E kam thënë edhe ditë më parë, se kjo përballje është e vështirë, por edhe shumë e rëndësishme për Flamurtarin, kjo edhe për pjesën e mbetur të sezonit. Kam thënë që çdo ndeshje për Flamurtarin është tashmë një finale me vete për pozicionin që kemi në renditje dhe synimet që kemi si ekip, ku pa dyshim duhet dhe do të kërkojmë t’i largohemi vendit aktual në klasifikim.

Për sa i përket Laçit, e kam thënë, se mbetet një ekip që e vlerësoj shumë, për vetë faktin që kanë treguar me të vërtetë grintë për t’u admiruar në fushën e lojës dhe kjo në çdo ndeshje që ata kanë luajtur dhe këtë fakt ne e pamë edhe javë më parë kur luajtëm për fazën e dytë.

Megjithatë, jam i mendimit se, nëse do të luajmë si në atë ndeshje, nuk do të dalim pa pikë nga kjo përballje. Kemi mungesën e Memellit dhe Begajt, dy lojtarë që janë në planet e ekipit, sidomos Memelli, megjithatë kemi lojtarë të aftë për t’i zëvendësuar këta të fundit dhe për të dhënë më të mirën në fushën e lojës. Edhe me futbollistët e kemi thënë disa herë që në çdo takim na duhet të kërkojmë pikë dhe te këta të fundit kam parë impenjimin maksimal për të luajtur sa më mirë në këtë përballje shumë të rëndësishme.

Tashmë kalendari është përcaktuar dhe çdo ndeshje është mjaft delikate jo vetëm për Flamurtarin. Ne na intereson loja e Flamurtarit dhe rezultatet që do të arrijmë. Shpresojmë se shumë shpejt do t’i largohemi edhe këtij vendi që kemi në klasifikim, ndaj mendoj se ndaj Laçit do të shihni një Flamurtar që do të kërkojë të luajë dhe të japë më të mirën e vet, natyrisht duke shpresuar se gjithçka do të shoqërohet me rezultatin pozitiv në këtë transfertë,” ka përfunduar trajneri i Flamurtarit, Gugash Magani.

sporti shqiptar.