Akuzat e Pemës i acarojnë vlonjatët
Sulmuesi vlonjat, EleandroPema, nuk do të jetë më pjesë e ekipit të Flamurtarit.Vetë futbollisti ka deklaruar se e ka të pamundur bashkëjetesën me klubin vlonjat. Ai ka shpjeguar se në Vlorë nuk gjen ambientin e përshtatshëm, prandaj kërkon kartonin e tij, kërkesë kjo, që nuk është pranuar nga klubi kuqezi. Drejtuesit e Flamurtarit janë ndier mjaft të fyer për faktin se Pema, sipas tyre, ka hedhur baltë mbi punën e bërë dhe ambientin në këtë klub. Lidhur me këtë çështje ka reaguar vetë sekretari Çipi, i cili ka bërë të ditur dhe arsyen që e detyroi Pemën të vjellë vrer mbi klubin. “Sulmuesi është objekt i një gjesti të përsëritur në Vlorë.

Ai ka qenë njëherë i dënuar me tri ndeshje pezullim dhe një gjobë të rëndë për bojkot të takimit, por klubi është mjaftuar vetëm me dy takime pezullim, pasi e ka parë Pemën me një sy tjetër. Historia përsëritet në përballjen me ekipin e Shkumbinit. Flamurtari e kishte vlerësuar këtë sfidë dhe kërkonte medoemos tri pikët. Eleandro Pema e nisi këtë takim të rëndësishëm nga stoli, mirëpo në momentin kur stafi e thirri të hynte në fushë, ai e bojkotoi ndeshjen, duke i thënë ‘jo’ kreut të pankinës. Pikërisht këtu mori shkas gjithçka, pra ndëshkimi i Pemës nga klubi. Ne nuk e kemi dashur asnjëherë largimin e tij dhe ia kemi bërë të qartë këtë me qëndrimin tonë. Ne i kemi paguar atij mijëra euro, duke e respektuar kështu kontratën me të edhe parakohe”, u shpreh sekretari i këtij klubi, Geri Çipi.

Akuzat

Akuzat e Pemës në adresë të Flamurtarit, se ky klub nuk di të respektojë, nuk punon e për më tepër neglizhon, nuk janë pritur aspak mirë nga drejtuesit kuqezi. I menjëhershëm ka qenë reagimi i tyre. Kështu, sekretari iklubit vlonjat, Geri Çipi, ka dalë përpara mediave për të mbrojtur imazhin e ekipit të Flamurtarit, i cili nuk mund të përgojohet në këtë mënyrë prej një lojtari që bën presion vetëm e vetëm për të rikuperuar kartonin e tij, kur ka futur në xhep mijëra euro që vijnë pikërisht nga taksapaguesit vlonjat.

PANORAMA SPORT