FLAMURTARI - BESA 3-0

Flamurtari: Moçka, Grami, Progni, Bilen, Shehaj (Lena 57′), Veliu, Puljiz, Kuqi, Roshi (Begaj 80′), Memelli (Strati 89′), Sakaj.

Trajner: G.Magani.

Besa: Shehi, Dragusha, Vrapi, Arapi, Fagu, Shkëmbi, Dhëmbi, Poçi, Mancaku (Tragaj 80′), Çikalleshi, Sinani. Trajner: Sh.Duro.

Gjyqtarë: K.Meta, D.Rexha, K.Qirici (Tiranë)

Kartonë të verdhë: Arapi, Progni, Bilen, Vrapi

Flamurtari i dha një leksion të hidhur Besës së vendit të dytë në një stadium pa shikues, duke sigluar një fitore të pastër 3-0 në “replay”-in kundër kavajsëve, në ballafaqimin e dytë midis tyre për javën e 18-të të Kategorisë së Parë, pas anulimit të takimit të parë origjinal. Flamurtari fitoi edhe në atë takim, 1-0, për shkak të një gabimi teknik të gjyqtarit Remzi Sadiku.

Serinë e “tripletës” kuqezi vlonjate e nisi kapiteni Artan Sakaj me një gol nga pika e bardhë, duke mposhtur kapitenin e Besës, Orges Shehin në minutën e 27-të. Blerja dimërore, sulmuesi Migen Memelli, u frenua brenda zonës nga mbrojtësi i Besës, Renato Arapi, dhe gjyqtari Kridens Meta akordoi 11-metërsh të shndërruar në gol nga ish-lojtari i Besës, Artan Sakaj.

Goli i dytë i Flamurtarit, mban shenjën e golashënuesit më të mirë të sezonit të kaluar. Ish-sulmuesi i Tiranës, Migen Memelli, i cili nuk realizoi penalltinë në ndeshjen e humbur të Flamurtarit me Shkumbinin (2-1) katër ditë më parë, bëri autokritikë dhe shënoi me kokë në minutën e 69-të golin e dytë të Flamurtarit, të parin me fanellën e vlonjatëve dhe të dytin sezonal.

Për të kompletuar triumfin e Flamurtarit mendoi një tjetër afrim gjatë merkatos, Njazi Lena, i ardhur nga kampionati maqedonas, duke shënuar golin e tretë në minutën e 82-të e duke i shkaktuar Besës humbjen e 3-të në 19 javë të luajtura të këtij sezoni.

Një humbje e hidhur për formacionin e Shpëtim Duros, jo vetëm se vinte pas asaj fitoreje në transfertë 2-0 me Apoloninë në Fier, por edhe për faktin e sheh sërish veten 12 pikë larg kryesuesve absolutë të kampionatit, Dinamos, që nga ana e saj ka grumbulluar 48 pikë.

Flamurtari, nga ana e tij regjistroi fitoren e katërt sezonale, duke u ngjitur tashmë në kuotën e 18 pikëve dhe vendin e 10-të, me pikë të barabarta me Gramozin (vendi i 11-të). Në ndeshjen e ardhshme, Flamurtari do të presë në Vlorë Apoloninë. Fierakët po përjetojnë një krizë rezultatesh.

3′ Sakaj kroson në zonë, Progni është i lirë, godet me kokë, por topi përfundon mbi tra.

4′ Roshi avancon drejt zonës, shmang dy lojtarë të Besës, në kufijtë e zonës godet, por Shehi largon në korne.

5′ Nga goditja e këndit harkon Progni, Memelli me kokë, topi shkon te Shehaj, që nuk arrin të godasë.

25′ Top i gjatë për Memellin në zonë, që kontrollon bukur, ndaj tij ndërhyn Arapi në mënyrë të gabuar dhe penallti për Flamurtarin.

27′ Pas protestave të Besës, pranë topit është Sakaj, që godet saktë nga pikë e bardhë. 1 0 për Flamurtarin.

42′ Vrapi nga e majta e sulmit kavajas, harkon në zonën e Flamurtarit, Poçi godet me kokë, por jashtë.

47′ Goditje e fortë e Sinanit nga jashtë zonës, pret Moçka dhe më pas kemi edhe një sinjalizim jashtë loje.

70′ Goditje këndi për Flamurtarin. Topi në zonë, ndërhyn fillimisht Veliu, më pas Memelli, që shënon golin e parë me fanellën vlonjate. 2-0 për Flamurtarin.

75′ Memelli, një rrezik i përhershëm, vepron mjaft bukur në zonën e Besës, godet, por është Shehi që mrekullisht largon topin në korne.

85′ Progni sheh të lirë Lenën në zonën e Besës, harkon për maqedonasin, që godet me kokë, duke shënuar golin e parë në superligën shqiptare. 3-0 për Flamurtarin.

86′ Mundësi për Besën. Janë dy gjuajtje të sulmuesve të saj brenda zonës, por në të dy rastet Moçka tregon aftësitë e tij të shkëlqyera, duke larguar rrezikun.

90′ Goditje dënimi për Flamurtarin. Sakaj gjuan në shtyllën e majtë të Shehit, por portieri kavajas largon rrezikun.

Deklarojnë…

Gugash Magani, trajner i Flamurtarit: “E kisha thënë se sot do të fitonim bindshëm ndaj Besës dhe ju e patë edhe në fushën e lojës. Unë besoj te futbollistët e mi, por edhe në Zot, që sot në këtë ndeshje na dha të drejtë. Kemi dominuar totalisht në çdo drejtim dhe natyrisht mund të kishim shënuar edhe ndonjë gol më shumë. Golat e realizuar nga lojtarët e ardhur janë meritë e gjithë ekipit, por mendoj se kjo fitore dhe këto tri pikë janë shumë të rëndësishme.

Megjithatë, tashmë nuk kemi më kohë për të festuar, por thjesht duhet të mendojmë për ndeshjet e ardhshme. Çdo ndeshje për Flamurtarin tashmë është si një finale dhe shumë shpejt të dielën do të luajmë me Apoloninë. Çdo takim në Vlorë duhet ta fitojmë dhe mendoj se i kemi mundësitë për ta bërë këtë dhe për t’u ngjitur në tabelë. Jam i kënaqur nga të gjithë futbollistët dhe kjo fitore do të na shërbejë.”

Shpëtim Duro, trajner i Besës: “Ishte një fitore e merituar për Flamurtarin. Kemi pasur shumë probleme sot dhe kjo ka ardhur edhe si pasojë e ndeshjeve të shumta të zhvilluar nga ekipi në këtë periudhë. Skuadra ka qenë pak e lodhur dhe kjo ndoshta është arsyeja kryesore e humbjes. Flamurtari e meritoi fitoren dhe diti t’i shfrytëzojë momentet për gol. Duhet ta harrojmë sa më shpejt këtë humbje, për të menduar për ndeshjet e tjera.”

Të veçanta

- Ndeshja është ndjekur nga vetëm 20 veta, ndërkohë që në pallatet përreth stadiumit nuk kanë munguar sportdashësit e shumtë vlonjatë.

- Ka munguar në stadium presidenti i Besës, Nexhat Bizhdili, ndërsa të pranishëm kanë qenë kryetarët e bashkive, të Vlorës dhe të Kavajës.

- Ka rezultuar me fat debutimi i Lenës me Flamurtarin, që ka realizuar gol, por edhe Memelli gjen golin e parë pas humbjes së 11-metërshit në Peqin.