Takohen presidenti Gjika, shefi Cipi dhe trajneri Memushi: kërkohen dy lojtarë të rëndësishëm

Pak ditë më parë në një takim pune të drejtuesve të klubit Flamurtari me stafin e trajnerëve dhe presidentit Gjika është diskutuar për rikthimin në merkato për të siguruar ata futbollistë të nevojshëm që i duhen trajnerit Memushi për sezonin e ardhshëm. Nga ky takim jo fort i kënaqur ka dalë trajneri Memushi që ka disa ditë që ka kërkuar të paktën një sulmues dhe një qendërmbrojtës cilësor. ”Ditët po ikin shpejt dhe po afron fillimi sezonit. Na duhet të veprojnë shpejt për të pasur kohë për tu përshtatur ardhjet e reja me ekipin, ndryshe do të gjendemi në vështirësi që në javët e para të kampionatit” – mësohet të ketë thënë Memushi. Por nga ana tjetër në një prononcim të bërë nga shefi i klubit Geri Cipi mësohet se: ”Flamurtari do të jetë aktiv në merkato deri në ditët e fundit të saj”. Mjafton kaq për të kuptuar se kështu shefi i klubit Cipi e ka siguruar zyrtarisht trajnerin Memushi për të kërkuar që të plotësohet kërkesat e tij me lojtarë të tjerë.

Merkato shqiptare - Vetë fakti që tek të gjitha skuadrat lëvizjet kanë qenë shumë të pakta ka bërë që dhe kërkesa oferta për futbollistë cilësorë nga kampionati shqiptar të jetë në nivele të ulta . ”Kemi tentuar fort në dy –tre skuadra nga kampionati ynë për të tërhequr lojtarë të mirë, por ka shumë vështirësi. Në qarkullim janë shumë pak, për të mos thënë nuk ka fare sulmuesë të mirëfilltë dhe mbrojtës cilësorë” – ka sqaruar Cipi. Ndërkohë nga vetë drejtuesit e klubit Flamurtari ka rënë përfundimisht pista Tirana, ku u fol pak ditë më parë për mundësinë e afrimit tek Flamurtari të Mukës dhe Osmanit. Gjithsesi, nga burime pranë atyre që merren me merkaton vlonjate mësohet se mbi tavolinën e punës të shefit të klubit Geri Cipi është një listë, që deri dje nuk është bërë e ditur me emra futbollistësh nga kampionati shqiptar për të cilët do të synohen të punohet në ditët e ardhshme.

Merkato e huaj- Tashmë dihet se ka disa vjet rresht që për furnizimin e skuadrës të Flamurtarit me futbollistë që duhen punojnë disa menaxher. Edhe këto ditë disa prej tyre janë në aktivitet të plotë për të realizuar detyrat e marra nga klubi Flamurtari. Një nga pistat ku është përqëndruar më shumë vëmendja është dhe ajo jashtë vendit. Pas mos kalimit të provimit të sulmuesit Obi Carls, menaxheri Adrian Aliaj mësohet se është duke kërkuar një sulmues tjetër që të përmbushë kërkesat që ka parashtruar trajneri Memushi për një futbollist të tillë. Por një tjetër drejtim ku është përqëndruar vëmendja është dhe ajo për një mbrojtës qendre nga jashtë vendi. Ardhja më e fundit tek skuadra vlonjate e mbrojtësit kroat Bashic duket se nuk po e bind stafin e trajnerëve të Flamurtarit. Po afron një javë prove dhe për Bashic nuk është vendosur për qëndrimin e tij tek skuadra vlonjate. Por po t’i shtosh këtij fakti edhe atë që mbrojtësi Franc Veliu i ka të gjitha shanset pas një javë prove të qëndrojë tek skuadra skoceze Sëlltik Gllasgou, atëherë problemi i sigurimit të një mbrojtësi qendre është emergjent për skuadrën e Memushit. Në ambientin që rrethon skuadrën vlonjate lakohen futbollistë nga jashtë vendi, por deri tani asgjë nuk është zyrtarizuar se kush janë dhe nga cili vend do të vijnë. ”Ne jemi në aktivitet edhe jashtë vendit për të siguruar një sulmues dhe një mbrojtës qrndre, por kur gjërat të bëhet konkrete atëhere do të bëjmë të njohur” ka pohuar përsëri Cipi.

Seleksionimi - Këto ditë tek ekipi i Flamurtarit janë duke u stërvitur reth 30 futbollistë. Përvec katër futbollistëve vlonjatë që kanë ardhur nga ekipi i të rinjve, me skuadrën janë bashkuar dhe disa futbollistë të tjerë, të ardhur kryesisht si emigrantë nga shteti fqinj i Italisë. Shumë prej tyre janë aktivizuar me ekipet e moshave në kategoritë inferiore, ndaj me shumë siguri do të jenë kontigjenti i parë që do të largohen nga seleksionimi që ka premtuar se do ta kryejë në mënyrë të detyrueshme vetë trajneri Memushi . ”Ne na duhen futbollistë që do të ndihmojnë skuadrën për të realizuar objektivat në sezonin e ardhshëm, dhe jo numra për të mbushur listat e federimeve” – është shprehur trajneri Memushi.

Marrë nga: SportEkspres