Lojtari kishte pretendime për formacionin, duke akuzuar hapur trajnerin kuqezi

Situata te Flamurtari merr për keq. Burime të sigurta në kampin kuqezi kanë konfirmuar dje se, mesfushori i Flamurtarit, Taulant Kuqi, është pezulluar pa afat nga klubi. Gjithçka ka ardhur si pasojë e deklaratës që dha të dielën për “Panorama Sport” ish-kapiteni i kuqezinjve. I lënë në këtë periudhë në stol, ai akuzonte hapur trajnerin Eqerem Memushi për formacionin, teksa shkonte edhe më tej, duke theksuar se kreu i pankinës vlonjate ka ndërhyrje për ata lojtarë që luajnë si titullarë. Kështu, edhe pse pritej që kjo çështje të kalonte lehtë, gjithçka mori fund dje, kur lojtarit iu bë e ditur se është i pezulluar, pasi ka thyer rregullat. Mësohet se Kuqi nuk ka qenë pjesë e stërvitjes së parë të kësaj jave. Tashmë, gjërat në kampin kuqezi janë bërë mjaft të tensionuara dhe ky vendim i klubit për mesfushorin vlonjat, me siguri nuk do të pritet mirë, as nga grupi i lojtarëve, por gjithashtu nga tifozët kuqezi. Nga një titullar i padiskutueshëm, Kuqi e pa veten në fillim të këtij sezoni në stol, madje nuk u aktivizua në dy ndeshjet e Ligës së Evropës kundër Madhëruellit. Gjithashtu, mesfushori nuk ka qenë titullar as në ndeshjet miqësore që ka zhvilluar këtë periudhë Flamurtari.

Reagimi

Tentativa e trajnerit Eqerem Memushi për të larguar Taulant Kuqin, duket se do të hasë në kundërshtimin e lojtarëve të tjerë që mbështesin mesfushorin. Zërat që qarkullojnë pranë ekipit bëjnë me dije për një bojkot ndaj Memushit, me synimin për të larguar këtë të fundit. Nga ana tjetër, Kuqi mund të shpërthejë në akuza më të ashpra ndaj trajnerit, në rast se nuk ndërhyjnë drejtuesit më të lartë të klubit.

Skenari

Burime në kampin kuqezi flasin edhe për një skenar, në lidhje me këtë çështje. Nëse Kuqi largohet përfundimisht nga Flamurtari, i hap rrugën tratativave me mesfushorin gjirokastrit, Fejzo Shenaj, i cili luan në të njëjtin rol dhe mbetet i preferuari i teknikut Memushi. Edhe pse duket çështje orësh afrimi i Shenajt në Vlorë, polemikat që kanë shoqëruar kampin kuqezi pritet të shtyjnë ardhjen e tij.

Bledar Devolli i thotë “jo” Flamurtarit

Bledar Devolli i ka thënë “jo” ofertës së Flamurtarit. Lajmi bëhet i ditur për “Panorama Sport”, nga burime të sigurta në klubin kuqezi. Futbollisti gjirokastrit ishte një ndër kandidatët më të fortë, për t’iu bashkuar kuqezinjve, teksa klubi vlonjat mendonte se ai do të mbyllte një “gropë” të madhe në mesfushën kuqezi. Tratativat me këtë lojtar kanë filluar herët dhe shefi i klubit, Geri Çipi, ka qenë njeriu që është marrë ekskluzivisht me mbylljen e çështjes. Devolli kishte vendosur të ndiqte zhvillimin e ngjarjeve pranë Tiranës dhe më pas t’i kthente një përgjigje përfundimtare Flamurtarit. Mësohet se për gati tri muaj, mesfushori i premtonte Çipit që do të ishte pjesë e Flamurtarit, por vetëm dy ditë më parë ai i ka refuzuar kalimin te kuqezinjtë, sepse gjërat te Tirana morën për mirë.

Kërkesa - Devolli, pasi ka nuhatur që në Vlorë nuk po vjen asnjë lojtar prej atyre që i kishte premtuar numri dy i klubit vlonjat, ky synohej ndërtimi i një Flamurtari pretendent, për të mos prishur qejfin me klubin kuqezi, dribloi me lezet Çipin. Lojtari i kërkoi 50 mijë euro klubit të Flamurtarit, për t’u veshur kuqezi. Në pamundësi për të paguar këtë shumë, klubi vlonjat e ka quajtur të mbyllur këtë histori. Në këtë mënyrë, Devolli i ka shpëtuar detyrimit ndaj Flamurtarit, teksa i kishte dhënë fjalën përfaqësuesve të klubit kuqezi. Ai tashmë do të mbetet në kryeqytet te Tirana, ku në sezonin e fundit fitoi titullin kampion. Mesa duket, në vendin e parashikuar për Devollin, te Flamurtari do të luajë një tjetër gjirokastrit, pikërisht Fejzo Shenaj, i cili ka qenë pjesë e Shkumbinit në kampionatin e kaluar.

Marrë nga: PanoramaSport