Megjithatë, pas humbjes në Peqin, në kampin kuqezi kanë nisur tashmë përgatitjet për përballjen e së mërkurës, në një ndeshje ku Flamurtari kërkon fitoren, ashtu siç ndodhi në ndeshjen e parë të luajtur po në Vlorë, mes Flamurtarit dhe Besës. Po kështu, në kampin vlonjat ka pasur sërish lëvizje, ku pas mbërritjes së sulmuesit Memelli, pranë Flamurtarit është bashkuar edhe shqiptari maqedonas Njazi Lena, lojtar mesfushor që deri më sot ka luajtur me ekipin e Kumanovës në kampionatin maqedonas. Konfirmimi ka ardhur nga vetë trajneri i Flamurtarit, Gugash Magani, ndërsa ka bërë me dije se bëhet fjalë për një lojtar më të dhëna shumë të mira dhe natyrisht pritet t’i japë diçka më shumë mesfushës vlonjate.

Lena është bashkuar vetëm mbrëmjen e së shtunës me Flamurtarin dhe paraprakisht do të jetë pjesë e ekipit të Flamurtarit deri në fund të sezonit. Kështu, pas Gramit, Prognit, Pulitzit, Bilanit dhe Memellit, mesfushori shqiptaro-maqedonas është lojtari i radhës që bashkohet me kuqezinjtë e Flamurtarit, duke rritur konkurrencën në këtë ekip, por me qëllimin kryesor, siç deklarojnë drejtues të ekipit vlonjat, për të larguar Flamurtarin nga vendet e fundit të renditjes.

Por tashmë në vëmendje është takimi me Besën, ku do të luhet sërish në Vlorë dhe ndoshta stafi teknik i Flamurtarit nuk kërkon një paraqitje si ajo e Peqinit, ku ekipi humbi në shifrat 2 1, edhe pse pati ndoshta mundësinë të merrte diçka më shumë se kaq. Fakti që Flamurtari renditet në vendet e fundit, në kuotën e 15 pikëve, e bën edhe më shumë të rëndësishme këtë ndeshje.

Vetë Magani ka deklaruar se vetëm fitorja është alternativa për këtë përballje shumë të rëndësishme për Flamurtarin, që tashmë duhet ta mendojë çdo ndeshje si një finale. Fakti që do të luhet pa tifozë, mund të favorizojë në dukje ekipin mik, megjithatë në kampin kuqezi janë të bindur se Besa nuk do ta ketë aspak të lehtë të marrë pikë në Vlorë, duke kërkuar ripërsëritjen e fitores së ndeshjes së parë të mbyllur në shifrat 1 0.

sporti shqiptar..