Sektori i Garave, gati për të zbardhur kalendarët e kampionateve të futbollit për të gjitha kategoritë

Sektori i Garave, pranë Federatës Shqiptare të Futbollit, ka vendosur që shortin për Kampionatin e 71-të Kombëtar, që përkon me fillimin e sezonit të ri 2009-2010, të hidhet ditën e mërkurë, më 5 gusht. Lajmi është bërë i ditur nga shefi i zyrës së shtypit pranë FSHF-së, Tritan Kokona. “Shorti për Superligën e sezonit të ri futbollistik do të hidhet ditën e mërkurë në ambientet e hotel “Rogner”.

Po kështu, e njëjta gjë edhe përsa i përket Kategorisë së Parë dhe Kategorisë së Dytë. Gjithçka është plotësisht në rregull dhe Federata Shqiptare e Futbollit është duke bërë përgatitjet e fundit për të përcaktuar kalendarin e përballjeve midis ekipeve shqiptare për kampionatin e këtij sezoni”,- deklaroi për “Sportin shqiptar”, shefi i marrëdhënieve me publikun në FSHF, Tritan Kokona.

Sipas Kokonës, të gjitha klubet pjesëmarrëse, duke përfshirë këtu edhe ato të kryeqytetit, kanë dorëzuar tashmë pranë Sektorit të Garave në FSHF të gjithë dokumentacionin e nevojshëm, së bashku me kontratat me stadiumet në të cilat këto ekipe do t’i zhvillojnë takimet e tyre gjatë këtij sezoni. Ky ishte dhe një nga shkaqet kryesore të vonesës së hedhjes së shortit për edicionin e ri të kampionatit dhe të Kupës së Shqipërisë, duke patur parasysh që vitin e kaluar klubet i dorëzuan kontratat me stadiumet që më 15 korrik dhe shorti u hodh dy ditë më vonë, pra më 17 korrik.

Kjo sepse duhen shmangur përplasjet e mundshme, sidomos midis ekipeve të kryeqytetit, duke patur parasysh se janë tre ekipe që do të luajnë në dy stadiume. Kështu, kur kanë mbetur edhe jo më shumë se njëzet ditë nga fillimi i javës së parë të Superligës, më në fund, ekipet e elitës së futbollit shqiptar, por edhe ato të Kategorisë së Parë dhe të Dytë, do të kenë mundësi të njohin kalendarin, i cili do t’i vërë përballë njëra-tjetrës në garën për të fituar trofetë e këtij sezoni.

Siç është bërë e ditur edhe më parë, organizimi i hedhjes së shortit për këtë sezon futbollistik është marrë përsipër nga kompania UFA, e cila pretendon të blejë edhe të drejtën televizive, që pritet të shitet si paketë e plotë. Kjo është një risi për sa i përket fushës së transmetimneve të ndeshjeve dhe menaxhimit të reklamave të ekipeve shqiptare, gjë e cila pritet gjithashtu të ndihmojë klubet në aspektin financiar në këtë periudhë të vështirë për to.

Ndërkohë, ashtu siç është vendosur në mbledhjen e Komitetit Ekzekutiv më 22 korrik, java e parë e Superligës do të luhet më 23 gusht. Kurse Kategoria e parë do të fillojë një javë më pas, pra më 29 gusht dhe Kategoria e Dytë më 20 shtator. Për sa i përket kampionateve të të rinjve (U-17 dhe U-19), është vendosur që ato të fillojnë më 13 shtator. Po kështu, më 16 gusht konfirmohet zhvillimi i Superkupës së Shqipërisë, Tirana-Flamurtari.

Kombëtarja grumbullohet më 9 gusht

Ekipi ynë kombëtar pritet të grumbullohet më 9 gusht në “Hotel Tirana International”, në prag të ndeshjes miqësore kundër përfaqësueses së Qipros, e cila do të luhet më 12 gusht në stadiumin kombëtar “Qemal Stafa”. Burime pranë Federatës Shqiptare të Futbollit kanë bërë të ditur se futbollistët, të cilët janë thirrur nga trajneri Josip Kuzhe për këtë miqësore, do të kryejnë fillimisht grumbullimin në kryeqytet, për të vijuar më pas me programin stërvitor para takimit me Qipron. Gjithashtu, mësohet se meqenëse 12 gushti nuk është ditë e lirë nga UEFA, pritet që shumica e futbollistëve të thirrur, t’i përgjigjen pozitivisht ftesës së trajnerit kroat Kuzhe. Përjashtim mund të bëjnë ata lojtarë, të cilët i fillojnë kampionatet me skuadrat e tyre, siç është Lorik Cana, i cili fillon aventurën e tij të re në radhët e ekipit anglez të Sandërlendit më 15 gusht. Po kështu, sipas këtyre burimeve, mësohet se trajneri Josip Kuzhe pritet të vijë në Shqipëri ditën e mërkurë, një javë para takimit miqësor.

Vendimet e Komisionit të Disiplinës

Komisioni i Disiplinës pranë FSHF-së shqyrtoi dje disa nga problemet e ndodhura në aktivitetin futbollistik kombëtar të sezonit të kaluar. Në mbledhjen e ditës së djeshme u vendos:

1. Trajneri i Lushnjës, Ilir Gjyla, për deklarata të përsëritura fyese në media ndaj arbitrave dhe zyrtarëve të FSHF-së, dënohet me katër ndeshje pezullim nga të gjitha aktivitetet sportive, si dhe me 100 mijë lekë gjobë. Gjithashtu, trajneri Gjyla paralajmërohet se në rast përsëritjeje të kësaj shkeljeje, do të merren masa deri në përjashtim nga pjesëmarrja në aktivitetet sportive.

2. Zyrtari i Partizanit, Genc Tomorri, për fyerje dhe goditje të asistentit të arbitrit, dënohet me 2 muaj pezullim nga të gjitha aktivitetet.

3. Shqyrtimi i kërkesave ankimore të paraqitura nga lojtarë të ndryshëm, do të bëhen në mbledhjen e ardhshme të Komisionit të Disiplinës më datë 05.08.2009 ora 13:00, ku të njoftohen palët për t’u paraqitur dhe dëgjuar nga ky komision në lidhje me ankesat e paraqitura.

Kundër këtij vendimi lejohet ankimimi brenda pesë ditëve në Komisionin e Apelit.

sporti shqiptar