumë kulture, më shumë mbështetje për skuadrën e zemrës”.

Internet - Ndërkohë, çdo ditë në Facebook e në faqet online të tifozëve gjen mesazhe që kryqëzohet nga tifozë dhe fansa të shumtë, ku premtohet mbështetje e fuqishme për Flamurtarin. E pra, qyteti futbolldashës i Vlorës përgatitet që ditën e diel ta kthejë stadiumin në një Uembli të dytë. Dhe pritet të jenë të pranishëm për këtë ndeshje jo vetëm banorë të qytetit, por dhe nga rrethinat e tij. Si zakonisht, edhe në këtë ndeshje tifozët e përhershëm do të përbëjnë pjesën më të madhe në shkallët e stadiumit.

Tifogrupe - Nga burime pranë tifozëve mësohet se ata kanë filluar që në ditët e kaluara të organizohen për të ardhur në stadium të organizuar sipas lagjeve ku banojnë futbollistët vlonjatë. Të dyja shoqatat e tifozëve “Dragonjtë kuq e zi” dhe “Flota kuqezi” me influencën e tyre në çdo cep të qytetit po organizojnë grupet e reja të tifozëve “Cole -Siti”, “Lef Sallata”, “Karabash, mëhalla e vjetër” , “Fanatikët e Skelës”, “Babicjotët” dhe “Mondi .Co”. Por, jashtë vëmendjes nuk do të jenë dhe tifozët nga fshatrat përreth qytetit. dhe ata të Orikumit, Novoselës, Kaninës e Drashovicës. Secili grup ka idhujt e tij në skuadrën vlonjate: Sakajn, Xhafën, Veliun, Begën, Kuqin, Moçkën, Zeqirin, Shehajn, Beqirin e të tjerë. Të gjithë duan të jenë në stadium në këtë ndeshje, sepse edhe tek ata tashmë është ngjallur ndjesia se Flamurtari është në rrugën e duhur për të fituar titullin kampion.

Femra - Pritet qe kjo ndeshje do të sjellë në shkallët e stadiumit edhe më shumë femra të pranishme. Të parat që kanë thyer një heshtje të tillë janë vajzat e ekipit të basketbollit që kohët e fundit nuk kanë munguar në asnjë ndeshje të Flamurtarit në fushën e tij. Por përmasat nuk pritet të mbarojnë këtu. Si gjithnjë, “ambasadorët” e Flamurtarit, shkodrani Fatbardh Sheqi, durrsaku Zija Sula dhe shumë vlonjatë që banojnë në Tiranë, Fier dhe Elbasan pa as më voglin dyshim nuk do të mungojnë me pranin e tyre për këtë ndeshje. Është ndeshje në fundjavë, ndaj dhe grupi i studentëve vlonjatë në Tiranë do të zbarkojë të dielën në Vlorë dhe me entuziazmin e tyre kanë për t’i ndezur rrugët e qytetit, ashtu siç ndodhi pas ndeshjes të fituar ndaj Skënderbeut.

Vend në stadium do të ketë edhe për shokët dhe miqtë e futbollistëve gjirokastarit Devolli, milotasit Brahja, elbasanasit Ahmataj, struganit Lena, tropojanit Progni, lushnjarit Spaho, fierakut Roshi, tiranasit Grami dhe si për herë “grupi i peqinasve” për trajnerët Magani dhe Branica. Por të mirëpritur do të jenë dhe tifozët dhe drejtuesit e skuadrës të Dinamos.

Biletat - Ndërkohë sot fillon dhe shitja e biletave, ku çmimet nuk janë ngritur në krahasim me ndeshjet e kaluara, por është shtuar sasia në qarkullim, kur flitet për rreth 8 mijë bileta me vlerë 400 dhe 200 lek. Prenotimet e para kanë disa ditë që janë kryer. Nga ana tjetër, klubi vlonjat po merr të gjitha masat që kjo ndeshje të kthehet në një festë të vërtetë sportive. Ka ardhur koha që futbolli të kthehet në pjesë të jetës për të gjithë. Ndoshta këtë radhë stadiumi Flamurtari do të jetë një Uembli i vërtetë. Shanset janë që të gjitha që kështu do të ndodh. Vlora tani e ka skuadrën e saj të Flamurtarit që di të fitojë dhe të luaje bukur futboll. Vetë futbollistët vlonjatë e duan këtë radhë stadiumin e plotë. Tifozët premtojmë praninë dhe mbështetjen e tyre.

Ndoshta kjo ndeshje do të jetë dhe “provimi” më i mirë që Flamurtari të fitojë jo vetëm ndeshjen kundër Dinamos për të ruajtur kryesimin në klasifikim, por dhe afrojë pranë vetes tifozerinë e saj të zjarrtë.

SportEkspres