Vlonjatët përmbushin objektivin, duke treguar edhe një herë forcën në stadiumin e tyre

Flamurtari - Lushnja 2 - 0

Shënues: Galica 26′, Çaushaj 75′
Flamurtari: Moçka, Malaj (Zeqiri 65′), Beqiri, Veliu, Begaj, Arifaj, Guna, Alvizh, Strati (Guga 46′), Galica (Shehaj 73′), Çaushaj. Trajner: E.Liçaj.
Lushnja: Bejte, Ndoni, Hasalla, Xhafa, G.Çela, Topi, Bokatola
(Korreshi 31′), Sekseri, P.Arbri, Bubeqi, K.Arbri (Sisoko 52′). Trajner: V.Bici.
Gjyqtarë: E.Peza (Tiranës), E.Miho, F.Elezi (Durrës)

“Radiografia”

3′ Strati pason për Çaushajn, që godet, por gjithçka devijohet nga mbrojtja dhe vetëm korne.
6′ Sërish vlonjatët me Çaushajn, topi i goditur prej tij prek traun e portës së Bejtes dhe vetëm jashtë.
14′ Gabon Veliu, kërkon të përfitojë Bubeqi, por brenda zonës gjithçka neutralizohet nga Moçka, që pret goditjen e sulmuesit lushnjar.
20′ I lirë në kufijtë e zonës, P.Arbri godet, por është Moçka që i thotë “jo” golit, duke e larguar topin në korne.
26′ Guna për Alvizhin, rrëshket portieri mik dhe Galica godet duke shënuar. 1 0 për Flamurtarin.
38′ Top për Gunën. Ky i fundit kërkon Stratin, por përpara portës largon topin Ndoni, duke shmangur rrezikun përpara portës së tij.
45′ Rrezikon Lushnja. Topi nga krahu i djathtë në zonë preket nga K.Arbri në formë parabole, aty largon fillimisht Moçka dhe më pas në vijën fatale është Arifaj që shmang rrezikun.
46′ Goditje nga larg e Arbrit. Topi përplaset në traversë dhe më pas poshtë, pranë vijës fatale, ndërsa largohet më pas nga zona vlonjate. Lushnjarët kërkojnë golin, madje protestat vijojnë edhe pas përfundimit të pjesës së parë.
50′ Godet Bubeqi, por gjuajtja e tij është vetëm mbi tra, pa sjellë rrezik.
53′ Provon edhe Çaushaj, por goditja e tij është e lehtë pa problem për portierin mik.
60′ Eshtë autori i golit të parë, Galica, që godet nga jashtë zonës, kur Çaushaj ishte i lirë në zonë dhe mund të kishte rrezikuar.
72′ Ndoni në zonë, Bubeqi është i vetëm, godet me kokë, por goditja nuk është aq e fortë sa duhet. Pret Moçka.
75′ Top i gjatë për Shehajn. Ky me zgjuarësi e ul me kokë për Çaushajn, që i lirë përballë portierit shënon në të djathtë të tij. 2 0 për Flamurtarin.
80′ 90′ Miqtë kërkojnë të shënojnë të paktën një gol, por pa mundur të rrezikojnë seriozisht, ndërsa vlonjatët me anë të kundërsulmit mund të kishin shënuar me Alvizhin, nëse kroati do të ishte treguar më i saktë në pasimin e fundit në dy raste.

Komenti

Tri pikë për Flamurtarin, që shënon një tjetër fitore në shtëpi dhe tashmë e sheh veten në grupin e gjashtë skuadrave më të mira. Në një ndeshje, ku vështirësia ka qenë relative, fakt ky i pranuar edhe nga drejtues të Flamurtarit, edhe pse për ata rëndësi ka pasur fitorja dhe tri pikët, të cilësuara mjaft të rëndësishme. Me disa mungesa në formacion, vlonjatët dhe trajneri Liçaj ka eksperimentuar, duke hedhur në fushë lojtarë të cilët kanë luajtur pak gjatë sezonit. Ndërkohë, lushnjarët janë paraqitur me synimin për të marrë të paktën një pikë në Vlorë.

Pjesa e parë do të ishte më e mirë për vlonjatët, të cilët në minutën e 26 të do të gjenjë golin, që i jep qetësi ekipit vendës. Nga ana tjetër, miqtë nuk kanë se çfarë të humbasin dhe shohin më shumë drejt sulmit, ndërsa fundi i pjesës së parë shënon një rast për diskutin, ku pas një gjuajtjeje jashtë zonës, lushnjarët pretendojnë se topi ka kaluar vijën fatale, megjithatë nuk janë të këtij mendimi gjyqtarët.

Pjesa e dytë tregon thuajse ekuilibra të plotë në lojë, edhe pse miqtë kërkojnë të marrin më shumë iniciativën, por nuk janë të saktë. Flamurtari shënon golin e dytë me Çaushajn, lojtar që po njeh rritje nga ndeshja në ndeshje dhe nuk duket që pas kësaj të ketë më histori, edhe pse miqtë kërkojnë të paktën golin e nderit.

Përfundimisht, Flamurtari fiton 2 0, një tripikësh mjaft i vyer, kur tashmë shkëputen më shumë nga katër vendet e fundit, ndërsa miqtë kanë treguar një ekip simpatik në Vlorë, megjithatë pa mundur të realizojnë syminim me të cilin kishin mbërritur në Vlorë. Për vlonjatët tashmë nis java e vështirë, kur pas takimit në kupë, do të luajnë më pas në Shkodër, ndërsa një javë më vonë do të presin në shtëpi Tiranën. Ndërsa Lushnja duhet të nisë të mendojë se si do të shkpëputet nga vendet e fundit në renditje.

Deklarojnë:

Petraq Bifsha, zëvendëstrajner i Flamurtarit:
“Jam i kënaqur me fitoren, në një ndeshje të vështirë, kjo edhe për kushtet mjaft të rënduara të terrenit. Kemi marrë tri pikë, që do të na shërbejnë shumë, ndërsa pas rikthimit të lojtarëve të dëmtuar, do të kemi më shumë mundësi për të ndërtuar një formacion edhe më të mirë. Megjithatë, jemi të kënqur me tri pikët dhe kjo pa dyshim vlen, ndërsa do ta quaja fitoren më të vështirë të Flamurtarit deri në këto momente kur kemi marrë drejtimin e ekipit.”

Vasil Bici, trajner i Lushnjës:
“Kishim ardhur me synimin për të marrë diçka, por në fund duhet të pranojmë rezultatin. Mendoj se si u zhvillua takimi, mund të kishim marrë më shumë. Loja u zhvillua e hapur dhe me raste nga të dy ekipet. Kemi gabuar edhe në rastin e fundit, ndërsa edhe të dy anësorët kanë gabuar, kjo në fundin e pjesës së parë, kur topi ka hyrë dukshëm në portë, por edhe për golin e parë të Flamurtarit kam pretendimet e mia. I uroj gjithsesi suksese Flamurtarit.”

Të veçanta

Jo fort mirë nga ana shëndetësore, trajneri Liçaj nuk është paraqitur në konferencën për shtyp dhe këtë e ka bërë zëvendësi i tij, Bifsha.
Mbrojtësi Beqiri ka mbajtur për herë të parë shiritin e kapitenit në këtë takim, por edhe për herë të parë gjatë karrierës së tij.
Lojtarët kroatë Paniç dhe Brajkoviç, të pezulluar, e kanë ndjekur së bashku më familjet e tyre ndeshjen.
- Nuk është marrë asnjë karton në këtë ndeshje, një statistikë që duhet mbajtur shënim në analet e historisë së ndeshjeve të futbollit shqiptar, sidomos në dekadën e fundit.